ატმის დაავადების ბევრი სახეობა არსებობს, მაგრამ ყველაზე უფრო გავრცელებულია ატმის ფოთლის სიხუჭუჭე, რომელსაც გაზაფხულიდანვე ვხვდებით. დახუჭუჭებული შეიძლება იყოს ერთეული ფოთოლი ან ყველა ფოთოლი. დახუჭუჭება ხდება მსხვილტალღოვნად. ფოთლის დატალღული ფირფიტა უფრო გასქელებულია და მტვრევადი, ვიდრე საღი ნაწილი. დაავადებული ფოთოლი სამი კვირის შემდეგ ძირს ცვივა.
ყლორტის დაავადების შემთხვევაში, ყლორტი დაავადებულია კვირტიდან გამოსვლისთანავე, ნელა იზრდება და მოკლე რჩება. მუხლთშორისები შემოკლებულია და თითქოს ერთმანეთზე სხედან. ყლორტები რამდენიმე ხანს ცოცხლობენ, შემდეგ ცვივა ფოთლები და ხმება ყლორტები. დაავადების გამომწვევი სოკო ზამთარს ატარებს ჩამოცვენილ ფოთლებზე. გაზაფხულზე ასკოსპორები იკვირტებიან, 5-8 კვირტს იკეთებს, შეუძლიათ გაღვივდნენ და ინფექცია მოახდინონ. სოკოს შეუძლია გადაიზამთროს კვირტის ქერქებში. გაზაფხულზე, კვირტიდან ყლორტის განვითარებასთან ერთად, აინფექცირებს ყლორტს და ავადმყოფობა მიმდინარეობს, რის გამოც ნაყოფი დეფორმირდება; ნაწილი ზედ რჩება, ნაწილი კი ცვივა ძირს. დაავადება, უმეტესად, ყვავილობის პერიოდში აქტიურდება _ ასკოსპორის კვირტებიდან შექმნილი ზრდის მილი იჭრება ყვავილის ბუტკოში, ნასკვში აწარმოებს განვითარებას და გვაძლევს დეფორმირებულ ნაყოფს.
ბრძოლის ღონისძიებანი: უნდა ვებრძოლოთ იმ ადგილებში, სადაც სოკო ზამთრობს; ამიტომ, ჩამოცვენილი ფოთლები უნდა გავანადგუროთ, ხმელი ტოტები უნდა შევაჭრათ, დავწვათ, ნიადაგი უნდა დავამუშაოთ. ეს მექანიკური ღონისძიებაა. კვირტში ინფექციის წინააღმდეგ გამოიყენება პრეპარატები _ ბორდოს სითხეს ასხურებენ კვირტების დაბერვის პერიოდში, ამას “ცისფერ წამლობას” უწოდებენ; მეორე წამლობას ატარებენ როცა დაყვავილება დასრულდება. მესამე წამლობა უნდა ჩავატაროთ როცა ატმის ნაყოფი ნუშის სიმსხონი არიან. მეოთხე წამლობა კი, როცა ნაყოფი ატმის ნახევარს გასცდება. წამლობა შეიძლება ჩავატაროთ ბორდოს სითხით, ასევე ქიმიური პრეპარატებით. რჩევისთვის შეგიძლიათ დაგვიკავშირდეთ.
ლია სიხარულიძე, მცენარეთა დაცვის სპეციალისტი
