“გურია ნიუსმა” დავით გამყრელიძეს რამდენიმე კითხვით მიმართა.
_ ბატონო დავით, დღეს ბევრს საუბრობენ თქვენი პარტიისადმი ხელისუფლების ლოიალობაზე, მილიონ ლარზე, რომელიც “ახალმა მემარჯვენეებმა” უკვე მიიღო…
_ ჩვენ ეს დაგვაბრალეს, როცა მოლაპარაკებები მიდიოდა. კი, ბატონო, არ არის პრობლემა, აგიხსნით. მილიონებს რომელი პარტიები იღებენ და ვისგან, მე მგონი, კარგად ჩანს და ხედავს საზოგადოება. ჩვენ რვა თვის განმავლობაში ვაწარმოებდით სხვა პარტიებთან ერთად მოლაპარაკებას ხელისუფლებასთან, საერთაშორისო ორგანიზაციების და უცხოური დიპლომატიური კორპუსის მონაწილეობით საარჩევნო კოდექსის გაუმჯობესებაზე. ეს მოიცავდა კომპლექსურად ძირითადი პრობლემების გადაწყვეტას, დაწყებული ამომრჩეველთა სიით, გაგრძელებული საარჩევნო სისტემით, დამთავრებული ფინანსებით, რომელიც იყო და არის ერთ-ერთი მთავარი პრობლემა ოპოზიციისთვის, თუ არ ჩავთვლით ივანიშვილის გამოჩენას, რომელმაც არა თუ მილიონები, არამედ უკვე მილიარდები გამოაჩინა ამის დასაფინანსებლად. შემიძლია, საკუთარი გამოცდილებით გითხრათ, რომ ათი წლის განმავლობაში არაერთი არჩევნები გამივლია, არაერთი საარჩევნო კამპანიის ხელმძღვანელი ვიყავი, როგორც ჩვენი პარტიის, ისე გაერთიანებული ოპოზიციის, თავად ვმონაწილეობდი საპრეზიდენტო არჩევნებში და არც ერთხელ ამდენი ხნის განმავლობაში, არც ერთ იურიდიულ ორგანიზაციას და კომპანიას ერთი ლარიც კი არ ჩაურიცხავს ჩვენთვის. მაშინ, როცა უამრავი ორგანიზაცია და ფირმა ურიცხავდა მილიონებს მმართველ პარტიას, ჯერ “მოქალაქეთა კავშირს” და მერე “ნაცმოძრაობას”. თითოეულმა მათგანმა იცოდა, რომ თუ ისინი დაეხმარებოდნენ რომელიმე ოპოზიციურ პარტიას, მათზე გახორციელდებოდა სერიოზული ტერორი და ხელისუფლებისთვის ეს ბერკეტი ყოველთვის იყო და იქნება მომგებიანი ოპოზიციასთან ბრძოლის დროს. ფინანსების გარეშე, ალბათ, დამეთანხმებით, რომ ძალიან ძნელია საარჩევნო კამპანიის წარმოება. ამიტომ, ის, ვინც კოორდინირებულად ვაწარმოებდით მოთხოვნებს და მოლაპარაკებებს ხელისუფლებასთან საარჩევნო კანონმდებლობაზე, ერთ-ერთი მთავარი მოთხოვნა იყო ის, რომ საარჩევნო კამპანიის დასაფინანსებლად კანონით გამოყოფილიყო სოლიდური თანხა. ვითხოვდით, დაახლოებით, 2 მილიონი დოლარის ექვივალენტს, იმისთვის, რომ ყველა ის პარტია, რომელიც გადალახავდა ოთხპროცენტიან ბარიერს, უნდა დაფინანსებულიყო სახელმწიფოს მხრიდან. საბოლოოდ, როცა შეთანხმება შედგა, ჩვენ თავიდანვე ვიცოდით, რომ გარკვეული კომპრომისი იქნებოდა გამარჯვება ორივე მხრიდან. ამ საკითხში კომპრომისი იყო ის, რომ ხელისუფლება დათანხმდა ყველა იმ პარტიის ხარჯების ანაზღაურებას, ვინც გადალახავს არა ოთხპროცენტიან ბარიერს, არამედ, ხუთპროცენტიანს.
_ საერთოდ, არჩევნების მოახლოებასთან ერთად, სოფელ-სოფელ სიარული, პოლიტიკური პარტიების ძველი ჩვეულებაა და როგორც გურულები ამბობენ, “ხალხის დასაფუტებლადაა” მოფიქრებული. ახალს ხედავთ რაიმეს?
_ მინდა გითხრათ, რომ პირველად დავდივარ ასე სოფლებში. არც ერთი პარტია არ დადის ასე სოფელში, თქვენ რომ გგონიათ და ტელევიზით აცხადებენ, პარტიები სოფლებშიაო, ეს სიმართლეა? ჩვენ დავიწყეთ ეს კამპანია, ეს არის ჩვენი გეგმა, რომ სოფელში პრობლემები წინ წამოვწიოთ. თქვენ იცით, ოპოზიციური პარტიებისთვის როგორი შეზღუდულია ცენტრალური არხები, სატელევიზიო სივრცე ჩვენთვის ხელმისაწვდომი არაა, ჩვენი შეხვედრები და მოსაზრებები ფართოდ არ შუქდება და ამიტომ, ჩვენი ერთადერთი საშუალება ესა არის პირდაპირი შეხვედრები მოსახლეობასთან. სოფლის მოსახლეობას უნდა უხაროდეს, როცა სოფელში პოლიტიკოსი ჩამოდის, მაგრამ თქვენც მთელი დღეა, ჩვენთან ერთად ხართ და ხედავთ, როგორ ეშინია ხალხს საუბრისაც კი. თუმცა ასეთი სიტუაცია მარტო ოზურგეთში არაა, ანალოგიური სიტუაცია დამხვდა თელავის სოფლებშიც. რა თქმა უნდა, იოლია, რასაც სააკაშვილი აკეთებს. ყველა საინფორმაციო გადაცემაში, ლამის, ნახევარი საათი სააკაშვილს ეთმობა. ჩვენ ალტერნატივა რა გვაქვს თუ არა მოსახლეობასთან შეხვედრა?
_ ხალხს უკვე არავისი სჯერა და მიიჩნევს, რომ ასეთი პიარკამპანია ყველა პოლიტიკოსს კეთილდღეობისა და პარლამენტში სკამის შესანარჩუნებლად სჭირდება.
_ ეს ნამდვილად არ ეხება “ახალ მემარჯვენეებს”. 2008 წელს უარი ვთქვით დეპუტატის მანდატზე, მე დავჭერი მანდატი და არ შევედი პარლამენტში. მიუხედავად იმისა, რომ მაჟორიტარად ვიყავი არჩეული ვაკეში, ერთ-ერთ პოლიტიკურად პრესტიჟულ და რთულ ოლქში. ასევე იყო არჩეული დავით საგანელიძე დიდუბეში. ფიქრია ჩიხრაძემ, მამუკა კაციტაძემ, მანანა ნაჭყებიამ უარი თქვეს მანდატებზე. პრივილეგიაზე, სკამზე, იმუნიტეტზე, ხელფასებსა და კაბინეტებზე იმიტომ ვთქვით უარი, რომ ჩავთვალეთ, ეს იყო გაყალბებული არჩევნები და ჩვენი პარლამენტში შესვლით არ უნდა მოგვეხდინა ამ გაყალბების ლეგიტიმაცია და დაკანონება სააკაშვილისთვის. თუმცა ეს დიდად არ დაგვიფასეს. ეს კითხვა უფრო სხვას ეკუთვნის და არა დათო გამყრელიძეს.
_ თქვენი აზრით, რომელი პოლიტიკური ძალა გაიმარჯვებს მომავალ არჩევნებში?
_ ჩემი აზრით, ერთი პოლიტიკური ძალა ვერ გაიმარჯვებს უმრავლესობით და ეს იქნება ყველაზე დიდი გამარჯვება ქართველი ხალხისა. ერთპარტიული კონსტიტუციური უმრავლესობა რომ იყო დღემდე, ამან შექმნა ის უზარმაზარი პრობლემები, რაც არის დღეს სოფლებში. მე დარწმუნებული ვარ, რომ იქნება მრავალპარტიული პარლამენტი, მინდა, უმრავლესობის ფორმირებაც მოხდეს.
_ ბატონო დავით, თქვენი აზრით, არჩევნები ჩატარდება თუ არა დემოკრატიულად?
_ გურიაში კიდევ არ არის ისე, როგორც კახეთში, სვანეთში, სამეგრელოში. ეს ყველგან პრობლემაა _ ხალხი დაშინებულია. ადგილობრივი პოლიცია, გამგეობა, ხელისუფლება ძალიან აქტიურად აშინებს ხალხს და ეუბნება, თუ ჩვენ არ მოგვცემ ხმას, მოგიხსნით დახმარებებს, შეგიქმნით პრობლემებს. შესაბამისად, ამ შიშის გამო, ადამიანები იძულებულნი არიან, ხმა არ მისცენ ან არ მოვიდნენ სხვა პოლიტიკური პარტიის შეხვედრაზე.
