როგორც “გურია ნიუსისთვის” გახდა ცნობილი, ჩოხატაურში ხელოვნების სკოლა-სტუდია იხსნება. გვესაუბრება ამ საქმის ინიციატორი, ჩოხატაურის მუნიციპალიტეტის კულტურის ცენტრის სპეციალისტი ბავშვთა შორის მუშაობის საკითხებში ედიშერ ღამბაშიძე.
_ სკოლა-სტუდიის შექმნის იდეა, რამდენიმე წელია მუშავდება. უკვე მივედით იმ კონდიციამდე, რომ ყველა ორგანიზაციული საკითხი თითქმის მოგვარებულია და მალე დავიწყებთ შემოქმედებით მუშაობას. მთავარი პრინციპი, რითაც მნიშვნელოვანი იქნება ეს სტუდია, გახლავთ ის, რომ მაქსიმალურად მიზანმიმართულად გამოვიყენებთ ჩოხატაურელი ბავშვების საკმაოდ დიდ შემოქმედებით პოტენციალს.
_ რა საგნებს შეისწავლიან ხელოვნების სკოლა-სტუდიის მსმენელები და იქნებიან თუ არა მოწვეული სპეციალისტები?
_ მოსწავლეები შეისწავლიან და გაიღრმავებენ ცოდნას შემდეგ საგნებში: ხელოვნების ისტორია, მეტყველება, სამსახიობო ოსტატობა, პლასტიკა, ვოკალი, ქორეოგრაფია, ქართული თეატრის ისტორია. მინდა იცოდეს საზოგადოებამ, აქ საკმაოდ მაღალ განათლებას მიიღებენ ბავშვები. კერძოდ, ისინი მოემზადებიან სხვადასხვა ფესტივალებისა და კონკურსებისთვის, როგორც საქართველოს, ასევე საერთაშორისო მასშტაბით; დაესწრებიან სპექტაკლებს, როგორც თბილისში, ასევე რეგიონებში; მოვიწვევთ ცნობილ რეჟისორებს, მსახიობებს, ხელოვნების გამოჩენილ მოღვაწეებს; მოეწყობა ღონისძიებები, სადაც მოსწავლეებს მაქსიმალურად მიეცემათ საშუალება, გამოავლინონ თავიანთი შემოქმედებითი შესაძლებლობები. ჩვენთან მოსწავლეები უზრუნველყოფილნი იქნებიან მატერიალურ-ტექნიკური ბაზით. პედაგოგები იქნებიან როგორც ადგილობრივი, ასევე მოწვეული პროფესორ-მასწავლებლები თბილისის სახელმწიფო და თეატრალური უნივერსიტეტებიდან.
_ რა ასაკის მოსწავლეები მიიღებიან ხელოვნების სკოლა-სტუდიაში?
_ 6 წლიდან 17 წლამდე ბავშვებსა და მოზარდებს შეეძლებათ, გასაუბრების შემდეგ ჩვენი სტუდიის წევრები გახდნენ. თითოეულ მოსწავლესთან მუშაობა წარიმართება მათი ნიჭის მიხედვით. გარდა ამისა, ჩვენ უკვე დავიწყეთ მზადება ხელოვნების ფესტივალისთვის, რომელიც რეგიონის მასშტაბით ჩატარდება და საკმაოდ მაღალი დონის იქნება. ეს ფესტივალი სამომავლოდ აუცილებლად ტრადიციული გახდება. ასევე შეიქმნება კულტურულ-საგანმანათლებლო ფონდი, რომელიც სხვადასხვა ღონისძიებებსა და ფესტივალებს დააფინანსებს. იმედი გვაქვს, რომ გურიაში შექმნილი კიდევ ერთი კულტურის კერის ხელშეწყობით, მრავალი ნიჭიერი ახალგაზრდა გამოვლინდება და მათი სახელი ცნობილი გახდება, როგორც საქართველოში, ასევე მის ფარგლებს გარეთაც.
