ამ ბოლო დროს, ცენტრალური გაზეთები აჭრელდა შემზარავი ცნობებით იმის შესახებ, რომ მოსალოდნელ გლობალურ დათბობას (მთელ პლანეტაზე ტემპერატურის მომატებას 1 გრადუსით) მოყვება ყინულის მარაგის დადნობა, რაც გამოიწვევს, ლამის, მთელი დედამიწის დატბორვას, ხშირად ჩამოთვლილია ის ქვეყნები, რომლებსაც ემუქრება წყალქვეშ მოყოლა.
ასეთი სახის ინფორმაციის გავრცელება, ალბათ, მიზნად ისახავს ამ მშიერ-მწყურვალი ხალხის დაშინებას და ყურადღების გადატანას გამოგონილ მოსალოდნელ უბედურებაზე _ რა დროს “მიშა, გადადექის” ყვირილია, მალე მთელი ქვეყანა თავზე დაგვექცევა, მაძღარი დავიღუპებით თუ მშიერი, რა მნიშვნელობა ექნებაო.
ე.წ. გლობალურ დათბობას ატმოსფეროში ნახშირორჟანგის შემცველობის მომატება იწვევს. მისი ნორმა ატმოსფეროს 0,0316 პროცენტია. ამ სიდიდის მატება ხდება კაცობრიობის მიერ სხვადასხვა სახის საწვავის ხარჯვის შედეგად. როგორც დადგინდა, ამაში ყველაზე დიდი წვლილი მიუძღვით ზესახელმწიფოებს და მით განვითარებულ მრეწველობას.
ახლა ყინულის დნობასა და მოსალოდნელი დატბორვის შესახებ: დედამიწაზე ყველაზე დიდი მოცულობის ყინული ანტარქტიდაზე დევს, რომლის ფართობი, მეჩეჩებიანად, შეადგენს თექვსმეტ მილიონ კვადრატულ კილომეტრს. აქ წელიწადი შედგება ერთი დღე-ღამისგან _ ექვს თვის განმავლობაში დღეა, მეორე ექვსი თვის განმავლობაში კი _ ღამე. პირობითად, აქ დღე ზაფხულად ითვლება, ღამე ჴ ზამთრად. დღის ანუ ზაფხულის საშუალო ტემპერატურა მინუს 20-40 გრადუსია. ღამისა, ანუ ზამთრის _ მინუს 60-70 გრადუსი. ახლა ვეკითხები იმ ჟურნალისტებს დედამიწის დატბორვას რომ წინასწარმეტყველებენ: ტემპერატურამ რომ ამ ყინულის სამეფოში 1 გრადუსით მოიმატოს და 70 გრადუსის ნაცვლად 69 გახდეს, იქ თუნდაც ერთი გრამი ყინული იქცევა წყლად? მეორე ყინულის სამყარო დედამიწაზე კუნძული გრენლანდიაა, სადაც ყინულის მარაგი შეადგენს 2 600 000 კუბურ კილომეტრს. აქ ყინულის მატება-შემცირების პროცესი მუდმივად მიმდინარეობს. ყინულის მასები ჩამოცურდება კუნძულის მთებიდან და ჩადის ოკეანეში. ეს არის ე.წ. აისბერგები. წელიწადში 15 ათასამდე ასეთი აისბერგი ხვდება ოკეანეში და ისინი სხვადასხვა ზომის არიან. ცნობილია აისბერგი, რომლის სიგრძე 300 კილომეტრი იყო. ეს პროცესი ასე დააწესა უფალმა და ასე გაგრძელდება მუდამ, იგი კაცობრიობას არ ემუქრება.
მოსაზრებები დატბორვის შესახებ ისეთივე ბლეფია, როგორც ის, რომ 19 მარტს, დედამიწაზე უბედურება უნდა მოეტანა მთვარის მოახლოებას. დედამიწის მასა მთვარის მასაზე 50-ჯერ მეტია, მათ შორის საშუალო მანძილი შეადგენს 384 000 კილომეტრს. მთვარე დედამიწას 20 000 კილომეტრით ხშირად უახლოვდება, 18 წელიწადში ერთხელ კი უფრო მეტითაც. მერე ისევ შორდება მას და ა.შ. ესეც ჩვეულებრივი ამბავია და საგანგაშო არაფერი არ არის.
რაც შეეხება დედამიწის ღერძის გადახრას, აქ, 11 გრადუსი და 11 სანტიმეტრი აერიათ ერთმანეთში _ დედამიწა მართლაც გადაიხარა, მაგრამ არა 11 გრადუსით, არამედ 11 სანტიმეტრით. დედამიწის ღერძი მუდმივად მთრთოლავ მდგომარეობაშია და სხვადასხვა მხარეს ირხევა. მისი რხევის ამპლიტუდა 30 სმ-მდეა და ეს აბსოლუტური ნორმაა. დედამიწის ღერძის დახრილობა მისი ორბიტისადმი შეადგენს 23 გრადუსს. ეს სიდიდე მუდმივი და უცვლელია, მასზეა დამოკიდებული დღისა და ღამის ხანგრძლივობის ცვალებადობა წლის განმავლობაში.
ასე რომ, სამყაროში ყველაფერი რიგზეა და ასე იქნება მუდამ!
ანზორ დოლიძე, მშენებელ-ინჟინერი, ქალაქი ოზურგეთი
