წინა კვირას, ტელევიზიებით გავრცელდა ჯანდაცვის სამინისტროს ახალი ინიციატივა: თუ სოციალურმა აგენტმა თქვენს სახლში აღმოაჩინა მტვერსასრუტი, ფერადი ტელევიზორი, ტოსტერი ან კომპიუტერი(?!) არ შეშინდეთ _ ეს ვერანაირ გავლენას ვერ მოახდენს სოციალურად დაუცველის სტატუსის მინიჭებაზე.
მსგავსი ინიციატივები, განსაკუთრებით, წინასაარჩევნოდ, ხშირად მოგვისმენია, მაგრამ ყველამ კარგად იცის _ მოხვდება თუ არა ოჯახი სოციალურად დაუცველთა ბაზაში, ხშირად აგენტის კეთილგანწყობაზეა დამოკიდებული.
ლანჩხუთელი შაქრო დიასამიძის მრავალსულიანი ოჯახისთვის ეს დახმარება არსებობის ერთადერთი წყაროა, მაგრამ გასული წლის სექტემბრიდან სტატუსი მოულოდნელად შეუწყვიტეს, ამის მიზეზი, როგორც ოჯახის დიასახლისი ამბობს, მეზობლების შეტყობინება აღმოჩნდა. ყოველ შემთხვევაში, ასე განუმარტა მათ სოციალურმა აგენტმა. ოჯახის 2 წევრი თითქმის ერთდროულად დაქორწინდა და მეუღლესთან გადავიდა საცხოვრებლად. სახელმწიფომ ჩათვალა, რომ ეს ცვლილება გაუმჯობესებას ნიშნავს დიასამიძეების ოჯახისთვის, რომლის არც ერთი წევრი არ მუშაობს. ოჯახში ცხოვრობს მოზარდი _ 11 წლის ბავშვი, რომელსაც ზრდისა და განვითარებისთვის არ აქვს ელემენტარული პირობები.
2012 წლის დასაწყისში, შაქრო დიასამიძე შეეცადა გაერკვია დახმარების შეწყვეტის მიზეზი და ახალი განცხადება შეიტანა სააგენტოში. მასთან მისულმა სოციალურმა აგენტმა გულდასმით შეისწავლა ოჯახის უმძიმესი მდგომარეობა. სახლი, რომელშიც ცხოვრობენ, ადგილობრივი ხელისუფლების დახმარებით შეისყიდეს, მაგრამ მათ საცხოვრებელს სახლი მხოლოდ პირობითად შეიძლება ეწოდოს _ ოთახებში ნაწილობრივად არ არის იატაკი, ჭერი, ფანჯრების ნაწილი შეუმინავია. ოჯახს არ აქვს არანაირი საყოფაცხოვრებო ტექნიკა, სახლში მხოლოდ აუცილებელი ავეჯია. დიასამიძეებს ერთადერთი ძროხა არჩენს, რომლის ნაწარმს დიასახლისი მთელი კვირის განმავლობაში აგროვებს და ბაზარში ყიდის, რომ პურის ფული იშოვოს.
ყველა ეს მონაცემი შესულია აგენტის მიერ შევსებულ დე¬კლარაციაში, მაგრამ მიუხედავად ამისა, დიასამიძეების სარეიტინგო ქულა 60 ათასს აღემატება, რის გამოც შეუწყდათ კიდეც დახმარება. სად წყდება ამ ადამიანების ბედი, ვინ ანიჭებს არაფრისმქონეებს მაღალ ქულებს, ლანჩხუთის სოციალური სააგენტოს თანამშრომლებმა არ იციან. მათ აგვიხსნეს, რომ ქულების მინიჭება ხდება სპეციალური კომპიუტერული პროგრამით! თუმცა, კომპიუტერში ხომ თავად ადამიანებს შეჰყავთ მონაცემები?! ამ შემთხვევაში, აგენტს კეთილი ნება გამოუჩენია და სამართლიანად შეუფასებია დიასამიძეებთან არსებული მდგომარეობა, მაგრამ ეს ფაქტი მაინც ვერ დაეხმარა მძიმე მატერიალურ მდგომარეობაში მყოფ მრავალსულიან ოჯახს.
ახალი განცხადების დაწერის უფლება მათ მხოლოდ ერთი წლის შემდეგ ეძლევათ. გასაჩივრების უფლების გამოყენებას კი არც აპირებენ _ სამართლის პოვნის იმედი მაინც არ აქვთ.
“ჩემი შვილი თურქეთში წავიდა სამუშაოდ, მაგრამ ჯგუფის რომელიღაც წევრს საბუთები არ ჰქონდა წესრიგში და დეპორტაცია შეეხოთ _ ახლა თურქეთშიც ვეღარ წავა სამუშაოდ. ყველს არ ვაჭმევ ბავშვებს, ვაგროვებ და ვყიდი, რომ ფქვილი და აუცილებელი პროდუქტი ვიყიდო. ეს დახმარება იყო ჩვენი ერთადერთი მუდმივი შემოსავალი. ახლა კი აღარაფრის იმედი აღარ მაქვს. სადაც გინდა იქ იჩივლე, მაინც ვერაფერს მოიგებო, ასე მითხრეს სააგენტოში,” _ ამბობს ლალი დიასამიძე.
დიასამიძეები მძიმე ფიზიკურ შრომასაც არ გაურბიან, მაგრამ ძალიან იშვიათად გამოჩნდება ვინმე, ვინც შრომის საფასურს აუნაზღაურებს და დროებით მაინც მისცემს თავის გატანის შესაძლებლობას.
