2010 წლის 21 ნოემბერს, საერო აკადემიის ჩოხატაურის რაიონული ორგანიზაცია “ფაზისის” აკადემიის ნამდვილ წევრებსა და გულშემატკივრებს მასპინძლობდა. გურიის რეგიონალური ორგანიზაცია, “ფაზისის” საერო აკადემიის სამეცნიერო საბჭოს მიერ, 2010 წლის მაისში ჩამოყალიბდა, რომლის კოორდინატორად აირჩიეს საქართველოს კულტურის დამსახურებული მოღვაწე, ღირსების ორდენოსანი, “ფაზისის” აკადემიის ნამდვილი წევრი რევაზ თედორაძე.
რეგიონული ორგანიზაციის ჩამოყალიბების შემდეგ შეიქმნა გურიის რაიონული ორგანიზაციები. ჩოხატაურის რაიონული ორგანიზაციის თავმჯდომარედ არჩეულ იქნა ჩოხატაურის ყოვლადწმიდა ღვთისმშობლის სახელობის სამრევლო სკოლის სასწავლო ნაწილის გამგე ალეკო კვინტრაძე, კოორდინატორად _ “ფაზისის” საერო აკადემიის ნამდვილი წევრი, ხიდისთავის საჯარო სკოლის დირექტორი, ტექნიკის მეცნიერებათა დოქტორი იოსებ მეგრელიძე; ოზურგეთის რაიონული ორგანიზაციის ხელმძღვანელად _ “ფაზისის” საერო აკადემიის ნამდვილი წევრი, გაზეთ “ალიონის” რედაქტორი ნუგზარ ასათიანი, კოორდინატორად _ ოზურგეთის ისტორიული მუზეუმის ფონდების მთავარი შემნახველი მანანა ლომაძე; ლანჩხუთის რაიონული ორგანიზაციის თავმჯდომარედ კი “ფაზისის” საერო აკადემიის ნამდვილი წევრი, ლანჩხუთის კულტურის ცენტრის დირექტორი სოფო ჭელიძე, კოორდინატორად _ ნინო მგელაძე. “ფაზისის” საერო აკადემიის მიმართულება კოლხური ცივილიზაციის კვლევა და პროპაგანდაა. აღსანიშნავია, რომ მასში ჩართულია მეცნიერთა დიდი ნაწილი, რომელსაც კოორდინაციას უწევს აკადემიის პრეზიდიუმი (პრეზიდენტი _ ნუგზარ ნადარაია).
_ აკადემია უდიდეს როლს ასრულებს ქართველი ხალხის საზოგადოებრივი აზროვნების ფორმირებაში, ეროვნული ინტერესების დაცვასა და ქრისტიანული რწმენის განმტკიცებაში. წარსულის კვლევის პარალელურად, “ფაზისის” აკადემია აქტიურად მონაწილეობს ქვეყნის საზოგადოებრივ ცხოვრებაში, ამაზე მოწმობს სამეცნიერო კონფერენციები და აკადემიის მიერ საზოგადოებრივ პრობლემებზე გამართული სხვადასხვა ღონისძიებები. ამათგან ერთ-ერთია “ფაზისის” საერო აკადემიის ჩოხატაურის ორგანიზაციისა და ჩოხატაურის სამუზეუმო გაერთიანების (დირექტორი ნ. კალანდაძე) მიერ ერთობლივად მომზადებული სამეცნიერო სესია თემაზე “მთაწმინდის პანთეონის ჩოხატაურელი ბინადარნი, _ ამბობს სესიის ორგანიზატორი რევაზ თედორაძე.
სესიას წინ უსწრებდა ორგანიზაციის მიერ ჩატარებული საინტერესო კულტურული ღონისძიებები. სესიის დაწყებამდე საერო აკადემიის წევრები შეხვდნენ ჩოხატაურის ნიკო ბერძენიშვილის სახელობის მხარეთმცოდნეობის მუზეუმის თანამშრომლებს. სტუმრები აღფრთოვანებული დარჩნენ მუზეუმში წარმოდგენილი უძველესი ექსპონატებით, რაც მუზეუმის ჩანაწერთა წიგნშიც აღნიშნეს. მხარეთმცოდნეობის მუზეუმის დათვალიერების შემდეგ, ხიდისთავს ესტუმრნენ და ნოდარ დუმბაძის სახლ-მუზეუმი მოინახულეს, რომელსაც “ფაზისის” აკადემიის ნამდვილმა წევრმა ბორის პაპასქუამ მის მიერ შექმნილი “არგოს” მაკეტი გადასცა საჩუქრად. ხიდისთავიდან წამოსულმა სტუმრებმა, ჩოხატაურელ მასპინძლებთან ერთად, დაბის ცენტრში, ნოდარ დუმბაძის სკვერში მდებარე მწერლის ბიუსტი ცოცხალი ყვავილებით შეამკეს.
შემდეგ კი ჩოხატაურის სამრევლო სკოლაში გაიმართა სამეცნიერო სესია დღის წესრიგით: 1) სილიბისტრო თოდრია _ მომხსენებელი რევაზ თედორაძე. 2) ნიკო ბერძენიშვილი _ მომხსენებელი ვასილ ხაჟალია; 3) ანა კალანდაძე _ მომხსენებლები ლიანა თოდუა, ალეკო კვინტრაძე; ნოდარ დუმბაძე ჴ მომხსენებელი ნათია კალანდაძე. შემდეგი საკითხი მიეძღვნა ჭოლა ლომთათიძის 150-ე წლისთავს _ მომხსენებელი იოსებ მეგრელიძე.
სამეცნიერო სესიაში მონაწილეობა მიიღეს დელეგაციებმა თბილისიდან, ოზურგეთიდან, მარტვილიდან, ფოთიდან. რევაზ თედორაძემ მადლობა გადაუხადა სტუმრებს და კონფერენციაზე დამსწრე საზოგადოებას მობრძანებისა და ღონისძიებაში მონაწილეობის მიღებისთვის.
სამეცნიერო კონფერენციაზე სიტყვით გამოვიდა “ფაზისის” საერო აკადემიის პრეზიდენტი, აკადემიკოსი ნუგზარ ნადარაია. სესიაზე სიტყვით გამოვიდნენ პროფესორი გურამ გუნია, მედიცინის დოქტორი სოკრატ სალუქვაძე, პროფესორი იური სიხარულიძე, ჯუმბერ ლეჟავა.
სამეცნიერო სესიის დასრულების შემდეგ, ჩოხატაურის სამრევლო და ჩაისუბნის საჯარო სკოლების მოსწავლეებმა: ია ვაჩეიშვილმა, ლილე კვინტრაძემ, გვანცა ჟღენტმა და ლაშა კოროშინაძემ წაიკითხეს ანა კალანდაძისა და ნოდარ დუმბაძის ლექსები. ქალთა ანსამბლმა “მანდილი” შეასრულა ანა კალანდაძისა და ნოდარ დუმბაძის ლექსებზე შექმნილი სიმღერები. სამრევლო სკოლის მოსწავლეებმა აღნიშნულ ღონისძიებას მიუძღვნეს თავიანთი ნამუშევრების გამოფენა სახელწოდებით “შემოდგომა კოლხეთში”.
