კრებებს მონიტორინგის კუთხით, რეგიონული განვითარებისა და ინფრასტრუქტურის სამინისტროს წარმომადგენლები მოულოდნელად დაესწრებიან.
_ უშუალოდ ჩვენი წარმომადგენლები ჩავლენ კონკრეტულ სოფლებში და განახორციელებენ უშუალო დაკვირვებას, _ ამბობს ჩვენთან სატელეფონო საუბრის დროს რეგიონული განვითარების და ინფრასტრუქტურის სამინისტროს თვითმმართველობის განვითარების და დეცენტრალიზაციის პოლიტიკის სამმართველოს უფროსი, ოთარ კონჯარია.
მისივე თქმით, “სოფლის მხარდამჭერი” პროგრამის არაეფექტურად გახორციელების ერთ-ერთი მთავარი პრობლემა ის იყო, რომ არ ტარდებოდა კრებები, სადაც მოსახლეობა იმას დააყენებდა პრიორიტეტულ საკითხებად, რაც სოფლისთვის იყო საჭირო.
ოთარ კონჯარია: _ ხშირ შემთხვევაში რამდენიმე ადამიანის ან გარკვეული ჯგუფების მიერ ხდებოდა პრიორიტეტების დასახვა და მათი გახორციელება. ამ ეტაპზე, ჩვენი მთავარი მიზანი არის, პრიორიტეტები წამოსული იყოს სოფლის მოსახლეობის მხრიდან და ამ შემთხვევაში, მთავარი როლი ენიჭება სოფლის კრებებს. რამდენად რეალურად ჩატარდება კრებები, ამის ზედამხედველობას და კონტროლს განახორციელებს რეგიონული განვითარების და ინფრასტრუქტურის სამინისტრო. მოულოდნელად, შერჩევითი წესით ძალიან ბევრგან ვაპირებთ, ჩავიდეთ და ვნახოთ, დაესწრო თუ არა ამ კრებებს მოსახლეობა და ინფორმირებული თუ იყო კრების თაობაზე, რამდენად იყო მათი საჭიროებები და მათი დაყენებული პრიორიტეტები გათვალისწინებული.
სოფლის მხარდამჭერი პროგრამის ფარგლებში, ჩოხატაურში 633 600 ლარი, ლანჩხუთში _ 838 400 ლარი და ოზურგეთში კი 1 384 000 ლარია გამოყოფილი. ოთარ კონჯარიას თქმით, პროექტის გახორციელება, სავარაუდოდ, ივნისში დაიწყება.
ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე ამბობს, რომ ხალხი რასაც აირჩევს, ის გაკეთდება: _ ჩვენ ხალხს ვაძლევთ იმის უფლებას, რომ გადაწყვიტონ, რა უნდა გაკეთდეს ამ პროგრამით. ჩვენ შემსრულებელი ვართ. ადამიანების ჯგუფები როდესაც ჩამოყალიბდებიან და იტყვიან, რომ ეს უნდა გაკეთდეს სოფელში, აუცილებლად გაკეთდება არჩეული პროექტი და საქმე მივა ბოლომდე, _ თქვა კოტე შარაშენიძემ.
2013 წელს, პირველი კრება ოზურგეთის მუნიციპალიტეტში, სოფელ შრომაში ჩატარდა. აქ, ორ უბანში, ძირითადი პრიორიტეტები გამოიკვეთა. რაც შეეხება მესამე უბანს (ვაკეს), ხალხის სიმცირის გამო, კრება აპრილის დასაწყისისთვის გადაიდო.
ოზურგეთის მუნიციპალიტეტის გამგებლის მოვალეობის შემსრულებლის მოადგილის, გიორგი ღურჯუმელიძის ინფორმაციით, სოფლის კრებები ოზურგეთის მუნიციპალიტეტის სოფლებში 1 აპრილამდე გაგრძელდება: _ სოფელ შრომის და სოფელ მთისპირის ორ უბანში, ხალხის სიმცირის გამო, არ შედგა კრება. მე პირადად, სოფელ შრომაში დავესწარი კრებას და მოსახლეობამ რამდენიმე პრიორიტეტი წამოსწია წინ: შიდა გზების მოწესრიგება, საყანე ფართობამდე მისასვლელი გზის სარემონტო სამუშაოები და სასაფლაოს შემოღობვა.
პარასკევს, “გურია ნიუსი” სოფლის კრებას ურეკსა და წვერმაღალაში დაესწრო.
ურეკის კულტურის სახლში ჩატარებულ კრებას ურეკის რწმუნებული უძღვებოდა, შეხვედრას ესწრებოდნენ ოზურგეთის მუნიციპალიტეტის გამგებლის მოვალეობის შემსრულებლის მოადგილე გიორგი ღურჯუმელიძე, არასამთავრობო ორგანიზაციის “საქართველოს დემოკრატიული განვითარების კავშირის” წარმომადგენლები და მონიტორინგის კუთხით, ურეკში კრებას რეგიონული განვითარების და ინფრასტრუქტურის სამინისტროს წარმომადგენელი, გიორგი ცინცაძე. მისი თქმით, ის გურიაში უკვე რამდენიმე სხდომას დაესწრო და ყველაზე ბევრი ხალხი ურეკში ნახა.
დაბა ურეკისთვის 16 000 ლარია გამოყოფილი, რამაც მოსახლეობის უკმაყოფილობა გამოიწვია. მთავარ პრობლემად შიდა გზების და სანიაღვრე არხების მოწესრიგება დაასახელეს.
ურეკელმა მამია როყვამ იკითხა: _ მინდა, დავაზუსტო _ დაბაში პროექტების გასახორციელებლად 160 000 ლარია გამოსაყოფი თუ 16 000? რაზეც მიიღო პასუხი, რომ 16 000 ლარია.
_ ეს თანხა ურეკისთვის ზღვაში წვეთია. მეგონა, აქ საქმის გასაკეთებლად ვიყავით შეკრებილები. ოთხ თვეში, ვიცი, რომ არაფერი არ გაკეთდება, მაგრამ ეს თანხა ძალიან ცოტაა. ყველაფერი გვჭირდება, რაც კი არის ადამიანის ყოფიერებისთვის საჭირო, _ თქვა მამია როყვამ.
_ ურეკში არის მაგნეტიტის დასახლება და იქ არაფერი კეთდებოდა. ოპოზიციურად განწყობილი ხალხი ცხოვრობს და ვინ მოგვაქცევდა ყურადღებას? ასფალტის დაგება რომ დაიწყო, სასტუმრო “კოლხიდამდე” დააგეს. ძლივს დავეწიეთ და მოვაბრუნეთ უკან, მხოლოდ ორმოები ამოავსეს. გასაგებია, რომ ამ თანხით დიდი პრობლემა არ მოგვარდება, მაგრამ იმედია, ამ პროექტით არ მოიწურება გასაკეთებელი, _ გვითხრა გურამ მურვანიძემ.
ურეკელების თქმით, დამსვენებლებს უფრო მეტი კომფორტი სჭირდებათ და არა მარტო დამსვენებლებს: _ ჩვენც ხომ ხალხი ვართ? შიდა გზები ისეთია, არ ვიცით, როგორ მოხერხდება ამ პრობლემის მოგვარება. რადგან ხალხის გადასაწყვეტია ამ თანხის განკარგვა, გვინდა, რომ სანიაღვრე არხების და შიდა გზის პრობლემა მოგვარდეს. ყველა გაწვიმებისას გვეშინია, სახლში წყალი არ შემოგვივარდეს.
კრების დასრულების შემდეგ მამია როყვამ “გურია ნიუსთან” უფრო ვრცლად ისაუბრა პრობლემების შესახებ: _ გზა არ არის, შუქის პრობლემაა, გზა ბოლომდე არ არის დაგებული.. საკურორტო ზონაა და ტურისტები დადიან. მე ზედა ურეკში, წარმოუდგენელ პირობებში ვცხოვრობთ _ ჩვენი ზეგანიდან წყლით მარაგდება ქვედა დასახლება, ჩვენ კი სასმელი წყალი არ გვაქვს. ჩამოვდივართ ქვემოთ და იქედან ვეზიდებით სასმელ წყალს _ 40 ოჯახია ასეთ დღეში. იმ ხელისუფლების დროს არ გვეხმარებოდნენ და ამბიციური ტონით გვესაუბრებოდნენ. იმედია, ეს მთავრობა მაინც მოგვაქცევს ყურადღებას. ხალხი ძალიან შეჭირვებულად ცხოვრობს _ არ ჰყოფნის არც პენსია და არც სოციალური დახმარება. ჩემს მეზობელს ოპერაცია დასჭირდა და ქუთაისში გადაიყვანეს. ცოტათი გართულდა მდგომარეობა და 500 ლარს ახდევინებენ დღე-ღამეში. ამ კუთხით რაღაც ხომ უნდა გამოსწორდეს? სად ნახონ იმ ჩემმა მეზობლებმა ეს ყოველდღიურად გადასახდელი 500 ლარი?!
საბოლოოდ, კრებაზე გამოიკვეთა ორი მთავარი საკითხი _ ურეკელებს ამ ეტაპზე სურთ, შიდა გზის და სანიაღვრე არხების პრობლემის მოგვარება.
იმავე დღეს შეხვედრა წვერმაღალაშიც ჩატარდა.
_ წვერმაღალა არავის არ ადარდებს და საერთოდ, ვინმემ თუ იცის, სად არის? სამუშაო გვჭირდება და ადგილები არ არის. შარშან პლაჟზე უნდოდათ ხალხი სამუშაოდ და უარი მითხრეს _ ქალი რომ ვარ, იმიტომ არ დამასაქმეს. ნაგავს ვერ გადავყრიდი? _ გვითხრა ცისანა ცარციძემ.
მოსახლეობამ მთავარ პრობლემად უწყლობა დაასახელა: _ წყალი არ გვაქვს, შორიდან მოგვაქვს და ძალიან გვინდა ამ პრობლემის გადაჭრა. სასაფლაოსთან მისასვლელი გზაა გასაკეთებელი.
როდესაც უფროსები სხვადასხვა პრობლემის შესახებ საუბრობდნენ, სკოლიდან დაბრუნებულმა ბავშვებმა ხმამაღლა შემოსძახეს: _ სტადიონი გვინდა, სტადიონი!
