(გურია ნიუსი, ჩოხატაური) _ როგორც ვიუწყებოდით, 4 დეკემბრის ღამეს ჩოხატაურის მუნიციპალიტეტში კიდევ ერთი ყაჩაღობა მოხდა. სოფელ გოგოლესუბნის მცხოვრები გურამ (გიური) სიხარულიძის ოჯახი, დაახლოებით საღამოს 8 საათზე დააყაჩაღეს. ყაჩაღობის დროს, სახლში მხოლოდ ოჯახის 69 წლის დიასახლისი იმყოფებოდა, რომელსაც, როგორც გვითხრეს, ყაჩაღებმა სიტყვიერი შეურაცხყოფა მიაყენეს და სასტიკად სცემეს. დაზარალებული ქალბატონი, მრავლობითი დაზიანებით ჩოხატაურის საავადმყოფოში 10 საათისთვის მიიყვანეს.
ჩვენ მიერ მოპოვებული ინფორმაციით, ქალბატონს 3 შეიარაღებული პირი დაესხა თავს და მისგან თანხას ითხოვდნენ.
ჩოხატაურის პოლიციის სამმართველოში სისხლის სამართლის საქმე იმავე დღეს აღიძრა, თუმცა, ძალოვნები ამ დრომდე კომენტარებს არ აკეთებენ. გავრცელებული ინფორმაციით, ჩოხატაურში ერთი დაჯგუფება მოქმედებს, რადგან ყველა ყაჩაღობაში მხოლოდ სამი შეიარაღებული პირი ფიქსირდება.
ჩოხატაურის მოსახლეობა შეშინებულია, რადგან, კვირა არ გავა, ყაჩაღობა არ მოხდეს. ბოლო ერთი თვის განმავლობაში, ჩოხატაურში დაფიქსირებული ეს უკვე მესამე ყაჩაღობაა. წინა თვეებში კიდევ სამი ყაჩაღობა მოხდა. ამ დრომდე არცერთი საქმე არ არის გახსნილი და მიუხედავად იმისა, რომ სამხარეო სამმართველოს ახალი უფროსი, დავით ცირეკიძე თავისი გუნდით რამდენიმე დღეა ჩოხატაურშია გადმოსახლებული, შედეგი არ ჩანს. უფრო მეტიც, როგორც გვითხრეს, გასულ ორშაბათს, თბილისიდან სპეციალური ჯგუფი ჩამოიყვანეს, თუმცა, ამ დრომდე, ყაჩაღების დაკავების თაობაზე ინფორმაცია არავის გაუვრცელებია. სამაგიეროდ ვრცელდება ინფორმაცია, რომ ჩოხატაურის დროებითი მოთავსების იზოლატორი სავსეა დაკავებული ახალგაზრდებით. პოლიცია იჭერს ყველას, ვისაც უადგილო ადგილზე პოულობს. მათ შორის, 11 საათს შემდეგ სიგარეტის საყიდლად გამოსულ ახალგაზრდებს. ამ ინფორმაციის გადამოწმება პოლიციის მხრიდან საზოგადოებასთან ურთიერთობის სურვილის არარსებობის გამო, ვერ ხერხდება.
ჩოხატაურელები ამბობენ, რომ რაიონში არაოფიციალური კომენდანტის საათი მოქმედებს და პოლიციისგან დამნაშავეების დაუყონებლივ დაკავებას მოითხოვენ.
ჩვენ მიერ მოპოვებული ინფორმაციით, პოლიციელებს მინისტრმა დანაშაულობების გახსნისთვის ერთთვიანი ვადა მისცა. ჩვენი წყაროს თქმით, ამ გაუხსნელ ყაჩაღობებს უკვე შეეწირა ჩოხატაურის პოლიციის უფროსის მოადგილის, რამაზ ჯინჭარაძის თანამდებობა, თუმცა, ამ ინფორმაციის დაზუსტებაც ზემოთ თქმული მიზეზით ვერ ხერხდება _ ჯინჭარაძე ტელეფონს არ პასუხობს, პოლიციის მაღალჩინოსნები და პრესსამსახური კი, კომენტარს არ აკეთებენ.
“გურია ნიუსი” ამ საკითხზე გურიის გუბერნატორს ვალერი ჩიტაიშვილს 5 დეკემბერს დაუკავშირდა:
_ ბატონო ვალერი, გურიაში, განსაკუთრებით კი ჩოხატაურში მძიმე კრიმონოგენური სიტუაციაა. მოსახლეობა შეშინებულია. ჩოხატაურში კიდევ ერთი ყაჩაღობა წუხელ მოხდა. პოლიცია საქმეების გახსნას ვერ ახერხებს… რა ინფორმაცია გაქვთ ამ ყველაფერთან დაკავშირებით და რაიმე გეგმა თუ არსებობს, რომ მოსახლეობამ მშვიდად დაძინება შეძლოს?
_ თათბირზე ვარ და მოგვიანებით შეგეხმიანებით, _ ასეთი იყო მხარის პირველი პირის პასუხი, თუმცა, ეს დაპირება მხოლოდ ჩვენი საუბრის ჩანაწერს შემორჩა და მხარის პირველმა პირმა შექმნილი საგანგაშო მდგომარეობის შესახებ განმარტების გაკეთება აღარ მოისურვა.
