გასულ კვირას, საქართველოს პრეზიდენტმა, მიხეილ სააკაშვილმა განაცხადა, რომ ის გლეხები, რომლებსაც ჰიბრიდული სიმინდის მოსავალმა არ გაუმართლა, თესლის საფასურის აღარ გადაიხდიან. სანამ ეს განაცხადი გაკეთდებოდა, მანამდე ადგილობრივი ხელისუფლების წარმომადგენლები ყანაში გავიდნენ და მოსავლით დაინტერესდნენ. ხელისუფლების და ფერმერის შეხედულებით, მოსავლის სამი მერვედის მიღებაც “ხეირია”(?!).
“ქრისტიან-დემოკრატების” ერთ-ერთი ლიდერი, ლევან ვეფხვაძე “გურია ნიუსთან” სატელეფონო საუბრის დროს ამბობს, რომ საქართველოს პრეზიდენტმა აღიარა მათი კრიტიკა: _ ბოლო ერთი თვეა, მიდის კამათი პარლამენტში, სადაც უმრავლესობის წევრები, მათ შორის, სოფლის მეურნეობის ყოფილი მინისტრის ჩათვლით, კომიტეტის სხდომაზე ამტკიცებდნენ, რომ ყველაფერი კარგად იყო და სოფლის დაზარალებული მოსახლეობა ჩვენ არ გვყავსო. საქართველოს პრეზიდენტმა აღიარა ის, რომ ჩვენი “ქრისტიან-დემოკრატების” კრიტიკა იყო აბსოლუტურად საფუძვლიანი და მართლაც არსებობს ჩვენი მოსახლეობის დიდი ნაწილი, რომელიც დაზარალდა. ძირითადად, დაზარალებულების დიდი ნაწილი დასავლეთ საქართველოში ცხოვრობს (გურია, იმერეთი, აჭარა), _ თქვა ლევან ვეფხვაძემ.
ლევან ვეფხვაძე ასევე დაინტერესებულია, თუ როგორ აპირებს ხელისუფლება მოსახლეობისგან ვალის ჩამოწერას _ “ქრისტიან-დემოკრატები” პასუხს სოფლის მეურნეობის ახალდანიშნულ მინისტრისგან ელიან: _ ბუნებრივია, ჩვენ გვაინტერესებს, რა ფორმით მოხდება ამ პრობლემის შესწავლა, რა კრიტერიუმები იარსებებს იმისთვის, რომ ინიციატივას უკუღმართი განვითარება არ მოჰყვეს. ამისთვის ჩვენ ვგეგმავთ, მომავალ კვირაში მოვიწვიოთ პარლამენტში სოფლის მეურნეობის მინისტრი, რომელიც გაგვაგებინებს, რაზეა ლაპარაკი. მიუხედავად პრეზიდენტის განცხადებისა, იმავე დღეს ჩვენ სამტრედიიდან დაგვიკავშირდნენ და გვითხრეს, რომ დაუვლიათ სოფლის რწმუნებულებს და გაუფრთხილებიათ მოსახლეობა, რომ 7 ნოემბრამდე თესლის საფასური გადახდილი უნდა იყოსო. გარდა ამისა, წვრილი მეურნეობების გარდა, არის მსხვილი მეურნეობები, რომლებსაც საბანკო გარანტიებით აქვთ ეს თესლი აღებული და საინტერესოა, როგორ მოხდება ამ შემთხვევაში გადახდა? _ თქვა ჩვენთან საუბრის დასასრულს ვეფხვაძემ.
ბიოლოგიურ-მეცნიერებათა ასოცირებული დოქტორი, მარინე სუნგულია “გურია ნიუსთან” საუბარს ოზურგეთში სოფლის მეურნეობის ყოფილ მინისტრთან, ბაკურ კვეზერელთან შეხვედრით იწყებს: _ როცა სოფლის მეურნეობის ყოფილი მინისტრი შეხვდა ფერმერებს და სოფლის რწმუნებულებს ამერიკული ჰიბრიდული სიმინდის თესლის გავრცელების პროგრამის ფარგლებში, იმ შეხვედრაზე გავაკეთე პროგნოზი, რაც მოსალოდნელი იყო იმ არასწორი პოლიტიკის შედეგად, რომელსაც სოფლის მეურნეობის სამინისტრო ეწეოდა. თესლის გავრცელებას ჰქონდა კამპანიური ხასიათი, ის უფრო ერთჯერად ღონისძიებას ჰგავდა, რომლის შედეგადაც, ვიღაცას ვიღაცისთვის უნდა “ეპატაკებია” დიდი რაოდენობით გაყიდული თესლის შესახებ. მაშინ ვთქვი, რომ, სამწუხაროდ, ასეთი არასწორი მიდგომა დააზარალებდა ამერიკული ჰიბრიდული სათესლე სიმინდის ავტორიტეტს, რადგან ამ სიმინდის მოყვანისთვის საჭიროა გარკვეული ცოდნა, რაც თესლის დარიგებამდე, ან უკიდურეს შემთხვევაში, თესლის მიცემის პროცესში უნდა მიეცათ ფერმერისთვის. როცა სოფლის მეურნეობის მინისტრს დავუსვი კითხვა, თუ რატომ ვაძალებთ და ვაიძულებთ ადამიანებს, შეიძინონ ამერიკული ჰიბრიდული სიმინდი, როცა შეიძლება, ხელი შევუწყოთ ადგილობრივი ჰიბრიდების წარმოებას და მათი ახალი ხაზების გამოყვანას, პასუხმა ყოველგვარ მოლოდინს გადააჭარბა _ მან თქვა, რომ ამერიკული ჰიბრიდული თესლი მოსწონდა იმის გამო, რადგან ამერიკელების გამოყვანილი იყო, ხოლო ჩვენს იწუნებდა იმ მიზეზით, რომ კომუნისტების დროს იყო გამოყვანილი! თან დასძინა, რომ სიმინდი, ბოლოსდაბოლოს, ამერიკულიაო. ეს ფრაზა შემდგომ “წარმატებულად” იქნა გამოყენებული სხვა დეპუტატების მიერ. მათ გასაგონად მინდა ვთქვა _ საქართველოში ბევრი სასოფლო-სამეურნეო კულტურაა შემოტანილი სხვადასხვა ქვეყნიდან, მაგრამ ჯიში, რომლის ადგილზე გამოყვანა ხდება, ის ქართულია და შეგუებულია ჩვენს პირობებს. მოკლედ რომ ვთქვათ, არასწორმა მენეჯმენტმა და კამპანიურობამ განაპირობა ის შედეგი, რაც ამერიკული ყვითელი სიმინდის ჩავარდნასთან არის დაკავშირებული. მინდა ხაზგასმით აღვნიშნო, რომ ეს არავითარ შემთხვევაში არ არის ჰიბრიდული სიმინდის თესლის ბრალი. დაირღვა ინსტრუქციის მიწოდების წესი, რაც შეიცავდა ინფორმაციას იმის შესახებ, თუ როგორ მიწაზე უნდა დაეთესათ, როგორ უნდა მოევლოთ მისთვის. ამასთანავე, მავნებელ-დაავადებების მხრივ, შესწავლილი უნდა ყოფილიყო ის ტერიტორია, სადაც ეს სიმინდი ითესებოდა. მეორე: დაირღვა თესლის შენახვის პირობები _ სიმინდის თესლი ინახებოდა სახანძრო სამსახურის ნესტიან შენობაში, ერთმანეთზე შეყრილი კალოს სახით, რაც აუცილებლად გამოიწვევდა კალოს შუაში მყოფი სათესლე მასალის ჩახურებას და ჩანასახის სიკვდილს. ვისაც ეს ტომარა შეხვდებოდა, იმ ფერმერის საყანე ფართობში სიმინდი არ ამოვიდოდა.
ახლა კი, ბოლო პერიოდში, ყვითელი სიმინდის გარშემო განვითარებულ მოვლენებზე მინდა ვისაუბრო. უპირველესად, საქართველოს პრეზიდენტის განცხადების შესახებ მინდა ვთქვა. როცა მან განაცხადა, რომ დაზარალებულ ფერმერებს ათავისუფლებდა საფასურის გადასახადისგან, ამის შესახებ ფერმერებს უნდა სცოდნოდათ თავიდანვე, თუ ეს მართლა იყო გათვალისწინებული, მაგრამ მე ვფიქრობ, ეს განცხადებაც სტიქიურია და ის გამოიწვია ბიძინა ივანიშვილის პოლიტიკურ ასპარეზზე გამოსვლამ.
თუ არჩევნების ჩავლის შემდეგ, ისევ ამ ხელისუფლებას (ღმერთმა არ ქნას) დარჩა გადაწყვეტილების მიღების უფლება, იგი აუცილებლად ამოიღებს სიმინდის თესლის საფასურს, _ გვითხრა მარინე სუნგულიამ.
