ჩვენი წყაროს ინფორმაციით, ოზურგეთის მუნიციპალიტეტის სოფელ ანასეულში მდებარე ჩაის, სუბტროპიკული კულტურებისა და ჩაის მრეწველობის ინსტიტუტში კადრები შეამცირეს. ასევე, გავრცელდა ინფორმაცია, რომ ინსტიტუტი კახა ბენდუქიძემ შეისყიდა და უახლოეს ხანში, სხვადასხვა პროექტების გახორციელებას გეგმავს.
რადგან აიპ საქართველოს აგრარული უნივერსიტეტის ჩაის, სუბტროპიკული კულტურებისა და მრეწველობის ინსტიტუტის დირექტორი, თემურ რევიშვილი თბილისში იმყოფებოდა, მასთან ინტერვიუ ტელეფონით ჩავიწერეთ.
_ ბატონო თემურ, ჩვენი ინფორმაციით, ინსტიტუტში კადრები შემცირდა.
_ მოხდა 14 სამეცნიერო კვლევითი ინსტიტუტის შეერთება საქართველოს აგრარულ უნივერსიტეტთან, ანუ მიმდინარეობს რეფორმის, ოპტიმიზაციის პროცესი. ბუნებრივია, ამან გამოიწვია კადრების შემცირება.
_ რა კავშირი აქვს ამ ყველაფერს კახა ბენდუქიძესთან? ამბობენ, რომ ეს ინსტიტუტი სწორედ მან შეისყიდა.
_ არა, თქვენ ვიღაცა თითიდან გამოწოვილ ინფორმაციას გაწვდით. რა შუაშია კახა ბენდუქიძე? აგრარულმა უნივერსიტეტმა ყველა ინსტიტუტში ჩაატარა ოპტიმიზაციის პროცესი, დანარჩენი არის ჭორი და სხვა არაფერი.
_ გასაგებია. ანუ კახა ბენდუქიძე არაფერ შუაშია ინსტიტუტთან?
_ შეიძლება, არის კიდევაც შუაში, მაგრამ ეს დოკუმენტში არსად არ წერია.
_ არც ის ინფორმაცია შეესაბამება სიმართლეს, რომ ინსტიტუტი ბენდუქიძემ შეისყიდა?
_ შესყიდული არავის არაფერი არ აქვს. მართვაში ეს ყველაფერი გადაეცა უნივერსიტეტს, ყველა სფეროში მიდის ეს ოპტიმიზაცია. არ ხდება ასე? რა შუაშია კახა ბენდუქიძე? სახელმწიფო ატარებს ამ ოპტიმიზაციას, გვარებს და სახელებს რა მნიშვნელობა აქვს? საქართველოს მთავრობის გასული წლის დადგენილებით, 1 იანვრიდან შევუერთდით აგრარულ უნივერსიტეტს. რა თქმა უნდა, ამან კადრების გადანაწილება გამოიწვია. როგორც ცნობილია, პირველი აპრილიდან, საბიუჯეტო დაფინანსება შეუწყვიტეს სამეცნიერო კვლევით ინსტიტუტებს. ყველა ინსტიტუტში ჩაატარეს კონკურსი, საკონკურსო კომისია მუშაობდა, გასაუბრება, ატესტაცია ყველა ინსტიტუტში ჩაატარეს და მათ შორის, ჩვენთანაც.
_ რა მოხდა კონკურსის ჩატარების შემდეგ ოზურგეთში?
_ რა მოხდებოდა, თქვენ როგორ ფიქრობთ?
_ მე თქვენ გეკითხებით.
_ ეს პროცესი, იცით, რამდენი წელია მიმდინარეობს? ყოველ წელს რაღაც ხდებოდა, მცირდებოდა და მცირდება თანამშრომლები. არ იცით, რომ მცირდება? რა თქმა უნდა, ამ ოპტიმიზაციამ გამოიწვია რამდენიმე თანამშრომლის შემცირება. ვიღაცას ეს თემები აინტერესებს. არ არის მომგებიანი თემა. თუ ვინმე რამე საქმეს აკეთებს, მთლიან ჯამში, საქართველოს საქმეს აკეთებს და თავისთავად, სასარგებლოა. აგრარული უნივერსიტეტი უნდა გადაიქცეს ამიერკავკასიაში ერთ-ერთ ძლიერ უნივერსიტეტად, რომელსაც ექნება, როგორც სასწავლო პროცესი, ასევე, სამეცნიერო-კვლევითი პროცესი, თავისი კვლევითი მიმართულება და ა.შ. აბსოლუტურად ყველა თანამშრომელს, რომელსაც რეფორმის შედეგად შეუწყვიტეს ხელშეკრულება, მიეცა შანსი, მიიღოსმონაწილეობა კონკურსებში, რომელიც გამოაცხადა აგრარულმა უნივერსიტეტმა. გრანტების მიღება 28 სექტემბერს მთავრდება.
_ რამდენი ადამიანი გათავისუფლდა ოპტიმიზაციის შედეგად?
_ 36 ადამიანი წავიდა და 50 დარჩა.
