„გურია ნიუსი“ ოზურგეთის მუნიციპალიტეტის სოფელ ცხემლისხიდს ეწვია. ჩვენი მიზანია, გავაშუქოთ თითოეული სოფლის უპირველესი პრობლემური საკითხები, გავიგოთ, რა უჭირს ყველაზე ძალიან სოფლის თითოეულ მცხოვრებს.
ცხემლისხიდელი ბადრი გოგეშვილი ერთ-ერთი პირველია, ვინც წინა პლანზე წამოსწია სოფელში ელექტრიკოსის შტატის აუცილებლობა.
_ 900 კომლიან სოფელს, ერთი ელექტრიკოსი არ სჭირდება? თქვით ახლა, აბდლები იყვნენ კომუნისტებიო. მოვკვდი კაცი მუქთად მუშაობით. რამდენი იზოლენტა დამიხარჯავს, ვინ მოთვლის. ახალგაზრდას კიდევ ვერ ნახავ, ელექტრიკოსის პროფესია რომ ჰქონდეს. დაწერა ხალხმა განცხადება, მოითხოვეს სოფელში ელექტრიკოსი და გამგებელმა უთხრა, როგორ დაგაკმაყოფილოთ, მაგის შტატი არ არსებობს და ჩვენს ხელფასს ხომ არ გავყოფთო. ვიღაცამ ხომ უნდა იღონოს რაღაც. ძველები მიდიან, ახლებმა არ იციან. დიდ სოფლებში მაინც რომ აუცილებელია ელექტრიკოსის შტატი, ვითომ ტყუილს ვამბობ? _ გვითხრა მან სოფელში მისვლისთანავე. თან დასძინა, ვინც ამ პროფესიას ფლობს, დასაქმებულიც დარჩება, მისთვისაც მადლია და 900 კომლისთვისაც, მინუს-პლიუსი რომ არ იცის ზოგმა და რაღაცას უჩხიკინებს, სანამ არ „წამარცხდებაო“.
ცხემლისხიდის თემში შემავალ სოფელ ბაღდადში, სადაც 370 კომლი ცხოვრობს, ადგილობრივები უგაზობის პრობლემაზე ბრაზობენ.
_მაგისტრალი კი შემოიყვანეს სოფელში, მაგრამ ორი წელია, საშველი არ დაადგა ჩართვას. მარტო „ტრუბა“ რად გვინდა? – ამბობენ ისინი.
ასევე , დიდი ხანია, პრობლემურია უჩხუბის უბნის სამკილომეტრიანი გზა, რომელიც თავიდან ბოლომდე დაზიანებულია.
ცხემლისხიდის ცენტრიდან, უჩხუბის მიმართულებით ახლა ინტერნეტის ხაზი გაჰყავთ და მოსახლეობას დისკომფორტი გადათხრილი გზის გამოც აქვს.
სოფლის ცენტრში ბლომად ნახავთ მიუსაფარ ძაღლებს და ჩამოფხრეწილ საარჩევნო პლაკატებს, რომლებიც ასწლოვან ხეებსაც კი გასაცოდავებულ იერს აძლევენ.
_ბაღდადში გაზის შეყვანა დასრულებულია. ყველა ჭიშკართან მიყვანილია. პანდემიის პერიოდმა ყველგან შექმნა დაბრკოლება. ხომ კარგად იციან, რომ მალე ყველა ოჯახს ექნება? უჩხუბის გზის ვრცელი მონაკვეთი , მართალია, თავიდან ბოლომდე გასაკეთებელია, თუმცა აქ ჯერ წყალგაყვანილობის მაგისტრალი უნდა გავიდეს. 12მილიონიანი პროექტია. ნოემბრის ბოლოს იქნება ტენდერი. სათავე ნაგებობა, კომუნისტებისდროინელ ლოკაციაზე უნდა გაკეთდეს. მოხდება ადრინდელი ნაგებობის რეაბილიტაცია. საუკეთესო წყალი მოდის აქ. ამის შემდეგ გაკეთდება გზა, რადგან, თუ წყალის გაყვანამდე ასფალტი დაიგო, მერე ხელახლა უნდა დაზიანდეს და ორმაგ ხარჯს რატომ გასწევს ვინმე? სოფლის მხარდამჭერი პროგრამით ბევრი რამ გაკეთდა : დაიგო ბეტონის გზა სასაფლაოს მიმართულებით, სკოლის ეზოს კაპიტალური შეღობვა მოხდა და ასევე სოფელში ჩამომავალ მოზრდილ ღელეებზე, ოთხ ხიდზე გაკეთდა მოაჯირები, – გვითხრა მუნიციპალიტეტის მერის წარმომადგენელმა ცხემლისხიდში, _ შოთა მახარაძემ.
ვრცლად, ცხემლისხიდში არსებულ პრობლემებისა თუ გაკეთებული საქმეების შესახებ მალე გიამბობთ.
