_ ქალბატონო მაია, თქვენ ახლახან იყავით საქართველოს რეგიონული განვითარებისა და ინფრასტრუქტურის სამინისტროში, სადაც წარადგინეთ 2013 წლის საპროექტო წინადადებები…
_ დიახ, ძალიან მცირე დროში მომზადდა საპროექტო წინადადებები. ჩვენ წინასწარ ვაცნობეთ მოსახლეობას, თუ რომელი პრიორიტებისთვის მიექციათ განსაკუთრებული ყურადღება, ჩავინიშნეთ მათი მოთხოვნები და მათზე დაყრდნობით შედგა შესაბამისი საპროექტო წინადადებები, რომელიც წარვადგინეთ საქართველოს რეგიონული განვითარებისა და ინფრასტრუქტურის სამინისტროში. იქ შეირჩა 44 საპროექტო წინადადება. ეს პროექტები, ძირითადად, ეხება გზებისა და წყლის სისტემის რეაბილიტაციას და ნაპირსამაგრი სამუშაოების ჩატარებას. პროექტის ფარგლებში მოხდება დაბის ყველა ქუჩის ხრეშოვანი საფარით დაფარვა და სანიაღვრე არხების გაყვანა. მოგეხსენებათ, დაბის მოსახლეობის მნიშვნელოვან ნაწილს არ მიეწოდება წყალი. აქედან გამომდინარე, უნდა მოხდეს მნიშვნელოვანი სამუშაოების ჩატარება, რის შედეგადაც ყველა მოსახლე მიიღებს წყალს.
_ ამჟამად წყალი, რომელიც მოსახლეობას მიეწოდება, უხარისხოა. როდის მოხდება ამ პრობლემის მოგვარება?
_ ეს პროექტი დასრულებული არ არის _ ფირმა, რომელიც პროექტს ახორციელებდა, გაკოტრდა. ამჟამად მიმდინარეობს მუშაობა მუნიციპალიტეტის განვითარების ფონდში და მალე გვეცოდინება, როდის განახლდება სამუშაოების ჩატარების მესამე ეტაპი, რომელიც მოიცავს დაბის ქსელის რეაბილიტაციას მთლიანად. დაბას წყალი ახალი სათავიდან მიეწოდება, რაც ეკოლოგიურად სუფთა იქნება.
_ დასრულდება თუ არა ის პროექტები, რომლებიც გასულ წლებში დაიწყო და არ დასრულებულა?
_ გასულ წლებში გახორციელდა სხვადასხვა პროექტი, ზოგი მათგანი წარმატებით დასრულდა, ზოგი კი დაუსრულებელია, რომელსაც ჩვენ გავაგრძელებთ და წარმატებით გავახორციელებთ. მაგალითად, დაწყებულია სპორტდარბაზის რეაბილიტაცია, მისი დასრულებისთვის საჭიროა 21 000 ლარი; სტადიონთან არსებული სასტუმროს რეაბილიტაციისათვის საჭიროა 15 000 ლარი. ეს თანხები მოთხოვნილია და იმედი გვაქვს, დადებით პასუხსაც მივიღებთ.
_ მოსახლეობის დიდი სურვილია, რომ ჩოხატაურში მნიშვნელოვანი ყურადღება დაეთმოს სპორტულ-გამაჯანსაღებელი კომპლექსის მშენებლობას…
_ ეს ჩვენთვისაც ერთ-ერთი პრიორიტეტია. მიმაჩნია, რომ ყველაზე დიდი კაპიტალი ადამიანმა სწორედ მომავალ თაობაში უნდა ჩადოს, რომელიც შემდეგ მნიშვნელოვან შედეგს მოგვცემს. ჩვენ ამ მიმართულებითაც ვმუშაობთ.
_ ძალიან მძიმე მდგომარეობაა დაბაში საკანალიზაციო სისტემასთან დაკავშირებით. არ არსებობს გამწმენდი ნაგებობები, ფეკალიები მდინარეში ჩაედინება, რაც ზაფხულის პერიოდში სხვადასხვა ინფექციური დაავადებების წყაროა.
_ ეს პრობლემაც გათვალისწინებულია და მოვითხოვეთ, წყლის ქსელის რეაბილიტაციის დროს, პარალელურად ჩაწყობილ იქნას კანალიზაციის მილები და შემდეგ გაკეთდეს გამწმენდი ნაგებობები.
_ გაგრძელდება თუ არა ბუნებრივი აირის გაყვანა მოსახლეობაში?
_ რა თქმა უნდა, ეს პროექტიც გაგრძელდება. გავუგზავნეთ მიმართვა “სოკარს”, რომელიც გრაფიკის სახით მოგვაწოდებს უბნების მიხედვით, როგორ გააგრძელებს სამუშაოებს.
_ მოსახლეობას სოფლის პროექტებთან დაკავშირებით დიდი იმედები აქვს…
_ სოფლის პროექტებზე ძალიან სერიოზული მუშაობა მიმდინარეობს. სოფლებში შევხვდებით ოჯახის თითოეულ წევრს და ყველა მათგანის წინადადება იქნება გათვალისწინებული. შედგება ოფიციალური ოქმი, სადაც დაფიქსირდება მათი სურვილები, თუ რა უნდა გაკეთდეს ამა თუ იმ სოფელზე გამოყოფილი თანხებით. სოფლის პროექტების დასრულების შემდეგ ჩატარდება მონიტორინგი. მინდა, ყველამ იცოდეს, რომ ჩოხატაურში არსებული ყველა პრობლემა შესაბამისად იქნება გადაწყვეტილი და ყველა კარგ ინიციატივას მაქსიმალურად დავუჭერთ მხარს.
