ბატონო გიორგი,
გწერთ რათა გამოვხატოთ ჩვენი მოსაზრებები თქვენი გამოცემის ვებ-გვერდზე გამოქვეყნებული ა/წ 26 აპრილის სტატიასთან დაკავშირებით, რომელიც ეხება “ჯორჯიან რესორს კომანიას” საძიებო-კვლევით პროექტს ყელას მთის მიმდებარე ტერიტორიაზე.
სტატიის შინაარსი შეცდომაში შემყვანია და გაჯერებულია “ჯორჯიან რესორს კომპანია”-ს შესახებ უსაფუძვლო და მცდარი ინფორმაციით. მეტიც, შინაარსი მიკერძოებულია, აგრესიული და მოკლებული ყოველგვარ საფუძველსა და არგუმენტს. აქედან გამომდინარე მოვითხოვთ, რომ სტატია უკუაგდოთ და ასევე გამოაქვეყნოთ მომდევნო სტატია “ჯორჯიან რესორს კომპანიას” განმარტებებით.
_ “ჯორჯიან რესორს კომპანია” არის მთლიანად “ლიდიან ინტერნეშენალ ლიმტედ”-ის მფლობელობაში (ლიდიანი). ლიდიანი რეგისტრირებულია ჯერსიში, დიდი ბრიტანეთი (დიდი ბრიტანეთისა და ჩრდილოეთ ირლანდიის გაერთიანებული სამეფო) და მისი აქციები საჯარო გაყიდვაშია ტორონტოს საფონდო ბირჟის (კანადა) მთავარი სიიდან 2008 წლიდან და მისი აბრევიატურაა (TSX:LYD). ლიდიანი წარმოადგენს მრავალპროფილიან საძიებო და განვითარების კომპანიას, და რომელსაც აქვს გამოცდილება განვითარებად გარემოში “პირველი ინვესტორის” სტრატეგიაში. კომპანიის საქმიანობა ვრცელდება აღმოსავლეთ ევროპაზე, ხოლო ამჟამად იგი აწარმოებს საძიებო საქმიანობას კავკასიის რეგიონში.
_ ლიდიანის ხელმძღვანელობას აქვს წარმატებული გამოცდილება ახალ აღმოჩენებში და დაუდგენელი აქტივების განვითარებაში. კომპანიას გააჩნია მძლავრი გარემოსდაცვითი და სოციალური პროგრამა, რომელსაც იგი ზედმიწევნით იცავს, ხოლო მისი საქმიანობა ამ კუთხით მუდმივად კონტროლდება კომპანიის აქციონერების მიერ (აქციონერთა შორისაა საერთაშორისო განვითარების ბანკები) უმკაცრესი საერთაშორისო ჯანმრთელობის დაცვისა და უსაფრთხოების სტანდარტების შესაბამისად.
_ ზოტის პროექტი არ არის საბადოს მოპოვება, არამედ აღნიშნული პროექტი არის ადრეულ შესწავლის სტადიაში;
_ “ჯორჯიან რესორს კომპანიამ” მოძიების ლიცენზია მიიღო 2011 წლის ოქტომბერში, ხოლო 2011 წლის ნოემბერში კომპანიამ ადგილობრივ ხელისუფლებას გადასცა როგორც ლიცენზიის ასლი, ისე სხვა ყველა თანმხლები დოკუმენტაცია;
_ ტერიტორიაზე აღებული სინჯების ანალიზი ჩაატარა საერთაშორისოდ აღიარებულმა ლაბორატორიამ, რომლის შედეგებიდან გამომდინარე ნიმუშებში ურანის ან სხვა რადიოაქტიური ნივთიერებების ოდენობა თითქმის ვერ დგინდება სიმცირის გამო, რაც დასაშვებზე ნაკლებია.
_ ამჟამად მიმდინარეობს გარემოს კვლევა, რომელიც ასევე მზადდება დამოუკიდებელი ორგანიზაციის მიერ. კვლევის დასრულებისთანავე შედეგები სრულად მიეწოდება ადგილობრივ საზოგადოებას, შესაბამის ორგანოებს და სხვა დაინტერესებულ პირებს.
_ ლიდიანსა და “ჯორჯიან რესორს კომპანიას” კორპორატიული პასუხისმგებლობის მაღალი კულტურა აქვთ, რაც გვაძლევს საფუძველს ვიამაყოთ, რომ ყოველთვის ვიცავთ ადგილობრივ კანონმდებლობას და ყველაზე მკაცრ საერთაშორისო სტანდარტებს რაც დასტურდება 2011 წელს საერთაშორისო გამოცემა მაინინგ ჯორნალის (რომელიც მთლიანად ეხება სასარგებლო წიაღისეულს) პრიზით (Mინინგ ჯოურნალ) ნომინაციაში საუკეთესო საძიებო კომპანია.
_ ასევე გვინდა ხაზი გავუსვათ, რომ არ არსებობს “ოქროს აღმომჩენი აპარატი” და მსგავსი რამ ჯერ არ გამოგონილა. აპარატი წარმოადგენს მაგნიტომეტრს, რომელიც გამოიყენება სხვადასხვა ტიპის ქანების დადგენაში. მაგნიტომეტრის გაუმართაობის მიზეზი გახლავთ მისი კვების ელემენტის მწყობრიდან გამოსვლა.
_ ტერიტორიაზე არ არის ურანი, ხოლო რაც შეეხება მეხის ვარდნას, იგი არ არის გამოწვეული ამის გამო.
სტატია მოგვიწოდებს, რომ ჩავატაროთ გარემოზე ზემოქმედების შეფასება. გარემოზე ზემოქმედების შეფასების მომზადებას პირდაპირ გვავალდებულებს კანონმდებლობა, და რომელსაც აუცილებლად მოვამზადებთ არა მხოლოდ იმიტომ, რომ ამას ითხოვს კანონი, არამედ უმთავრესად იმიტომ, რომ ეს არის ჩვენი ვალდებულება ჩვენი ინვესტორების, ადგილობრივი საზოგადოების და სხვა დაინტერესებული პირების მიმართ.
ლიდიანი, რომლის ნაწილია “ჯორჯიან რესორს კომპანია” ამაყობს სოციალური პასუხისმგებლობის მქონე კომპანიის სტატუსით, საქართველოს კანონმდებლობის, საერთაშორისო საუკეთესო პრაქტიკაზე დაფუძნებული უმკაცრესი გარემოსდაცვითი და სოციალური სტანდარტების დაცვით, ასევე ვამაყობთ ჩვენი აქციონერებითა და კომპანიის მმართველი გუნდით. ჩვენ ძალიან სერიოზულად ვუდგებით ჩვენ რეპუტაციაზე უსაფუძვლო, დაუსაბუთებელი, უპასუხისმგებლო და არამეცნიერული გალაშქრების ნებისმიერ ფაქტს, ისეთს როგორიც გამოქვეყნდა თქვენ ვებ-გვერდზე. “ჯორჯიან რესორს კომპანია” გამოიყენებს ყველა დასაშვებ საშუალებას მათ შორის იურიდიულსაც, რათა დაიცვას თავისი რეპუტაცია და სახელი.
პატივისცემით, ნერსეს კარამანუკიანი
(სტილი დაცულია)
ნატო გოგელია, სტატიის ავტორი: ბატონო ნერსეს, დავიწყებ ცოტა შორიდან: “ჯორჯიან რესორს კომპანიზე” პირველი სტატია 2011 წლის 25 სექტემბერს გამოქვეყნდა _ აუქციონში თქვენი გამარჯვებიდან ძალიან მალე. აღნიშნულ სტატიაში, ადგილობრივების კომენტარის გარდა, მოტანილი იყო პასუხისმგებელი პირების კომენტარებიც, მათ შორის, თქვენიც, სადაც გვწერდით, რომ ფორმალური პროცესების დასრულების შემდეგ, დეტალებს გაგვაცნობდით.
დეტალების გაცნობას კი საკმაოდ დიდი ხანი დააგვიანდა _ თქვენგან ამ საკითხზე დღემდე არ მიგვიღია წერილი. მოგვიანებით, ჩვენი გაზეთის ფეისბუქის გვერდზე დაგვხვდა შეტყობინება, რომლის თანახმადაც, აღნიშნულ თემაზე კითხვების გაჩენის შემთხვევაში, უნდა მოგვემართა გივი პეტრიაშვილისთვის (რომელიც, თქვენი წერილის თანახმად, პროექტის მენეჯერია).
ბატონ გივის, რამდენიმე წერილი მივწერე, სადაც კითხვებზე პასუხის გაცემას ვთხოვდი, თუმცა, პასუხი, არც მისგან მიმიღია. დღემდე, ადგილობრივი ხელისუფლება ამბობს, რომ თქვენი საკონტაქტო კოორდინატები არ აქვთ. ის სტატია, რომელზეც თქვენ გაქვთ საუბარი, ადგილობრივი მოსახლეობის კომენტარებს, მოსაზრებებს და ინფორმაციას ეყრდნობა და ყველა წყარო მითითებულია. როგორც უკვე აღვნიშნეთ, თქვენი კომპანიის პოზიციის დაფიქსირება ბოლო სტატიაში მხოლოდ იმ მიზეზით ვერ მოხერხდა, რომ თავად არ ისურვეთ კითხვებზე პასუხის გაცემა. ზემოთ აღნიშნული არც ერთი თქვენი პრეტენზია რედაქციის მოსაზრებებს არ ასახავს _ ჩვენ მხოლოდ იმ ადამიანების მოსაზრებები დავაფიქსირეთ, რომლებიც იქ ცხოვრობენ, უსაფრთხო საცხოვრებლის უფლებას საქართველოს კონსტიტუცია, საერთაშორისო კანონმდებლობა ანიჭებთ და რომლებიც თქვენგან შესაბამის ქმედებებს მოითხოვენ. ჩვენი ვალდებულება კი საზოგადოების კანონიერი მოთხოვნების დაფიქსირება, მხარდაჭერა და მონიტორინგია.
თქვენ წერთ: “გარემოზე ზემოქმედების შეფასების მომზადებას პირდაპირ გვავალდებულებს კანონმდებლობა და რომელსაც აუცილებლად მოვამზადებთ არა მხოლოდ იმიტომ რომ ამას ითხოვს კანონი, არამედ უმთავრესად იმიტომ, რომ ეს არის ჩვენი ვალდებულება. ჩვენი ინვესტორების, ადგილობრივი საზოგადოების და სხვა დაინტერესებული პირების მიმართ….” თუმცა, არ აკონკრეტებთ დროს _ როდის მოამზადებთ ანგარიშს, როცა სამუშაოებს დაასრულებთ? ამ კითხვის დასმის საფუძველს გვაძლევს თქვენს წარმომადგენლად დასახელებული გივი პეტრიაშვილის მიერ ფეისბუქზე განთავსებული ფოტოები, რომელიც ზოტში სამუშაოების დაწყებას მოწმობს, თუმცა ისე, რომ გარემოზე ზემოქმედების ანგარიში ჯერ არ გვინახავს _ თუ გაქვთ და გამოგვიგზავნით, ისევე, როგორც თქვენი კომპანიიდან მოწოდებულ სხვა ინფორმაციას, ჩვენც გავეცნობით და მოსახლეობასაც გავაცნობთ! მით უმეტეს, რომ თქვენივე სიტყვებით, მის მომზადებას სამუშაოების დაწყებამდე, პირდაპირ გავალდებულებთ კანონმდებლობა.
რაც შეეხება თქვენს რეპუტაციას, ჩვენ მას არ შევხებივართ, თუმცა, ბოლო წლების პრაქტიკა გვკარნახობს, რომ განსაკუთრებული გულისყურით მოვიძიოთ და საზოგადოებას გავაცნოთ დეტალური ინფორმაცია მომრავლებულ ტენდერებში გამარჯვებული კომპანიების შესახებ; ეს ჩვენი პროფესიული და საზოგადოებრივი მოვალეობაა _ საქართველო ჩვენი სამშობლოა და მისი ბუნების სიჯანსაღის, თითოეული მოქალაქის ინტერესის დაცვა ჩვენი გამოცემის უზენაესი მიზანია. ამ მიზნის მისაღწევად კი, როგორც თქვენ ახსენებთ, ყველა დასაშვები საშუალება გამოვიყენოთ _ იურიდიული იქნება თუ მოქალაქეობრივი!
ამ თემაზე გამოქვეყნებულ ყველა მასალაში გამოყენებული კომენტარები, ადგილობრივი მოსახლეობის მიერ გამოთქმული წუხილი, ეჭვი, მოსაზრება, მოთხოვნა, ასევე გარემოსდამცველების შეფასებები ვიდეო ფაილების სახით, დაინტერესების შემთხვევაში, შეგიძლიათ იხილოთ ჩვენს ვებ-გვერდზე www.gurianews.com.
