(გურია ნიუსი, ლანჩხუთი) _ რამდენიმე დღეა, ქართული ტელევიზიები გურიაში ბოტკინის სავარაუდო ეპიდემიაზე საუბრობენ. ამის მიზეზი ის გავრცელებული ინფორმაციაა, რომლის მიხედვითაც რამდენიმე ადამიანი, უმეტესად ახალგაზრდები, “ა” ჰეპატიტით არიან დაავადებულები. არადა, ამის შესახებ ინფორმაცია კარგა ხანს გასაიდუმლოებული იყო და ალბათ, ასეც დარჩებოდა, რომ არა ჩვენ მიერ ამ თემით დაინტერესება. საქმე იმაშია, რომ წინა პარასკევს, სწორედ ჩვენ მოგვაწოდეს ექსკლუზიური ინფორმაცია და როგორც წყარომ გვითხრა, მოზარდების ჰეპატიტით დაავადების შესახებ ინფორმაციას “სახელისუფლო ვეტო” ჰქონდა დადებული.
ჩვენ ამ საკითხით დავინტერესდით და მართალია, ამის დადასტურება რთული აღმოჩნდა, მაგრამ მაინც გავარკვიეთ _ “ა” ჰეპატიტით ორ ათეულზე მეტი მოსწავლე იყო დაინფიცირებული: “თუ დაავადების მიზეზი წყალია, ეს დიდი სკანდალია! ქალაქი მოიხმარს წყალს და ის თუ ინფექციური დაავადების გამავრცელებელია, გამოდის, რომ გაცილებით მძიმე მდგომარეობაა! 25 მოზარდიც საკმაოდ დიდი ციფრია, თან, როგორც ამბობენ, უმეტესად სკოლის მოსწავლეები არიან,” _ გვითხრა მაშინ მედიცინის მუშაკმა, რომელმაც ვინაობის გამხელა არ ისურვა.
ჩვენ ინფორმაციის გადასამოწმებლად ლანჩხუთის საკრებულოს წევრს, მიხეილ ჩაჩავას სახელობის სამედიცინო ცენტრის ინფექციური განყოფილების გამგეს, მარინა გოგიჩაიშვილს დაუკავშირდით: “მოზარდები მართლაც მოიყვანეს ჩვენთან, მაგრამ არა 25, არამედ 15-მდე. საშუალო სიმძიმის მდგომარეობაა, გართულებები არ არის. მიზეზის დადგენა საკმაოდ რთულია, სავარაუდო მიზეზი კი წყალი უნდა იყოს,” _ გვითხრა მან.
ამის შემდეგ შევეცადეთ გაგვეგო, თუ იყო თუ არა ქალაქში კარანტინის გამოცხადების აუცილებლობა თუმცა, ჩვენი დაინტერესების შემდეგ, ხელისუფლებამ თავად “იზრუნა” ინფორმაციის გავრცელებაზე, რადგან მიხვდა, რომ დამალვას აზრი აღარ ჰქონდა. რატომღაც, ადგილობრივ ხელისუფლებაში ფიქრობენ, რომ მსგავსი ინფორმაციების გავრცელება პრობლემას კურორტებს შეუქმნის. თუმცა, ის ავიწყდებათ, რომ მათი ვალდებულება, პირველ რიგში, ადგილობრივების ინტერესების გათვალისწინებაა, თანაც, მათ მხოლოდ საკურორტო სეზონის დროს აქვთ შემოსავალი. ასევე, მაქსიმალურად უნდა იყოს დაცული დამსვენებლების ინტერესები და ისინი ინფორმირებულები უნდა იყვნენ, რამდენად არიან დაცულები ან თუ რა სახის კომფორტია ამა თუ იმ კურორტზე. ის, რომ გურიის კურორტები მივიწყებულია, აქ კანალიზაციისა და წყლის პრობლემა მუდამ არსებობს, რომ გზებზე წვიმის დროს წყლები დგება, ეს დასამალი ნამდვილად არ არის.
ჩვენ ლანჩხუთის საზოგადოებრივი ჯანდაცვის ცენტრის დირექტორს, ლადო ჩხაიძეს დავუკავშირდით:
_ ბატონო ლადო, რა მდგომარეობაა მოზარდების “ა” ჰეპატიტით დაინფიცირებასთან დაკავშირებით?
_ 23 ივნისიდან დღემდე 24 შემთხვევაა დაფიქსირებული. ავადმყოფებს უტარდებათ სამედიცინო მომსახურება. აქედან, ექვი პაციენტის მდგომარეობა უკვე მთლიანად დამაკმაყოფილებელია, არც სხვების მდგომარეობაა რთული _ უფრო საშუალო სიმძიმის ეთქმის. ჩვენ ოჯახებს მივაწოდეთ ინფორმაცია, თუ როგორ უნდა დაიცვან თავი, რომ დაავადება მათაც არ გადაედოთ.
_ ბოლოს და ბოლოს, დადგინდა თუ არა თუ რა გახდა დაინფიცირების მიზეზი?
_ სამწუხაროდ, ამის დადგენა დღეს შეუძლებელია, რადგან უკვე მიმდინარეობს ინკუბაციური პერიოდი, რომელიც 50 დღეს გრძელდება. ასე რომ, კონკრეტულად იმის გარკვევა, ამის მიზეზი წყალი იყო თუ სხვა რამ, შეუძლებელია. მხოლოდ ვარაუდი შეიძლება გაკეთდეს, რომ მიზეზი იყო წყალი, თუმცა ჩვენ ვერ ვიტყვით, კონკრეტულად ონკანის თუ ჭის წყლით მოხდა დაინფიცირება.
_ ხომ არ არსებობს დაავადების გავრცელების საშიშროება ზღვისპირა ზოლში? რამდენად ვარგისია იქ ზღვის წყალი და რას ურჩევთ მოსახლეობას?
_ ამ საკითხზე საუბარი სურსათის უვნებლობის სამსახურის პრეროგატივაა, ხოლო რაც შეეხება რჩევას _ მე, როგორც სპეციალისტი, ვურჩევდი ადგილობრივ მოსახლეობას და დამსვენებლებს, სასმელად გამოიყენონ შემოწმებული წყალი და ეს წყალიც მიიღონ გადადუღების შემდეგ.
იმის გასარკვევად, თუ რა მდგომარეობაა ურეკსა და შეკვეთილში, ოზურგეთის კლინიკური საავადმყოფოს დირექტორს კახა ასკურავას დავუკავშირდით: _ დღეის მდგომარეობით, არც ურეკში, არც შეკვეთილში და, საერთოდ, ოზურგეთის ტერიტორიაზე არ დაფიქსირებულა ჰეპატიტის ერთი შემთხვევაც კი. ასე რომ, ამ მხრივ პანიკის საფუძველი არ არსებობს, _ გვითხრა მან.
ამის შემდეგ სურსათის უვნებლობის, ვეტერინარიისა და მცენარეთა დაცვის გურიის სამსახურის უფროსს კახა თავბერიძეს ვესაუბრეთ:
_ ბატონო კახა, ლანჩხუთში ჰეპატიტის შემთხვევები დაფიქსირდა. გვაინტერესებს, ურეკსა და შეკვეთილში წყლის მდგომარეობა როგორია?
_ ამის შესახებ საზოგადოებრივი ჯანდაცვის ცენტრს უნდა მიმართოთ.
_ იქედან თქვენთან გადმოგვამისამართეს. ჩვენ ჰეპატიტის გავრცელებაზე კი არ გვინდა კომენტარი, წყლის ვარგისიანობა გვაინტერესებს! ამას ხომ თქვენი სამსახური აკონტროლებს?
_ გასაგებია, თქვენ გაინტერესებთ, თუ რამდენად სუფთაა წყალი. ამისთვის საჭიროა ავიღოთ წყლის ნიმუში და ლაბორატორიაში შევამოწმოთ.
_ ჯერ არ აგიღიათ?
_ ლანჩხუთში, როგორც ვიცი, გაკეთდა, რადგან იქ ჰეპატიტის შემთხვევები დაფიქსირდა, ოზურგეთში ჯერ არ გაკეთებულა.
_ რა მნიშვნელობა აქვს ჰეპატიტის შემთხვევები დაფიქსირდა თუ არა? ბავშვები დაავადნენ, საკურორტო სეზონი მოახლოვდა და წყლის შემოწმება ზედმეტი არ უნდა იყოს!
_ ამას, ალბათ, უახლოეს დღეებში გავაკეთებთ.
მართალია, გურიაში “ა” ჰეპატიტით დაინფიცირების არც მიზეზია დადგენილი და სპეციალისტები, ჯერჯერობით, ვერც პანიკის საფუძველს ხედავენ, მაგრამ თუ გასულ კვირაში ლანჩხუთის მთავარი ინფექციონისტი 15 შემთხვევაზე საუბრობდა, დღეს საზოგადოებრივი ჯანდაცვის სამსახურში უკვე 24 შემთხვევის დაფიქსირების შესახებ გამოაცხადეს, აქედან გამომდინარე, არ არის გამორიცხული, რომ შემთხვევების რაოდენობა კიდევ უფრო გაიზარდოს.
