“მედალფა” ყოფილ პაციენტებს სასამართლოში უჩივის

ამ პაციენტთაგან ზოგიერთი სოციალურად დაუცველ ფენას განეკუთვნება. ერთ-ერთმა მათგანმა კი “გურია ნიუსს” დახმარებისთვის მიმართა.

მირანდა გოგიბერიძე: ვცხოვრობ აკაკი წერეთლის ქუჩაზე,  ერთი წლის წინ, 4 აპრილს,  გავიკეთე საკეისრო კვეთა,  5 დღეში უნდა გამოვსულიყავი საავადმყოფოდან,  სოციალური დახმარება კი დამენიშნა 26 აპრილს, არ მქონდა პოლისი, ნახევარი თანხა, 435 ლარი გადავიხადე და დარჩენილი იყო 535  ლარი. 5 დღის შემდეგ, საავადმყოფოდან რომ უნდა გამოვსულიყავი, იძულებული გავხდი ხელშეკრულებისთვის მომეწერა ხელი, რომ დანარჩენ თანხას გადავიხდიდი,  2 წლის ბავშვი მყავდა დატოვებული მეზობელთან, გამომიშვეს მას შემდეგ, როცა მოვაწერე ხელი ხელშეკრულებას. ახლა სასამართლოში მაქვს საქმე, მიჩივლა შპს “მედალფამ” რომ გადავიხადო ეს თანხა.  რით გადავიხადო, მითხარით, ვარ სოციალურად დაუცველი, არ ვიცი, რა მოხდება, ბავშვს ვერ წამართმევენ ნამდვილად. ასე მითხრეს საავადმყოფოში ექიმებმა, საშუალება თუ არ გქონდა, ქალბატონო, რას აჩენდი მეორე შვილსო. ეს ქვეყანაა?  ძალიან ცუდ დღეში ვართ, ჩემი მეუღლე უმუშევარია, ორი მცირეწლოვანი შვილი გვყავს. ამ დღეებში არის დანიშნული სასამართლო. მე რა დავაშავე, შვილის  გაჩენისთვის მსჯიან?  ასეთ დღეში მყოფმა ოჯახმა, როგორ უნდა დაფაროს ამხელა თანხა? ორი მცირეწლოვანი შვილით რომ გარეთ გამომაგდონ სახლიდან, ეს სამართალია?

ია მემარნიშვილი, იურისტი: ჩვენს სამსახურს დახმარებისათვის მომართა ქალბატონმა მირანდა გოგიბერიძემ. მას ბავშვს არ ატანდნენ სახლში, ამიტომ ჩვენმა  ადვოკატმა შუამდგომლობა გაუწია  კლინიკის დირექტორთან. დაწერა ხელწერილი, რომ ბავშვი გაეტანებინათ სახლში და დარჩენილ 535 ლარს გადაუხდიდა.  მაგრამ მოხდა ის, რომ უმუშევრებია ცოლქმარი, ეს ქალბატონი ორი მცირეწლოვანი შვილის  დედაა.  ვერ  იხდიან ამ თანხას, არანაირი შემოსავალი მათ არ აქვთ.  მინდა, გითხრათ, რომ ქალბატონ მირანდასნაირად  ჩვენ მოგვმართა 14-მა მოქალაქემ დასახმარებლად.

_ რა შეიძლება მოხდეს, თუ მოპასუხემ ვერ გადაიხადა სასმართლოს მიერ დაკისრებული ჯარიმა და ის თანხა, რაც ხელშეკრულებით აწერია?

_ მე მგონი, შეღავათს არც გაუწევენ. კანონით „მედალფა“ მართალია, მაგრამ კანონია თვითონ დანაშაულის მატარებელი.  შედეგი იქნება ის, რომ გადაუხდელობის შემთხვევაში, აღსრულება იძულებითი თუ იქნება. დაუყადაღებენ იმ ქონებას, სადაც ცხოვრობს, თუმცა მას არანაირი ქონება არ გააჩნია. მაშინ გააიტანენ  სახლს აუქციონზე  და აღმოჩნდება ეს ოჯახი გარეთ.

კანონი მორგებული აქვთ ჩინოვნიკებს, კერძო კომპანიებს. ეს კანონი უნდა იყოს მოქალაქეებზე გათვლილი, ამ ეტაპისთვის არ არის სოციალურად დაუცველთა პრობლემები გადაჭრილი. ჯერჯერობით, არ არის ეს ცვლილებები გახორციელებული. ეს ადამიანები ბავშვებს აჩენენ, პირიქით, ხელი უნდა შეუწყონ. ხდება კი ის, რომ საქართველოა ქვეყანა, სადაც ბავშვის გაჩენის გამო,  ქალი ისჯება.

შპს “მედალფას” გენერალური დირექტორის მოადგილე ლევან ანთაძე ამ საკითხთან დაკავშირებით კომენტარს აკეთებს:

_ ასეთი ფაქტები ძალიან ბევრია, ვუფორმებთ ძირითადად ხელშეკრულებებს, როცა თანხას ვერ იხდიან. მერე ჩვეულებრივ, იმ ვადაში  ხდება ანგარიშის გასწორება. ეს არის იურიდიული გზა, რომელიც ყველა ვარიანტში უნდა გაიარო. ასეთ შემთხვევაში, ეს გვიჯდება შემოსავალში არა იმით, რაც გადაიხადა, არამედ სრულად. რაც შეეხება სოციალურად შეჭირვებულებს,  ჩვენ არ ვართ სოციალური სამსახური, “მედალფა” არის სამედიცინო ცენტრი.  ჩვენს თავზე ვერ ავიღებთ სოციალური საკითხების გადაჭრას. ყველა შემთხვევაში იურისტი ჩვენს პოზიციას დაიცავს. ეს აუღებელი თანხა არის დაბეგრილი სახელმწიფოს მიერ. არცერთ დირექტორს ამ დაწესებულებისა, მათ შორის გენერალურ დირექტორსაც, არ აქვს იმის უფლება და საშუალება, რომ ვიღაცას აჩუქოს ეს თანხა. ჩვენ ვერავის ვერ ვაჩუქებთ თანხას. ჩვენ მივდივართ შეღავათებზე. აქედან ყალიბდება მედპერსონალის ხელფასიც. ამ თანხების ჩამოწერა და წაღება ჩვენ არ შეგვიძლია.