დიდი ხმაური და დაპირისპირება გამჭვირვალობის კანონის გამო, ოზურგეთის საზოგადოებაში აქტიურ გამოხმაურებას პოულობს.
სხვადასხვა ადამიანები თუ საჯარო მოხელეები, პოზიციური თუ ოპოზიციური პარტიების მომხრეები , მას სხვადასხვანაირად აფასებენ და აღიქვამენ.
„გურია ნიუსი “ შეეცადა, ასე ვთქვათ, ეს ჭრელი სპექტრი წარმოედგინა მკითხველის წინაშე.
დავით დარჩია, ოზურგეთის მუნიციპალიტეტის საკრებულოს თავმჯდომარე: _ გამჭვირვალობის რატომ უნდა გეშინოდეს? თუ საქმიანობ, დეკლარაცია უნდა შეავსო ისე, როგორც ჩვენ ვავსებთ. რამდენი არასამთავრობო ორგანიზაცია ჩამოთვალა გუშინ მდინარაძემ, რომლის საქმიანობა არაა გამჭვირვალე. ადგა იქედან რომელიმე და თქვა საპასუხოდ, არაა ეს მართალი და მაქვს დეკლარაცია სევსებულიო? ან სადმე აქვთ ღიად და გამჭვირვალედ მითითებული? თქვან, მაშინ. რა თქმა უნდა, მე მივესალმები ამ კანონს. სასწრაფოდ მისაღებია.
შალვა თავდიშვილი, ოზურგეთის მუნიციპალიტეტის საკრებულოს წევრი ნაცმოძრაობიდან:
_ ეს კანონი არის რუსეთის შემოგდებული თემა, რად უნდა მაგას ლაპარაკი. არჩევნებისთვის ამზადებენ საქმეს, რომ არ იყოს არასამთავრობოები, არ ჩამოვიდნენ დამკვირვებლები. არ უნდა მიიღონ ეს კანონი და თუ მიიღებენ, მოხდება ისე, რომ ხალხი კინწისკვრით გააგდებს „ქართულ ოცნებას“ ხელისუფლებიდან. მე პირადად ,კატეგორიულად წინააღმდეგი ვარ ამ კანონის მიღების. გაგახსენებთ, ადგილობრივ დონეზე , ოზურგეთის მუნიციპალიტეტის მერმა, კოტე შარაშენიძემ, თავისდროზე, რეორგანიზაცია რომ ჩაატარა, სულ ათი კაცი გაათავისუფლა სამსახურიდან, თან შეთავაზებით. თალაკვაძე და მისი გუნდი იძახდა, რომ მოვიდნენ და რეორგანიზაცია დაიწყეს, „ჩვენ კოტე შარაშენიძე კი არ ვართო, ხალხი რომ გავყაროთო“ და ასი ადამიანი მაინც გააგდეს სულ ტყუილად სამსახურიდან . დიქტატურა მეტს რას ქვია. აი, შედარებას იმიტომ ვაკეთებ, რომ ესენი,ამ კანონის მიღების შემთხვევაში, სულ გაწმენდენ ყველაფერს. დატოვებენ მარტო თავის სამთავრობო არასამთავრობოებს, თავის აქტივისტებს და მორჩა!
გრამიტო მამინაშვილი, ოზურგეთელი აქტიური მოქალაქე:
_ მე არცერთი პარტიის მომხრე და წევრი არ ვყოფილვარ არასდროს. ეგაა, ვფიქრობდი, ყოველ მომდევნო არცევნებზე, უფრო უკეთესი ამერჩია. ახლა ეს კანონი რომ რუსეთს აძლევს ხელს და ამ ხელისუფლებას რომ არ უნდა ევროკავშირში შესვლა, ეს ცხადია. მით უფრო ასეთ კანონს როცა იღებენ. მთელი მსოფლიო ეუბნება, არაა ეს ევროპული კანონიო და მანდამაინც კობახიძემ და მდინარაძემ იცის, როგორია? ხალხი არ დათმობს, მგონია, ამ ამბავს…
აკაკი ღლონტი, ფერმერი: „მე თუ გინდა თავი მომჭრან, ტანი გახდეს გასაბერად…“ მაინც სიმართლეს ვიტყვი _ რუსულ კანონად მიმაჩნია მაინც. მაინც ასე ვფიქრობ და ვინც საწინააღმდეგოს ფიქრობს, „ქართულ ოცნება“, მაგალითად, ალბათ, ჩემზე ჭკვიანია, რა ვიცი…(იცინის).
ლილი ბაქანიძე, ოზურგეთელი რიგითი მოქალაქე: გამჭვირვალეა თუ დახურული, არ მგონია, ვინმე ხალხისთვის იკლავდეს თავს. ზოგს ხელისუფლების დაკარგვის ეშინია, ზოგს კი, სულწასული სურს ხელისუფლებაში მოსვლა. სკამს და ფულს ეძებს ყველა, კარგით, რა…სამშობლოზე ვზრუნავთო, მოლოდ საკუთარი ზრახვების დასამალად იძახიან.
ვლადიმერ ჩავლეშვილი, სოფელ მთისპირის გამგებელი, სახელისუფლებო პარტიის მხარდამჭერი:
_ მოკლედ გეტყვით. დიახ, მხარს ვუჭერ გამჭვირვალობის კანონს და ის ყველასთვის უნა იყოს ერტნაირი.
ბადრი თავდუმაძე, ოზურგეთის მუნიიპალიტეტის სოფელ ოზურგეთის გამგებელი:
_ მე არა როგორც საჯარო მოხელე, არამედ როგორც საქართველოს რიგითი მოქალაქე ვამბობ, რომ კანონი უნდა იყოს ყველასთვის გამჭვირვალე.
არის მოქალაქეთა კატეგორია, ადამიანები, რომლებიც საერთოდ არიდებენ თავს პასუხს და ამბობენ, რომ არ აინტერესებთ კანონის ირგვლივ არაფერი.
ჩვენ გამოკითხვას ვაგრძელებთ.
ავტორი
