ახალი პროექტით იზრდება გრძელვადიანი და მოკლევადიანი პაემნების რაოდენობა და ხანგრძლივობა, ფართოვდება იმ პირთა წრე, ვისაც პატიმრის მონახულების უფლება აქვს, სასჯელაღსრულების სამინისტრო საკუთარ თავზე იღებს დედათა და ბავშვთა განყოფილებაში მცხოვრებ სამ წლამდე ასაკის ბავშვების საკვებით და ჰიგიენური საშუალებებით მომარაგებას. გარდა ამისა ახალი პროექტით, დგინდება მსჯავრდებულის საცხოვრებელი ფართის ნორმა, რაც ციხეების გადატვირთულობის პრობლემას მოხსნის.
ნახევრად ღია ტიპის დაწესებულებაში თითოეულ პატიმარზე ფართობი არ უნდა იყოს 2 კვმ-მეტრზე, დახურული ტიპის დაწესებულებაში კი 2,5 კვ მეტრზე ნაკლები. ქალთა დაწესებულებაში _ 3 კვ მეტრი, არასრულწლოვანთა დაწესებულებაში კი 4 კვ.მეტრი, სამკურნალო დაწესებულებაში ფართობი 3 კვ. მეტრით განისაზღვრა.
კანონპროექტით ერთით გაიზრდება გრძელი და მოკლევადიანი პაემნების რიცხვი. გრძელვადიანი პაემნის ხანგრძლივობა 24 საათის ნაცვლად, 48 საათი იქნება. ასევე მოიმატებს ვიდეო პაემნების რაოდენობაც, თუმცა, არასამთავრობო ორგანიზაციები და ადვოკატები ფიქრობენ, რომ სკაიპით 15-წუთიან საუბარში პატიმრის ოჯახი 15 ლარს არ უნდა იხდიდეს.
ახალი პროექტით გაფართოვდება იმ პირთა წრეც, ვისაც პატიმართან გრძელვადიან პაემანზე შესვლის უფლება მიეცემა.
არც მოქმედ კანონში და არც პროექტში ქალი მსჯავრდებულებისთვის გრძელვადიანი პაემანი გათვალისწინებული არ არის. “ციხის საერთაშორისო რეფორმის” დირექტორი ცირა ჭანტურია ამ გარემოებას იმით ხსნის, რომ არც ერთ მთავრობას არ სურს გრძელვადიანი პაემნების შემდეგ ქალებმა ციხეებში ბავშვები აჩინონ, მით უმეტეს, მაშინ, როდესაც ციხეში დედასთან მცხოვრებ სამ წლამდე ასაკის ბავშვების უზრუნველყოფას ახალი კანონმდებლობით სასჯელაღსრულების სამინისტრო იღებს თავის თავზე. გრძელვადიანი პაემანი არა, მაგრამ პატიმარი ქალებისთვის ახალ პროექტში გაჩნდა “საოჯახო პაემნის” მცნება, რაც მოკლევადიან პაემანს ორჯერ აღემატება და 4 საათს შეადგენს.
არა ერთი ცვლილება იგეგმება არასრულწლოვან პატიმრებთან დაკავშირებითაც, რაც მათთვის განათლების და ცხოვრების ხარისხის გაუმჯობესებას გულისხმობს. პროექტით იკრძალება არასრულწლოვანი მსჯავრდებულის დასაქმება დაწესებულების სამეურნეო ნაწილში.
“ძალიან მნიშვნელოვანია, რომ ბავშვების ე. წ. “აბსლუგაში” ჩართვა იკრძალება, რაც სერიოზულ პრობლემებს ქმნიდა წარსულში, რადგან ასეთი ბავშვები დაბალ კასტად მიიჩნეოდა და მათი სტიგმატიზაცია ხდებოდა,” _ ამბობს ორგანიზაცია “ციხის საერთაშორისო რეფორმის” ხელმძღვანელი ცირა ჭანტურია.
არასამთავრობო ორგანიზაციებს, კანონპროექტის იმ მუხლებთან დაკავშირებით, რომელიც ციხეებში უსაფრთხოების საშუალებების გამოყენებას არეგულირებს, კრიტიკული შენიშვნები აქვთ.
ცირა ჭანტურია ამბობს, რომ ძველი კანონმდებლობით ქალთა და არასრულწლოვანთა დაწესებულებებში ხელბორკილის და დამაწყნარებელი პერანგის გამოყენება იკრძალებოდა. თუმცა, ახალ პროექტში ეს დათქმა აღარ არის.
კანონპროექტით, ბრალდებულის/მსჯავრდებულის მიმართ დასაშვებია შემდეგი სახის სპეციალური საშუალებების გამოყენება: დამაწყნარებელი პერანგი, ხელბორკილი, წიწაკის გაზი, სასამსახურო ძაღლი, რეზინის ხელკეტი, არალეტალური იარაღი და ა. შ. კანონპროექტით განსაზღვრულია ის განსაკუთრებული გარემოებები, რაც ციხეებში არეულობის დროს სპეცდანიშნულების რაზმის გამოყენებას გულისხმობს.
არასამთავრობო ორგანიზაციები კანონპროექტის მიღებამდე საკუთარ კრიტიკულ მოსაზრებებს პარლამენტს წარუდგენენ.
