მსოფლიოს წამყვანი ეკონომიკური გამოცემების ინფორმაციით, ნავთობის ფასების მუდმივი მატების შემდეგ, ციფრები საგანგაშო ზღვარს ასცდა და ქართულ ფასებზე აისახა _ საქართველოში საწვავი ისევ 5 თეთრით გაძვირდა. მანამ კი, მხოლოდ იანვარში, საწვავის ფასი სამჯერ გაიზარდა. ფასების მატება რამდენჯერმე თებერვალშიც აღინიშნა.
ავტომფლობელების აზრით, ნავთობის იმპორტიორებს 30-თეთრიან მოგება აქვთ და ეს საკითხი სერიოზული განხილვის თემა უნდა გახდეს სახელისუფლებო ეშელონებში: “ხომ არ შეიძლება, ფასები ყოველკვირა გაიზარდოს?!” _ ამბობენ ისინი და არ გამორიცხავენ, რომ ამ ყველაფერს, შესაძლოა, მომხმარებლების მხრიდან მასშტაბური პროტესტი მოჰყვეს.
სოციალურ ქსელებში უკვე გაჩნდა მოწოდება, რომლის მიხედვითაც, საპროტესტო აქციები გაიმართება. აქციის ორგანიზატორები მიიჩნევენ, რომ ფასების მატება არაჯანსაღ კონკურენციას და მონოპოლიების შექმნას უკავშირდება.
ნავთობპროდუქტების იმპორტიორთა კავშირში კომპანიების 30-თეთრიანი მოგებას გამორიცხავენ. კავშირის თავმჯდომარე ვანო მთვრალაშვილი ამბობს, რომ გათვლები ზუსტი არ არის, რადგან ყველა ფაქტორს არ ითვალისწინებს. მისი თქმით, ნავთობპროდუქტების კომპანიების ფინანსებს სპეციფიკური გათვლები სჭირდება.
ენერგორესურსებს და ფასების სტაბილიზაციას, ამ მიმართულებით, პრეზიდენტი სააკაშვილი, პარლამენტში გამოსვლისას შეეხო. მან ნავთობგადამამუშავებელი ქარხნის მშენებლობის პროექტზეც ისაუბრა, რომელსაც, მისი თქმით, საქართველო უცხოელ პარტნიორებთან ერთად ახორციელებს. პრეზიდენტის განცხადებით, ამ ქარხნის აგება საწვავის ფასებს დაარეგულირებს და გააძლიერებს ქვეყნის ენერგეტიკულ უსაფრთხოებას. პრეზიდენტი, მოსახლეობას ფასთა რეგულაციას, შორეულ პერსპექტივაში იმედოვნებს, მას შემდეგ, რაც საქართველო თავად გახდება ნავთობპროდუქტების მწარმოებელი. თუმცა, არაფერი უთქვამს ფასების ყოველკვირეულ ზრდაზე, მაშინ, როცა სხვა პოსტსაბჭოთა ქვეყნებში, მაგალითად უკრაინაში, მონოპოლისტების წინააღმდეგ, სადამსჯელო ღონისძიებებსაც არ ერიდებიან: უკრაინის ენერგეტიკის სამინისტრომ კერძო კომპანიების მიერ საწვავის გაძვირება უსაფუძვლოდ მიიჩნია და ფიქრობს, რომ კომპანიები ბოლო პერიოდამდე ნავთობპროდუქტების არსებულ მარაგებს ყიდიან, რომელიც აქციზის გაზრდამდე შეიძინეს. ამიტომ ნავთობის ბიზნესის რამდენიმე მსხვილი მოთამაშის მიმართ გამოძიება დაიწყება. ამასთან, კომპანიებს მოუწოდებენ, არ გავიდნენ საფასო დერეფნიდან, რომელიც მინისტრთა კაბინეტთან არსებულმა ჯგუფმა დაადგინა.
მოჰყვება თუ არა მომხმარებელთა პროტესტს რაიმე შედეგი, ამის თქმა წინასწარ რთულია. ენერგორესურსების პარალელურად, ფასები სხვა პროდუქტებსაც ემატება, ამაზე ექსპერტი ეკონომიკის საკითხებში, გია ხუხაშვილი საუბრობს: _ ენერგომატარებლებზე ფასების ზრდა ჯაჭვურად იწვევს, სხვა ნებისმიერ პროდუქტზე ფასების ზრდას, გამომდინარე იქედან, რომ ნებისმიერი პროდუქტის წარმოებაში ენერგოკომპონენტი მონაწილეობს, _ ამბობს ხუხაშვილი.
