საერთაშორისო ბაზარზე ნავთობის ფასმა დაიკლო, თუმცა, ამას საქართველოში საწვავის ფასზე, როგორც ყოველთვის, არანაირი გავლენა არ მოუხდენია.
_ როგორც კი გავიგებთ, რომ საწვავის ფასმა იმატა საერთაშორისო ბაზარზე, ჩვენთანაც იმავე დღეს იმატებს ფასები. როგორ ახერხებენ ასე შესაშურ ოპერატიულობას, არ ვიცით. კლების შესახებ კი ინფორმაცია მხოლოდ ინფორმაციად რჩება. დღესაც ტელევიზიით გამოაცხადეს, რომ დაიკლებს ნავთოპროდუქტების ღირებულება, მაგრამ არ გვჯერა, რომ საწვავი გაიაფდება. მასეთი რამ ასეთ დროს, როცა კარს ხვნა-თესვაა მომდგარი, ჯერ არ მომხდარა. სამი წლის უკან რომ დაიწყო ფასის მატება, დღემდე იზრდება. ჯერ ჩვენთვის, მომხმარებლებისთვის, საწვავი არ გაიაფებულა, _ გვითხრეს ოზურგეთელმა ტაქსის მძღოლებმა.
ბენზინთან შედარებით, 5 თეთრით ძვირია დიზელის საწვავი. როგორც გვითხრეს, ეს დიზელზე მოთხოვნის გაზრდასთან არის დაკავშირებული.
კერძო ბენზინგასამართ სადგურის შპს “ნრდ ექსპრესის” ერთ-ერთი მეპატრონე ლელა დარჩია:
_ დიდი ხანი არ არის, რაც ამ ბიზნესში ვარ, მაგრამ ნამდვილად ვიცი, რომ ბენზინის ფასის დაკლება ნაკლებად სარწმუნო ინფორმაციაა. მესმის, მომხმარებელს უჭირს საწვავის შეძენა სიძვირის გამო, მაგრამ საერთაშორისო ბაზარზე ნავთობის ფასების კლება არ ნიშნავს, რომ ჩვენთანაც გაიაფდება. ჩვენ წამყვანი ფირმებისგან ვიძენთ საწვავს, მათ კი, ძირითადად, აზერბაიჯანიდან შემოაქვთ ნავთოპროდუქტები. ფასების რეგულირებაც, შესაბამისად, ამ ფირმებზე და ხელისუფლებაზე არის დამოკიდებული.
ბაზარი წამყვანი ფირმების _ “სოკარის”, “რომპეტროლის”, “ვისოლის” და “ლუკოილის” არის, ფასების რეგულირებაც მათ შეუძლიათ. ჩვენნაირი პატარა საწარმოები ისეთ პირობებში არიან, მალე დაიხურებიან. თუ ასე გაგრძელდა, პირადად ჩემი მცირე საწარმო სექტემბრამდე ვერ მიაღწევს. დარჩება მხოლოდ მსხვილი კომპანიები, რადგან ხელისუფლება მცირე მეწარმეების ხელშეწყობისთვის არაფერს აკეთებს _ ჩვეულებრივად ვიხდით ყველა დაწესებულ გადასახადს, ჩვენთვის არ არსებობს არანაირი შეღავათი, არ არის დაბალპროცენტიანი სესხები, არ გვაქვს იმის პირობები, რომ ვიარსებოთ, ჩვენი უფლებები არ არის დაცული. თუ ასე გაგრძელდა, ვშიშობ, რომ პურის ფულის გარეშე დავრჩები.
