და აცხადებენ, რომ კომისიამ, ფაქტობრივად, ყველა ის შენიშვნა გაიზიარა, რაც არასამთავრობო სექტორს კანონპროექტთან დაკავშირებით ჰქონდა.
აღსანიშნავია, რომ ვენეციის კომისიის დასკვნის ოფიციალური ვერსია ამ დრომდე არ გამოქვეყნებულა, თუმცა, თითოეული მხარე ერთმნიშვნელოვნად გამარჯვებულად თვლის თავს
“საერთაშორისო გამჭვირვალობა – საქართველო”, “საქართველოს ახალგაზრდა იურისტთა ასოციაცია” და “საქართველოს ადვოკატები დამოუკიდებელი პროფესიისთვის” აცხადებენ, რომ იუსტიციის სამინისტროს მიერ შემუშავებული კანონპროექტის დიდი ნაწილი ასახავს იმ რეკომენდაციებს, რომლებიც არასამთავრობო ორგანიზაციებს ბოლო წლების განმავლობაში სასამართლო სისტემაში არსებული სერიოზული პრობლემების შესწავლის შედეგად დაუგროვდათ.
“კანონში ამ რეკომენდაციების გათვალისწინების შედეგად, გაიზრდება ინდივიდუალური მოსამართლის როლი; ჟურნალისტებს ექნებათ მათთვის საინტერესო სასამართლო პროცესების ტრანსლაციის შესაძლებლობა; მნიშვნელოვანი ნაბიჯები გადაიდგმება იუსტიციის უმაღლესი საბჭოს დეპოლიტიზაციის მიმართულებით, რადგან არც პრეზიდენტს ექნება წევრების დანიშვნის უფლება და არც დეპუტატებს ექნებათ შესაძლებლობა გახდნენ საბჭოს წევრები; გაიზრდება მოსამართლეთა თვითმმართველობის როლი და უზენაესი სასამართლოს თავმჯდომარეს აღარ ექნება ექსკლუზიური უფლებამოსილება, დაასახელოს იუსტიციის უმაღლესი საბჭოს წევრობის კანდიდატები – ეს უფლება ექნება თითოეულ მოსამართლეს და მოსამართლეთა კონფერენცია ფარული კენჭისყრით აირჩევს მისთვის სასურველ კანდიდატებს და ა.შ.” _ აცხადებს “საერთაშორისო გამჭვირვალობის” ხელმძღვანელი ეკა გიგაური.
ორგანიზაცია “საქართველოს ადვოკატები დამოუკიდებელი პროფესიისთვის” წარმომადგენელი დავით ასათიანი ამბობს, რომ “ვენეციის კომისია საქართველოს იმ მოდელს სთავაზობს, რომელიც ყველაზე უფრო მეტადაა მიახლოებული არასამთავრობო სექტორის პოზიციასთან: უმჯობესი იქნება, თუ უფლებამოსილება ვადაზე ადრე არ შეუწყდებათ იუსტიციის უმაღლესი საბჭოს იმ წევრებს, რომლებიც მოსამართლეთა კონფერენციის მიერ არიან არჩეულნი და არ ახორციელებენ ადმინისტრაციულ ფუნქციებს.”
ასათიანის თქმით, საკითხის პოლიტიზება და მწვავე დაპირისპირების რეჟიმში გადატანა, სასამართლო რეფორმის გახორციელებას ხელს შეუშლის, ამიტომაც არასამთავრობო ორგანიზაციები მხარეებს სთავაზობენ შუამავლის როლს, რათა მოხერხდეს პროექტის შუალედური ვარიანტის მიღება.
იუსტიციის მინისტრი თეა წულუკიანი ამბობს, რომ ვენეციის კომისიამ აბსოლუტურად დადებითად შეაფასა სამინისტროს მიერ ინიცირებული კანონპროექტი და მას პროგრესული უწოდა:
“რაც შეეხება იუსტიციის უმაღლესი საბჭოს შემადგენლობას, მისი ცვლილება აუცილებლად მოხდება. ამას ეთანხმება ვენეციის კომისია და რომც არ ეთანხმებოდეს, იუსტიციის უმაღლესი საბჭო საჭიროებს ცვლილებას. ვენეციის კომისია ეთანხმება იმას, რომ პრეზიდენტს აღარ ჰყავდეს იქ წევრები, რომ დეპუტატები აღარ იყვნენ იუსტიციის საბჭოში და ეთანხმება იმასაც, რომ არ შეიძლება იუსტიციის უმაღლეს საბჭოში მოსამართლეთა კორპუსს წარმოადგენდეს მხოლოდ და მხოლოდ თავმჯდომარეები, გამომდინარე იქიდან, რომ რვა მოსამართლე წევრიდან ექვსი წევრი თავმჯდომარეა, ეს თავმჯდომარეები უნდა შეიცვალონ”, _ განაცხადა წულუკიანმა. მისივე თქმით, მალე იუსტიციის უმაღლეს საბჭოს ახალი შემადგენლობა ეყოლება.
დღესვე, პრესკონფერენცია გამართა უზენაესი სასამართლოს თავმჯდომარე კოტე კუბლაშვილმა, რომელიც ასევე აცხადებს, რომ კმაყოფილია ვენეციის კომისიის რეკომენდაციებით. კუბლაშვილის მტკიცებით, კომისიამ გაითვალისწინა ყველა ის შენიშვნა და მოსაზრება, რაც კანონპროექტთან დაკავშირებით ჰქონდა სასამართლოს. უზენაესი სასამართლოს თავმჯდომარის პროგნოზით, იუსტიციის საბჭოში, სავარაუდოდ, ერთი მოსამართლე წევრი შეიცვლება, რომელიც სასამართლოს თავმჯდომარეა და ამავე დროს საბჭოს წევრად მოსამართლეთა კონფერენციის მიერ არ არის არჩეული.
არასამთავრობოები იუსტიციის უმაღლესი საბჭოს 15 წევრიდან მინიმუმ 10-ის შეცვლას ვარაუდობენ.
