_ ხორცს, რომელსაც თქვენ ხედავთ, არის ერთ-ერთ ბაღიდან გამოტანილი და ამის შესახებ, გვინდა, რომ ყველამ გაიგოს. ამ ხორცით როგორ შეიძლება მოამზადონ კერძი და შემდეგ ბავშვებს აჭამონ? ხორცი ჩამოაქვთ ასპინძიდან და კაცმა არ იცის, რა ჩამოაქვთ. რაც ხდება, არის განუკითხაობა. საქმე ეხება ბავშვების კვებას. როგორც ვიცით, 13 ლარი იყო ტენდერზე ხორცის ფასი და ამ ორგანიზაციამ იმით მოიგო, რომ ორი ლარით ნაკლები შესთავაზა, _ გვითხრეს მშობლებმა, რომლებმაც იმ ხორცის ნაჭერი გვაჩვენეს, რომელიც ბაღიდან იყო გამოტანილი.
ინდმეწარმე ზურაბ მელიქაძე, რომელიც ოზურგეთში, ორ კვირაში ერთხელ, ყველა ბაღს ასპინძიდან ხორცით ამარაგებს, ამბობს, რომ ის თავის თავს არ შეუქმნის პრობლემას, რადგან თვითონაც შვილების მამაა.
_ მხოლოდ ოზურგეთს არ ვამარაგებ ხორცით _ ქუთაისშიც და ბათუმშიც ჩვენ მიგვაქვს ხორცი, ტენდერში გამარჯვებული ვართ. თუ პროდუქტი არ ვარგა, მაშინ რატომ აიღებთ, ხომ?! ჩვენ კარგი პროდუქცია მიგვაქვს ბაღებში. შესაბამისი ორგანოებისგან გვაქვს ცნობა, რომ სუფთა ხარისხის პროდუქტს ვაწარმოებთ, _ თქვა ზურაბ მელიქაძემ.
_ ბატონო ზურაბ, ხორცის ნაჭერი, რომელიც ვნახეთ, გაფუჭებულია.
_ მე არ ვიცი, ეს რა ხორცის ნაჭერია და საიდან აქვთ მოტანილი. არსებობს ცნობა, რომ ხორცი, რომელიც ბაღში მივიტანე, ვარგისიანია და შემდეგ რა მოხდა, არ ვიცი.
ვეტერინარული მოწმობა #132088 (ფორმა #2) ბაღების გაერთიანებაში მოგვაწოდეს. ეს ცნობა არ აღმოჩნდა #3 საბავშვო ბაღში. #3 ბაღის მენეჯერის, ნინო მშვიდობაძის თქმით, ფორმა #2 ბაღში არ მიდის.
ნინო მშვიდობაძე: _ ეს ფორმა ჩვენთან არ მოდის და ყოველთვის ბაღების გაერთიანებაში მიდის. მხოლოდ ახლა მოვიდა, როდესაც ახალი ხორცი შემოვიდა ჩვენთან.
_ ქალბატონო ნინო, ანუ მას შემდეგ, რაც მშობლებმა დაიწყეს იმის მოძიება, რომ ბაღში საეჭვო ხარისხის ხორცი შედიოდა?
_ ფორმა #2 იმ ხორცზე, რომელზეც მიდის დავა, ჩვენთან არ არის. როგორც გითხარით ბაღების გაერთიანებაში აქვთ, ახალი ხორცის ფორმა #2 კი ახლა დატოვეს ჩვენთან, _ გვითხრა ნინო მშვიდობაძემ.
მისივე თქმით, როდესაც ხორცის მომზადება დაიწყეს, მაშინ შენიშნეს, რომ რაღაც საეჭვო იყო.
_ როგორც კი ხორცი საეჭვოდ მოგვეჩვენა, დავუკავშირდით მაკა ჭყონიას, შემდეგ სურსათის და უვნებლობის სამსახურიდან მოვიდნენ. მათ გვითხრეს, რომ ეს იყო დაკვლის დროს კაპილარისგან მიყენებული ჩაქცევა, რომელიც საშიში არ არის. შემდეგ მოვიდნენ საზოგადოებრივი ჯანდაცვის ცენტრის წარმომადგენლებიც. ბაღში 160-ზე მეტი ბავშვი დადის და ვამაყობ, რომ ყოველთვის ვამოწმებთ ყველაფერს, რადგან ბავშვებს პრობლემა არ შეექმნათ. რამდენიმე ხნის უკან ასე მურაბა დავაბრუნეთ, რადგან კარგად არ ემჩნეოდა შენახვის თარიღი.
_ ხორცი როგორ მოხვდა მშობლების ხელში?
_ არ ვიცი. უბრალოდ, ის შემიძლია ვთქვა, რომ ერთ-ერთმა თანამშრომელმა გაიტანა ბაღიდან. ეს გაკეთდა იმის გამო, რომ გვინდოდა 100%-ით დავრწმუნებულიყავით ხორცის ვარგისიანობაში და სხვა განზრახვა არ გვქონია.
ოზურგეთის სკოლამდელი სააღმზრდელო-საგანმანათლებლო ცენტრის ხელმძღვანელი მაკა ჭყონია “გურია ნიუსთან” ამბობს, რომ სამი წელია, ის ამ ცენტრის ხელმძღვანელია და ყოველთვის ფაქიზად ეპყრობა ყველა საკითხს:
_ რა ხდება და საიდან მოტანილი ხორცია, ვერ გავიგეთ. როგორ შეიძლება ასე? ეს რა ხორცია და რამდენი დღისაა? სურსათის უვნებლობის სამსახური და საზოგადოებრივი ჯანდაცვის ცენტრის წარმომადგენლები უმალვე მივიყვანეთ, როგორც კი ეს ამბავი შეგვატყობინა ბაღის გამგემ. დაახლოებით 40 კგ. ხორცი შევიდა და ერთ ნაჭერში იყო რაღაც სისხლჩაქცევა. სამსახურის უვნებლობის სამსახურის წარმომადგენლის თქმით, ეს ხორცი ჯანმრთელობისთვის საზიანო არ იყო. ხორცი ბაღიდან არ უნდა გასულიყო. ახლა რა მოხდა _ ხორცის დამუშავების დროს გაუფუჭდათ საკეპი მანქანა, ამიტომ ხორცი წაიღეს ყასაბთან და იქ დაამუშავეს. არასწორმა გავრცელებულმა ინფორმაციამ გამოიწვია პანიკა და არ შეესაბამება ეს ყველაფერი სიმართლეს, _ გვითხრა მაკა ჭყონიამ.
და ბოლოს, “გურია ნიუსმა” მოიპოვა ოზურგეთის საზოგადოებრივი ჯანდაცვის ცენტრის დასკვნა, სადაც წერია: ” როგორც გაირკვა, #3 ბავშვთა ბაღის ბლოკში დაზიანებულია ხორცის საკეპი მანქანა, რის გამოც ბაღის მომსახურე პერსონალის მიერ 8 კილოგრამი ხორცი მიტანილი იქნა კერძო პიროვნებასთან გასატარებლად _ ფარშის დასამზადებლად.
ზემოთ აღნიშნული ფარში ბავშვთა ბაღის მოსამსახურე პერსონალის მიერ ისევ მოტანილი იქნა ბავშვთა ბაღის სამზარეულოში, სადაც მომზადდა გუფთა.
როგორც ბაღის სამზარეულოდან მიღებული ხორცის თვითნებური გამოტანა, ტრანსპორტირება და კერძო პირის მიერ დამუშავება, ასევე გამზადებული ფარშის შენახვა, წარმოადგენს საკვები პროდუქტების მომზადება-რეალიზაციის წესების უხეშ დარღვევას.”
საზოგადოებრივი ჯანდაცვის ცენტრის მიერ მომზადებულ დასკვნაში არ არის აღნიშნული, იყო თუ არა ბაღში შეტანილი ხორცი ვარგისიანი. როგორც “გურია ნიუსთან” რამდენიმე მშობელმა თქვა, მათ სურთ, დარწმუნებით იცოდნენ, მიეწოდებათ თუ არა პატარებს ვარგისიანი ხორცი.
