წვიმის დროს მდინარე დიდდება და სოფელს ზიანს აყენებს. ადგილობრივები ამბობენ, რომ არჩევნებამდე ადგილობრივ მუნიციპალიტეტს არაერთხელ მიმართეს, მაგრამ მათი მხრიდან გზაზე არანაირი სამუშაოები არ ჩატარებულა.
მირო ორთოზავრია: “წყალს ღობე მიაქვს, ცოტა რომ მოიმატებს, მოსახლეობის ეზოში შედის. არჩევნებამდე გამგეობამ ვითომ დააწყო ქვები და ჯებირი გააკეთა, მაგრამ წყალს დაწყობილი ქვები შეაჩერებს? ან შეიძლება გადასასვლელი ხიდი ისე გააკეთო, რომ გადაბრუნების საშიშროება იყოს? იძულებულები ვართ, ჩვენი ხელით გავაკეთოთ, მაგრამ საშუალება რომ არ გვაქვს? ფიზიკურ შრომას არ დავაკლებთ. გზაც სულ გაფუჭდა _ მანქანები ვეღარ დადიან, სასწრაფო სამედიცინო დახმარება რომ დასჭირდეს სოფელს, ვერ მოვა ჩვენამდე. მეზობლად ერთი ქალი ცხოვრობს, დარიკო საჯაია, შეზღუდული შესაძლებლობების მქონე ბავშვი ჰყავს და მისი ცოდვით ვიწვებით, სასწრაფო რომ ვერ ამოდის, მთელი სოფელი ვეხმარებით, ბავშვი ცენტრამდე რომ ჩაიყვანოს. შარშან, ივნისში წყალდიდობა იყო, სახლებში შემოგვივარდა წყალი და თუ რამე ფრინველი გვყავდა, ყველა წაიღო. ახლა ახალი მთავრობა მოვიდა და იმედი გვაქვს, დაგვეხმარებიან. მოხედვა გვინდა სოფელს!”
ჩხოროწყუს მუნიციპალიტეტის ახლადარჩეული გამგებელი, დათო გოგუა პირადად შეხვდა სოფელ თაიას მოსახლეობას და მათგან მოისმინა სოფელში არსებული ვითარება.
დათო გოგუა: “მდინარე ხაშაზე ხიდია ასაშენებელი, რომლის საპროექტო სამუშაოები ჯერ არ არის ჩატარებული. ჩვენ მზად გვაქვს განაცხადი ამ თემასთან დაკავშირებით და მივმართავთ ინფრასტრუქტურის სამინისტროს. საგზაო დეპარტამენტი გამოაცხადებს ამ ხიდის მშენებლობის საპროექტო ტენდერს და ამის შემდეგ ხიდის მშენებლობაზე ტენდერი ინფრასტრუქტურის სამინისტრომ უნდა გამოაცხადოს, რის მერეც სამშენებლო სამუშაოები დაიწყება. ჩვენი მოვალეობაა, მოვისმინოთ თითოეული ადამიანის, ყველა სოფლის პრობლემა, უმოკლეს ვადაში მივიღოთ ზომები იმ პრობლემების გადასაწყვეტად, რომელიც თითოეულ სოფელში არსებობს. ხალხმა ყველაზე კარგად იცის, რა სჭირდება სოფელს, ამიტომ დღეიდან სოფლის პროგრამით გათვალისწინებული პროექტები უშუალოდ მოსახლეობის ჩართულობით განხორციელდება.”
