ეს შეხვედრა ოზურგეთის მუნიციპალიტეტის საკრებულოს სხდომათა დარბაზში შედგა. სტუმრებმა ადგილობრივ ჩინოვნიკებს თვითმმართველობის რეფორმის კონცეფცია გააცნეს. აქვე განიხილეს საქართველოს მთავრობის მიერ მოწონებული დეცენტრალიზაციისა და თვითმმართველობის განვითარების სტრატეგია.
შეხვედრის დასრულების შემდეგ, თენგიზ შერგელაშვილმა “გურია ნიუსის” რამდენიმე კითხვას უპასუხა.
_ბატონო თენგიზ, როგორ ფიქრობთ, შეძლებთ თუ არა სოფლის მხარდამჭერი პროგრამების პროექტების გახორციელებაზე კონტროლს?
_სოფლის მხარდამჭერი პროგრამა გაკონტროლებული იქნება იმ კუთხით, რომ ჩვენ წელს შევეცდებით, კრებები ჩატარდეს რეალურად, გარკვეული მონიტორინგი სამინისტრომ განახორციელოს. მოხდება მოსახლეობის მიერ პრიორიტეტების განსაზღვრა და ამას განსაზღვრავენ მუნიციპალიტეტები. ყოველივე ეს განსაზღვრულია მთავრობის შესაბამისი დადგენილებით.
_ გაგრძელდება თუ არა ის პროექტები, რომელიც წინასაარჩევნოდ დაიწყეს და ახლა მიტოვებულია?
_ამასთან დაკავშირებით შეიქმნა კომისია, ჩვენ შევცვალეთ მთლიანად სისტემა. იცით, რა არის? ჩვენ შეგვხვდა ასეთი სიტუაცია, არა მარტო გურიაში, მთელი საქართველოს მასშტაბით. აგვისტოში და ივლისში წინა მთავრობამ მიიღო აქტები, რომლითაც დაიწყო რაღაც გარკვეული პროექტების მშენებლობა გამარტივებული წესით, ყოველგვარი ტენდერის გარეშე. შესაბამისი თანხაც კი არ იყო გამოყოფილი ამ პროექტებისთვის. ეს იყო უბრალოდ ილუზიის შექმნა, რომ თითქოს, დაიწყო სამუშაოები, ამოქმედდა ტექნიკა. ეს იყო წინასაარჩევნო ილუზია. ჩვენ გადავხედეთ ამ პროექტებს და ნაწილს დაველოდებით. მუნიციპალიტეტებს 11 მარტამდე აქვთ ვადა, წარმოადგინონ გასახორციელებელი პროექტების სია, რასაც განიხილავს რეგიონული განვითარების სამინისტროს კომისია და გადაწყდება, სად რა პროექტი უნდა შესრულდეს.
_ ბატონო თენგიზ, რა ხდება გაზის გაყვანასთან დაკავშირებით? განახლდება თუ არა შესაბამისი სამუშაოები?
_ არსებობს საკითხები, რაც ჩვენი სამინისტროს ბიუჯეტში ზის და რასაც ვახორციელებთ. ზოგს კი თვითმმართველობა ახორციელებს. გეტყვით, რომ სამთავრობო კომისიამ პრიორიტეტად წელს განსაზღვრა სოფლის წყალი, ადგილობრივი გზები და ხიდები და ნაპირსამაგრი სამუშაოები. ასევე სხვა პრიორიტეტებსაც განვიხილავთ, _ განაცხადა შერგელაშვილმა.
