გურიის რეგიონული სამედიცინო ცენტრის გენერალურ დირექტორად ლევან ანთაძე დაინიშნა.
იგი პროფესიით ექიმია, დაიბადა ბათუმში, 1970 წელს; დაამთავრა #1 საშუალო სკოლა, თბილისის სახელმწიფო სამედიცინო ინსტიტუტი; სპეციალობით ეპიდემიოლოგია. მუშაობდა საზოგადოებრივი ჯანდაცვის უფროსად ქალაქ ბათუმში; ქალაქ ბათუმის ჯანმრთელობისა და სოციალური სამსახურის უფროსად; იყო წყალკანალის გენერალური დირექტორი; ბათუმის ვიცე-მერი; აჭარის მთავრობის თავმჯდომარის მოადგილე და ასევე ჯანმრთელობისა და სოციალური დაცვის მინისტრი. ჰყავს მეუღლე და ორი შვილი.
ანთაძემ 24 ივლისს, საკუთარი განცხადების საფუძველზე, დატოვა მინისტრის პოსტი. როგორც თავად ამბობს, არ ჰქონდა გამიზნული, რომ აქ დაინიშნებოდა, ინტერნეტში ნახა ვაკანსია, იცნობდა პაატა კურტანიძეს და შეეხმიანა, იქნებ, ჩემი კანდიდატურაც განიხილოთო.
_ ბატონი პაატა ჩამოვიდა ბათუმში და იქ გადაწყდა ჩემი ამბავი, _ ამბობს იგი.
_ ბატონო ლევან, როდის დაიწყებს ფუნქციონირებას გურიის სამედიცინო ცენტრი?
_ მშენებლობა დასრულდება დეკემბერში. აქ მარტო სამშენებლო თემატიკა არაა _ იქ არის აპარატურის სპეციფიკა, ექსპლოატაციაში გაშვება, რაც დეკემბერში მოხდება. პრაქტიკულად, ოზურგეთში მდებარე ყველა სახელმწიფო სამედიცინო დაწესებულება შეერთებულია.
_ რამდენად არის შესაძლებელი ამ სამედიცინო დაწესებულებებში მომუშავე მედპერსონალის დასაქმება?
_ ასე არ დგას საკითხი. ერთის მხრივ, შეიძლება ვიღაც ვერ დასაქმდეს, მეორე მხრივ, არის ექიმების მნიშვნელოვანი დეფიციტი, რაც არაა დამოკიდებული არც “ავერსზე” და არც ამ საავადმყოფოზე. დამოკიდებულია მხოლოდ ექიმის პროფესიონალიზმზე.
_ გინდათ თქვათ, რომ ოზურგეთში არ არიან პროფესიონალი ექიმები?
_ რომ არ იყვნენ, ვერ იწარმოებოდა სამედიცინო საქმიანობა. რა თქმა უნდა, არიან, მაგრამ დღევანდელ მოთხოვნებს ყველას კვალიფიკაცია ვერ შეეფერება.
_ გამოცდები ყველას ჩაუტარდება?
_ რომ მოიპოვო ექიმის უფლება, უნდა ჩააბარო სასერტიფიკაციო გამოცდა. აქ შეიძლება იყოს საუბარი გასაუბრებაზე და ზოგადი დონის შეფასებაზე, როგორც ექიმებთან, ასევე, ექთნებთან მიმართებაშიც. პირველი, რაც შემიძლია გითხრათ, არის ის, რომ სამედიცინო პერსონალი პირველი ოქტომბრიდან უკლებლივ დასაქმდება, შემდეგ მოხდება მათი პროფესიონალიზმის მიხედვით შეფასება _ მაშინ, როდესაც დადგება აქ გადმოყვანის საკითხი. პრობლემას მე უფრო სხვა რამეში ვხედავ _ არ არის რომ ბევრი კონკრეტული სპეციალობის ექიმი, არ გვყავს კომპიუტერული ტომოგრაფიის სპეციალისტი. ჩვენ, შეიძლება, გარკვეული თანხის გადახდა მოგვიხდეს სპეციალისტების მოსამზადებლად.
_ რა ხდება ახლა?
_ ახლა მთელი სამედიცინო მედპერსონალი წერს განცხადებას. ვისაც სურს დარჩენა, დარჩება, ვისაც არ აქვს სურვილი, ჩვენ ვერ დავაძალებთ.
_ სურვილი ყველას აქვს, თუმცა, ამბობენ, რომ კადრები უკვე შერჩეულია.
_ რა თქმა უნდა, დეკემბრიდან ყველა ვერ დასაქმდება. თქვენ გგონიათ, რომ ეს ვინმეს ინტერესია? ადგილობრივის დასაქმება უფრო კარგია ჩვენთვის, ვიდრე კადრის სხვა ქალაქიდან ჩამოყვანა, რაც უფრო ძვირი დაგვიჯდება. თუ იმედი არ აქვთ, ჩვენ ჩავუსახოთ იმედი. ფიზიკურად, რევმატოლოგების და რეანიმატოლოგების პრობლემაა. რეანიმაციაში, მინიმუმ, ოთხმა ექიმმა უნდა იმორიგეოს. არ არის ეს ოთხი ექიმი და საძებარი გვყავს. იგივე მდგომარეობაა ციფრულ რენტგენთან დაკავშირებით, რომელიც სპეციფიკურია.
_ კონკურსის სახით მიიღებთ თანამშრომლებს?
_ არ ვიცი. კონკურსს მე არ ვატარებ და, ისე, მოგიწვევთ აუცილებლად.
_ გარდა დაზღვეულებისა, როგორ მოემსახურებით სხვა პაციენტებს?
_ ფასები იმაზე დაბალი იქნება, რაც არის. ისე, კომპანიის სტრატეგიაა, იყოს ის ფასები შენარჩუნებული, რაც არის დღეს. საკმაოდ გაბერილი იყო ამ სამედიცინო დაწესებულებების ადმინისტრაციის ნაწილი, შესაბამისად, ფასებიც და ვფიქრობ, იგივე ფასებში ჩავჯდეთ, რაც იყო რეალურად და რაც არის. ბაზარზე დიდი შემკვეთი არის სახელმწიფო და რა თქმა უნდა, სახელმწიფოზეა ბევრი რამ დამოკიდებული, რეგულირება მის ხელშია. ლანჩხუთსა და ჩოხატაურში სასწრაფო სამედიცინი დახმარების სამსახურებიც ჩვენ შეგვიერთდება.
_ რას უსურვებთ გურიას და ოზურგეთს?
_ დედაჩემი წარმოშობით მშვიდობაურიდანაა, მამაჩემი კი _ ნინოშვილიდან. ასე რომ, გურული ვარ. მინდა, გურიას წარმატებები და განვითარება ვუსურვო.
