(გურია ნიუსი, ლანჩხუთი) _ შაბათს, საღამოს, რიკოთის უღელტეხილზე მოვარდნილმა ღვარცოფმა და მეწყერმა ადამიანების სიცოცხლე შეიწირა. დადგენილია, რომ დაღუპულები რესტორან “რიკოთის” თანამშრომლები იყვნენ.
როგორც თვითმხილველები ყვებიან, გადაუღებელი წვიმისა და სეტყვის შემდეგ მთიდან მეწყერი და ნიაღვარი მოულოდნელად წამოვიდა. რიკოთის გვირაბთან დაზიანდა ცენტრალური ავტომაგისტრალი, რის გამოც შეწყდა მოძრაობა. მთელი ღამის განმავლობაში შესაბამისი სამსახურები სამაშველო სამუშაოებს აწარმოებდნენ.
სპეციალისტებმა უღელტეხილზე არსებული მდგომარეობა შეისწავლეს. გეოლოგის გურამ გაფრინდაშვილის თქმით, ძლიერი წვიმის შემთხვევაშიც კი, სტიქიის ასეთი მასშტაბებით გამეორება აღარ მოხდება.
მნიშვნელოვანი ზარალი მიადგა ხაშურის, სურამისა და ჩუმათელეთის მოსახლეობას; ადიდებულმა სურამულამ მთლიანად დატბორა საცხოვრებელი სახლები, სასოფლო-სამეურნეო სავარგულები და ეზოები. დახოცილია შინაური ფრინველი და მსხვილფეხა პირუტყვი.
შაბათ-კვირას სტიქიის ზონაში ორჯერ იმყოფებოდა პრემიერ-მინისტრი ნიკა გილაური, რომელიც ადგილზე გაეცნო ვითარებას. მისი თქმით, უკვე ცნობილია, რომ ზარალი 10 მილიონ ლარზე მეტია. მთავრობის წევრებმა დაზარალებულ მოსახლეობას დახმარება აღუთქვეს.
სტიქიური უბედურების დროს, რიკოთის უღელტეხილზე ლანჩხუთელებიც იმყოფებოდნენ. ყოფილ უნივერმაღში მომუშავე ქალბატონები, რომლებიც ახლა “იმერეთის” ბაზარში ტანსაცმლის ბიზნესით არიან დაკავებულები, ლილოში მიდიოდნენ, როცა უღელტეხილზე ზვავი ჩამოწვა. მათი მიკროავტობუსი რესტორან “რიკოთთან” უნდა გაჩერებულიყო (ეს ის რესტორანია, რომელიც ზვავმა წაიღო), მაგრამ მანამდე, გზის ცუდი ხილვადობის გამო, მძღოლმა გაჩერება გადაწყვიტა. შემდეგ ცოტა წინ წაიწიეს და მეწყერიც ჩამოწვა.
დარეჯან ჯანელიძე: _ ლანჩხუთიდან საღამოთი გავედით. გვირაბთან ახლოს ვიყავით მისულები, როცა ძალიან მაგრად გაწვიმდა. ისე წვიმდა, რომ მანქანაშიც კი დავსველდით. გზა საერთოდ არ ჩანდა. გადავწყვიტეთ გავჩერებულიყავით. შემდეგ ცოტათი წინ წავედით და საშინელი ხმა გაისმა. იმ ადგილას, სადაც რამდენიმე წუთის წინ გაჩერებულები ვიყავით, მთელი მთა ჩამოიშალა. ვერც წინ გადაადგილებას ვახერხებდით. ირგვლივ მხოლოდ ხმაური იყო და წყვდიადი. არაფერი ჩანდა. პირველ რიგში, ერთმანეთი მოვიკითხეთ. ღვთის მადლით, ყველანი საღ-სალამათნი ვიყავით. გადავწყვიტეთ, ფეხით გავსულიყავით სამშვიდობოს, მაგრამ ძალიან გაგვიჭირდა. უზარმაზარი ხეები ჩვენს თვალწინ ითხრებოდა და გზებზე ეცემოდა. გავლაც კი საშიში იყო, ლოდებით იყო გზა ჩახერგილი. კრიმინალური პოლიციის თანამშრომლები მოვიდნენ და გვითხრეს, რომ სამშვიდობოს გაგვიყვანდნენ. ძალიან დაგვეხმარნენ. ბნელოდა, ტელეფონებით ვინათებდით გზას. ფეხშიშველებმა გადმოვიარეთ ჩამოწოლილი მთა. ირგვლივ ტალახის საშინელი სუნი იდგა, თან ზემოთ წყალი მდინარესავით მოდიოდა.
მაია კუპრაძე: _ ეს საშინელება იყო. ყველაფერი წამებში მოხდა, ძალიან შეგვეშინდა. მხოლოდ მთის ღრიალი ისმოდა და მეტი არაფერი. კრიმინალური პოლიცია დაგვეხმარა და გამოგვიყვანეს. სულ ფეხშიშველებმა გადმოვიარეთ ჩამოწოლილი მთა. ტელევიზორშიც კარგად გამოჩნდა ის ადგილი, სადაც ჩვენ ვიყავით. მთავრობის წარმომადგენლები და ჟურნალისტებიც იყვნენ იქ. ინტერვიუებიც აიღეს ჩვენგან. ისე ვიყავით შეშინებულები, რა ვუთხარით, აღარც კი მახსოვს.
ქეთინო უნგიაძე: _ უცებ აღმოვჩნდით კატასტროფულ სიტუაციაში. მძაფრსიუჟეტიან ფილმებში თუ მინახავს ასეთი რამ. გვინდოდა, რესტორან “რიკოთთან” გაგვეჩერებინა მანქანა. ალბათ, წუთები დავაგვიანეთ მანამდე, თორემ უბედურება დაგვემართებოდა. ბევრი ადამიანი იყო იქ, იყვნენ ბავშვებიც, თუმცა, პანიკა არ ყოფილა _ პოლიცია ყველას ამშვიდებდა და ეხმარებოდა.
ლანჩხუთელებმა რიკოთის უღელტეხილი კრიმინალური და საპატრულო პოლიციის დახმარებით დატოვეს. “პიკაპის” ტიპის ჯიპებით სოფელ ხევამდე ჩამოვიდნენ. შემდეგ მიკროავტობუსებში გადასხდნენ და ზესტაფონამდე ჩამოიყვანეს, იქ კი ლანჩხუთიდან წასული მიკროავტობუსი დახვდათ. ლანჩხუთში ღამის 3 საათზე ჩამოვიდნენ.
