დღის წესრიგით გათვალისწინებული ათი და დამატებითი ხუთი საკითხი ოზურგეთის მუნიციპალიტეტის საკრებულომ, გასული კვირის ოთხშაბათს გამართულ მორიგ სხდომაზე განიხილა.
დეპუტატებმა ოზურგეთის მუნიციპალიტეტის ქონების საჯარო აუქციონის ფორმით განკარგვის და სარგებლობის უფლებით გადაცემის შესახებ დებულება დაამტკიცეს. ასევე, მხარი დაუჭირეს ოზურგეთის მუნიციპალიტეტის ქონების პრივატიზებისას საჯარო აუქციონში გამარჯვების დამადასტურებელი ოქმის ტიპიური ფორმის დამტკიცებას.
საკრებულოს წევრებმა, მათივე დამტკიცებულ 2010 წლის 4 აგვისტოს “ოზურგეთის მუნიციპალიტეტის გამგეობის ეკონომიკის, ინფრასტრუქტურისა და საინვესტიციო გარემოს განვითარების სამსახურის დებულების” #14 დადგენილებაში ცვლილებები შეიტანეს, ისევე როგორც 2007 წლის 21 დეკემბერს #107 დადგენილებაში “სათამაშო ბიზნესის მოსაკრებლის შემოღების შესახებ”; ცვლილების მიხედვით, თითოეულ სათამაშო აპარატზე გადასახადი კვარტალში 1500 ლარით განისაზღვრა, ტოტალიზატორის, ბინგოს, ლოტოს თითოეულ სალაროზე კი _ 3750 ლარით; წამახალისებელ გათამაშებაზე მოგებული საპრიზო ფონდი 10 %-ით დაიბეგრება, სისტემურ-ელექტრონული ფორმის თამაშობებზე კი ყოველ კვარტალში მეწარმეს 12000 ლარის გადახდა მოუწევს.
დეპუტატების გადაწყვეტილებით, გამგეობის რწმუნებულები ვალდებულნი გახდებიან პერიოდულად, დადგენილი ფორმით, გამგებელს წარუდგინონ ინფორმაცია ადმინისტრაციული ერთეულის შესახებ.
მუნიციპალიტეტის საკრებულოს 2010 წლის 12 ნოემბრის #41 დადგენილებიდან გამომდინარე, სახელმწიფო შესყიდვების გეგმაში ცვლილებები შეიტანეს, კონკრეტულად კი გამგეობის ადგილობრივი ტელეფონით მომსახურების ხარჯი 4000 ლარით გაიზარდა, გამგეობის პრესა-მედიის ხარჯი ჴ 2000 ლარით, მცირეფასიანი ინვენტარის შეძენის ხარჯი _ 3100 ლარით, ხოლო ტრანსპორტის რემონტის ხარჯი _ 1500 ლარით. ასევე 4000 ლარით გაიზარდა საკრებულოს პრესა-მედიის ხარჯი, ადგილობრივი ტელეფონებით მომსახურება _ 4000 ლარით. გეგმაში შეიტანეს ცვლილებები აუდიტის მომსახურების ხარჯისთვის _ 2000 ლარი. საკანცელარიო საქონლის შესყიდვაში გაწეული ეკონომიის ხარჯზე, მუნიციპალიტეტის საკრებულოს, გამგეობის და მისი სამსახურებისთვის 200 შეკვრა საასლე ქაღალდის შესყიდვა იგეგმება, რომლის სავარაუდო ღირებულებაა 1500 ლარი. ასევე გეგმაში შეიტანეს მუნიციპალიტეტის ბალანსზე არსებული საბავშვო ბაღების ქონების შეფასებისთვის შეტანილი აუდიტის მომსახურების ხარჯი _ 13 500 ლარი. გამგეობის სამსახურებისთვის ასლგადამღები აპარატის 4 კარტრიჯს შეიძენენ, თითოეულის ღირებულება 115 ლარით განისაზღვრა, რაც ჯამში 460 ლარს შეადგენს. ასევე გამოიყოფა 1500 ლარი პოლიციის სამმართველოს მიერ გადმოცემული ქონების ტრანსპორტირებისა და დატვირთვა-გაცლის ხარჯებისთვის.
ძირითადი საკითხების განხილვა-დამტკიცების შემდეგ, ოპოზიციონერმა დეპუტატებმა თემურ სალუქვაძემ და ლელა ნაცვალაძემ დეპუტატების უფლებამოსილების გახორციელების მიზნით, დაფინანსების გაზრდა მოითხოვეს.
“ვფიქრობ, რომ ფინანსური დაკნინება დეპუტატისთვის კარგი არ არის. დეპუტატის მანდატი დიდი პასუხიმგებლობაა. ვფიქრობ, თუ ადამიანი ამ მანდატს პასუხისმგებლობით ატარებს, კვირაში, სულ მცირე, ერთხელ მაინც უნდა შემოუაროს სოფელს. ეს აყენებს დღის წესრიგში საკითხს, რომ დეპუტატების უფლებამოსილების გახორციელებისთვის ფინანსები გაიზარდოს. უხერხულია, როცა დეპუტატს უფლებამოსილების გახორციელებისთვის თანხის სესხება უწევს”, _ აღნიშნა თემურ სალუქვაძემ.
“ფინანსთა სამინისტროს უნდა მივმართოთ და შეიძლება ამ მიმართულებით რაღაც ძვრები იყოს”, _ თქვა საკრებულოს თავმჯდომარის მოადგილემ ავთანდილ მექვაბიშვილმა.
“დაახლოებით 43 ათასამდე შევამცირეთ ადმინისტრაციული ხარჯები. პირველი იმპერატიული მოთხოვნაა, დეპუტატი შეხვდეს ამომრჩევლებს, დაესწროს სხდომებს. მესმის, რომ 125 ლარის ღირებულების სატელეფონო ბარათი და 20 ლიტრი საწვავი არ ჯდება არანაირ ჩარჩოში,” _ აღნიშნა საკრებულოს თავმჯდომარემ ალეკო მამეშვილმა.
“გეთანხმებით, რომ თუ მეტი ექნებათ ანაზღაურება, უკეთ განახორციელებენ თავიანთ უფლებამოსილებას, მაგრამ ამისთვის ხომ უნდა გვქონდეს ხარჯები?!” _ იკითხა მექვაბიშვილმა.
“გამგეობის სტრუქტურა და მისი ხარჯები იზრდება და ისე ნუ იზამთ, მხოლოდ საკრებულომ შემოიჭიროთ ქამრები. ლობისტი ჰყავს თითოეულ ორგანიზაციას, რომლის მიხედვითაც იზრდება მათი დაფინანსება,” _ განაცხადა ლელა ნაცვალაძემ. მექვაბიშვილმა ნაცვალაძეს ლობისტების დაკონკრეტება მოსთხოვა.
“ჩემზე უკეთ იცით, ვის კაბინეტშიც იწერება ეს ბიუჯეტი,” _ შეეპასუხა ნაცვალაძე.
დისკუსია მოჰყვა 2011 წლის ბიუჯეტის პროექტის დასკვნას, რომლის საფუძველზეც საკრებულომ გამგეობას მომავალი წლის მთავარი ფინანსური დოკუმენტი უკან მიუბრუნა.
თემურ სალუქვაძის თქმით, ახალარჩეული საკრებულო ბიუჯეტის დამტკიცებაში პირველად მონაწილეობს და ახლა გამოჩნდება, როგორ მუშაობენ: “ფაქტობრივად, კომისიებში რაც ვიმუშავეთ, გამგეობას წარვუდგინეთ, თუმცა ქალაქის განაშენიანების გეგმაზე არც თანხა არის გამოყოფილი და არც შენიშვნებშია ამ მიმართულებით რაიმე ნათქვამი. ბევრი თანხებია ისეთი მიმართულებებით გათვალისწინებული და გამოყოფილი, რომელიც არ უნდა იყოს იმ მიზეზით, რომ ეს საქმიანობები არ წარმოადგენენ საკრებულოსა და თვითმმართველობის ფუნქციებს”, _ დასძინა სალუქვაძემ.
“თეატრი არ შეიძლება სახელმწიფოს კმაყოფაზე იყოს _ იზრუნონ საკუთარ შემოსავლებზე, მოგვხიბლონ, შემოგვთავაზონ სიახლე, დადგან ახალი სპექტაკლები და მივალთ,” _ მოსაზრება გამოთქვა სოფელ ჭანიეთის მაჟორიტარმა ავთანდილ სურგულაძემ.
“კულტურა, ცეკვა, თამაში ძალიან კარგია, მაგრამ, როცა სოციალურად დაუცველი ადამიანი მოგაკითხავს და 10 ლარს ვერ მისცემ, არამართებულად მიმაჩნია”, _ თქვა ანსამბლ “გურიას” დაფინანსებაზე საუბრისას დეპუტატმა ლელა ნაცვალაძემ.
ალეკო მამეშვილს მიზანშეწონილად მიაჩნია ანსამბლ “გურიას” იგივე დაფინანსება დარჩეს, რაც 2010 წელს.
ავთანდილ მექვაბიშვილმა საკრებულოს წევრებს წინადადება შესთავაზა, დაწვრილებით მოითხოვონ ინფრასტრუქტურის განვითარებაზე 1 მილიონ 700 ათასი ლარის ხარჯვა.
“არავინ გვავალდებულებს საკრებულოს, 10 დეკემბერს შემოტანილ ბიუჯეტს, თუ იგი მიუღებელი იქნება, მხარი დავუჭიროთ. დეპუტატებს, ფრაქციებს და კომისიებს შეუძლიათ, ალტერნატიული ბიუჯეტი წარმოადგინონ, მუშაობს ამ მიმართულებით ვინმე?”, _ ამგვარი შეკითხვა დაუსვა საკრებულოს თავმჯდომარის მოადგილემ საკრებულოს წევრებს და დასძინა, რომ მათ შეუძლიათ იმ ბიუჯეტს დაუჭირონ მხარი, რომელსაც დეპუტატები წარმოადგენენ.
ალეკო მამეშვილიც არ გამორიცხავს, რომ შესაძლებელია ალტერნატიული ბიუჯეტის შემუშავება და მიღება.
“გურია ნიუსთან” საუბარში ავთანდილ მექვაბიშვილი ამბობს: _ წინადადება დავაყენე, როდესაც საბიუჯეტო კომისიის თავმჯდომარე, ბატონი კობა ხაბალაშვილი ტრიბუნასთან იდგა. ჰყვებოდა იმ მიზეზებს, თუ რატომ დაბრუნდა უკან ბიუჯეტი. მე დამატებით მოვითხოვე ყველა იმ ინფრასტრუქტურულ სამუშაოზე გათვლა, რადგან უზარმაზარ თანხებზეა საუბარი… მესმის, რომ პრიორიტეტების დოკუმენტში ჩაწერილია რამდენიმე ინფრასტრუქტურის სამუშაო, მაგრამ საკმაოდ ზოგადი დოკუმენტია, არ არის კონკრეტული. მაინტერესებს, როგორც დეპუტატს, რა ღონისძიებებია დაგეგმილი იმ თანხებით, რაც ინფრასტრუქტურის განვითარებისთვისაა განკუთვნილი, რათა უკეთესად ვიფიქროთ ამ სამუშაოების მონიტორინგზე, მაგრამ, იქნებ საკრებულოს აქვს წინადადება, რაიმე მიმართულებით ინფრასტრუქტურის სამუშაოს ჩასატარებლად?! შეიძლება, საკრებულო ხედავს პრობლემას, რომელშიც აუცილებელია, საბიუჯეტო სახსრები ჩაიდოს და მოწესრიგდეს ესა თუ ის ინფრასტრუქტურული მიმართულება, რაც, შეიძლება, ამ თანხებით არ არის გათვალისწინებული?! ჩვენ პრიორიტეტების დოკუმენტზეც მივეცით შენიშვნა გამგეობას. რომ ეს დოკუმენტი ძალიან ზოგადია. ჩვენ ვითხოვთ, ინფრასტრუქტურის ხარჯები დეტალიზებული იყოს _ მიმაჩნია, როგორც დეპუტატს, ამ მოთხოვნის უფლება მაქვს. პრიორიტეტზე უნდა იმუშაო, პრიორიტეტი უნდა დასახო და ამ მიმართულებით განახორციელო დაგეგმილი აქტივობები, _ თქვა მექვაბიშვილმა.
