გაიაფდება თუ არა პირველადი მოხმარების მედიკამენტები და როდის შემოვა ბაზარზე ფარმაცევტული კომპანია, რომლის შესახებაც პრემიერ-მინისტრმა რეგიონულ მედიასთან შეხვედრის დროს დააანონსა? როგორც მან თქვა, კომპანია მის მეგობარ ბიზნესმენს ეკუთვნის, რომელთანაც მოლაპარაკებები მიმდინარეობს. ამ საკითხზე კომენტარს “გურია ნიუსთან” შრომის, ჯანმრთელობისა და სოციალური დაცვის მინისტრი დავით სერგეენკო აკეთებს.
_ რაც შეეხება წამლების ფასს, სახელმწიფო არასდროს ჩაერევა იმპერატიულად კერძო ბიზნესის აქტივობებში, ფასები უნდა დაარეგულიროს ბაზარმა, თუმცა მრავალ ქვეყანაში განიხილება, რომ რადგან საქმე ადამიანის სიცოცხლესა და ჯანმრთელობას ეხება, მედიკამენტებზე არის გარკვეული რეგულაციები. ჩვენი ამოცანაა, ამ ეტაპზე მინიმუმ, უზრუნველვყოთ ჯანსაღი კონკურენცია ფარმაცევტულ ბაზარზე. ეს არის ჩვენი პოლიტიკის ნაწილი, ხელს ვუწყობთ კერძო ბიზნესის განვითარებას და მათ შორის ჯანსაღი კონკურენციის. მოლაპარაკებები ნამდვილად დაწყებულია და იმდენად, რამდენადაც მოლაპარაკებების სტადია მიმდინარეობს, მე თავს ვიკავებ კომპანიის დასახელებისგან, თუმცა ვფიქრობ, რომ ეს იქნება ძალიან ეფექტური, ლეგალური, გამჭვირვალე მოქმედება. ასე რომ, წამლების ფასიც ლეგალური კონკურენციით დარეგულირდება.
არსებობს შესწავლილი სტატუსი, რომელიც საერთაშორისო ორგანიზაციების მიერ არის შესწავლილი, რომლის თანახმადაც, საქართველოში ჯანდაცვის დანახარჯების თითქმის 60 % მოდის მედიკამენტების წილად, რაც ძალიან მაღალ მაჩვენებლად ითვლება. ევროპაში პირველი ადგილი გვიჭირავს, მსოფლიოში ერთ-ერთი პირველი. შესაბამისად, ჩვენი მოვალეობაა, რომ ეს არასწორი პარიტეტი შეძლებისდაგვარად გასწორდეს და ლოგიკურ მიღებულ პროპორციაში ჩაჯდეს. ამ არასწორ პარიტეტს, ანუ მედიკამენტების ჭარბად ხარჯვას ორი მიზეზი აქვს: საკუთრივ მედიკამენტების ფასი და არასწორად დანიშნული წამლები, ანუ ბევრ წამალს ნიშნავს ექიმ. ჩვენი მოვალეობაა, რომ ორივე ამ მიმართულებაზე ვიზრუნოთ. ბევრ წამალს რომ უნიშნავს, ეს არის ხარისხის კონტროლი და ამაზე დაწყებული გვაქვს სერიზული მუშაობა.
