“ძვირფასო რედაქცია! გთხოვთ, ეს პატარა წერილი, რომელშიც ხალხის გულისტკივილია გამოხატული, გადაამოწმოთ, გაეცნოთ არსებულ რეალობას და თქვენთვის დამახასიათებელი სიზუსტით შესაბამისი შეფასება მისცეთ.”
ეს წერილი სოფელ ზემოფარცხმაში მცხოვრებლების გულისტკივილს გამოხატავს. ისე, სულ გვიკვირდა, რაში იყო საქმე _ არსებობს შუა ფარცხმა, ზემო ფარცხმა და “ქვემო ფარცხმა” სადღა არისო, ვფიქრობდით. თურმე, ესეც არსებობს, მაგრამ დღემდე ჩვენ არ გვცოდნია.
როგორც ჩანს, ამაზე ჩოხატაურის მუნიციპალიტეტის ხელმძღვანელობაც დაფიქრდა და გადაწყვეტილება მიიღო, ეს შეცდომა გამოესწორებინა. სხვაგვარად რით ავხსნათ ფაქტები, რომლებიც არც ერთ ლოგიკაში არ ჯდება _ იქნებ, თქვენი დახმარებით გავარკვიოთ, რატომ არის ქუჩის განათება საჭირო მხოლოდ ზემოფარცხმის ცენტრამდე და შემდეგ არა? აქ ხომ არ მთავრდება სოფელი, რომელიც კარგა მანძილზე გრძელდება სამტრედიის მიმართულებით!
იქნებ დაგვეხმაროთ და გაგვარკვევინოთ, რატომ არის გაზიფიცირებული სოფლის ტერიტორია მხოლოდ ცენტრამდე და არა მის ზევით? იქნებ ვინმემ გვიპასუხოს, გვეღირსება თუ არა “ზემოთ” მცხოვრებლებს წყალი? ზაფხულის დადგომა სირთულეებს გვიქმნის _ ჭები შრება, გაუსაძლის პირობებში გვიწევს ცხოვრება. თქვენ, ალბათ, გვეტყვით, ყველა ამ საკითხთან დაკავშირებით, რატომ მუნიციპალიტეტის ხელმძღვანელობას არ მიმართეთო. რასაკვირველია, მართალი ბრძანდებით. მივმართეთ, როგორ არა (იხ. წერილი #507), პასუხიც მივიღეთ _ ელექტროფიკაციასა და გაზიფიკაციას აწარმოებს “სოკარი” და “ენერგო-პრო ჯორჯია”. თქვენს საკითხს სპეციალური კომისია შეისწავლის და პასუხს გაცნობებთ, _ ასე მოგვიშორეს თავიდან.
არსებობს საპრეზიდენტო პროგრამები: “გაზი ყველა სოფელში”, “სოფლის განვითარების პროგრამა”, მაგრამ ჩვენთვის არც ერთი არ არსებობს!… დაეკითხა ვინმე სოფლის მოსახლეობას, რა არის მათთვის პრიორიტეტული, რა სჭირდება, რა არის აუცილებელი? _ რიტუალების სასახლე? მაშინ, როცა სასიცოცხლო პრობლემები, ელემენტარული მოთხოვნებიც ვერ მოგვიგვარებია! რიტუალების სასახლეც კარგია _ როგორ არა, მაგრამ ეს მაშინ, როცა ყველა პრობლემა მოგვარებულია.
ზამთარი მალე შემოაღებს კარს. რა ვქნათ სოფლის მცხოვრებლებებმა, შეშის მოჭრა რომ აკრძალულია?! მასობრივი უმუშევრობის პირობებში, დამზადებული შეშის ყიდვა შეუძლებელია. რომ არ გავყინულიყავით, ერთადერთი იმედი გაზის შემოყვანა იყო. წლების განმავლობაში, სოფლის საერთო ელექტრომრიცხველი უამრავ პრობლემას გვიქმნიდა. ხალხი ერთმანეთს დაუპირისპირეს, ახლა დაიწყეს ახალი მრიცხველების დაყენება. მაგრამ, რა მერე? |_ ისე უხარისხოდ აკეთებენ, გადაფერდებულ ბოძებზე ძირითადი გაყვანილობის მავთულები ისე დაბლა გადაჭიმეს, რომ ღორი მოკლა, ხოლო კაცი ძლივს გადაურჩა სიკვდილს. რატომ მაინცადამაინც ფარცხმის “ქვემო” ნაწილში მოხერხდა ყველა პრობლემის დადებითად გადაჭრა და “ზემო” ნაწილისთვის კი, თურმე, საშუალება არ არსებობს?! რატომ გახლიჩეს სოფელი ორ ნაწილად?! _ იქნებ იმიტომ, რომ სოფლის “ქვემო ნაწილში” ცხოვრობენ “ძლიერნი ამა სოფლისანი”?!
ისევ დადგება არჩევნების დრო. ისევ დაიწყება წინასაარჩევნო მარათონი, ტყუილი დაპირებები. ნეტავ, რა სინდისით უნდა ითხოვონ მხარდაჭერა და ხმები მავანმა და მავანმა ფარცხმის “ზემო” ნაწილის მცხოვრებლებისგან?!
ვიცით, რომ გაზეთი “გურია ნიუსი” იგზავნება პრეზიდენტის აპარატში, საქართველოს პარლამენტში, ვრცელდება ინტერნეტით… იქნებ, თქვენი გაზეთის მეშვეობით მაინც გავაგებინოთ ცენტრალურ ხელისუფლებას ჩვენი გასაჭირი და თუ ეს ასე არ მოხერხდა, მაშინ სხვა გზების საშუალებით შევძლებთ ამას. გვინდა ტელევიზიასაც მივაწვდინოთ ჩვენი ხმა. ვფიქრობთ, ჟურნალისტები, რომლებსაც ჟურნალისტური ეთიკის კოდექსი ავალდებულებთ დაიცვან მოქალაქეთა უფლებები და საზოგადოების ინტერესები, დაადგენენ სიმართლეს და დაგვეხმარებიან არსებული პრობლემების მოგვარებაში.
სოფელ ზემო ფარცხმის “ზემო” ნაწილის მცხოვრებლები: ნ. ახლაძე, ე. სიმონიშვილი, ნ. ჩხიკვაძე, ზ. ჩხიკვაძე.
