რამოდენიმე დღის წინ “გურია ნიუსს” ერთი ქალბატონი ესტუმრა, რომელიც ძალიან შეწუხებული იყო მათი სახლების წინ დაყრილი ნაგვის გროვების გამო. იგი ჩვენი საშუალებით ცდილობდა იმის გარკვევას, რომელი სამსახურის ვალდებულებაა ამ პრობლემის მოგვარება.
ორაგვისღელის მარჯვენა სანაპირო სოფელ გვიმბალაურის მცხოვრებთა უკანა ეზოებს ესაზღვრება, მარცხენა სანაპირო კი ქალაქის ტერიტორიაა და აქ, მდინარის გასწვრივ მოსახლეობა ცხოვრობს. სწორედ ეს ხალხია შეწუხებული ნაგვის გორებით, რომელიც ერთ მშვენიერ დღეს, აქ მოულოდნელად “ამოიზარდა”.
ქალაქის დასუფთავების სამსახურში ამ ფაქტის შესახებ არაფერი იცოდნენ. სამსახურის უფროსმა თენგიზ ჭიჭილეიშვილმა განმარტა, რომ ეს ტერიტორია ადმინისტრაციულად არ მიეკუთვნება ქალაქს, ხოლო ლანჩხუთის მოსაზღვრე სოფლების დასუფთავების ვალდებულება მათ სამსახურს არ აქვს: _ ბოლო წლების განმავლობაში ლანჩხუთში მკვეთრად შეიცვალა სიტუაცია დასუფთავების თვალსაზრისით. თქვენ ამას ვერ ამჩნევთ? შემოვიტანეთ და მთელი ქალაქის ტერიტორიაზე დავდგით ნაგვის ბუნკერები, ჩამოვიყვანეთ ახალი ნაგავმზიდი მანქანები. ყოველდღე ხდება ქალაქის დასუფთავება. ვინ დაყარა ნაგავი ამ ტერიტორიაზე, არ ვიცი. ის ნამდვილად ვიცი, რომ ჩვენს სამსახურს არ დაუყრია. ჩვენი მანქანები ნაგავს ქალაქგარეთ მოწყობილ ნაგავსაყრელზე ეზიდებიან, _ გვითხრა დასუფთავების სამსახურის უფროსმა.
ჭიჭილეიშვილმა საყვედურიც გამოთქვა ზოგადად მედიის მისამართით, რაც კარგი ხდება, იმაზე რატომ არ წერთო. ახლა დავწერთ, ბატონო თენგიზ! ძალიან კარგია, რომ ყოველდღიურად ასუფთავებთ ქალაქს და ნაგავში არ გვახრჩობთ, მაგრამ ეს თქვენი ვალდებულებაა და ამაში სოლიდურ ხელფასებსაც იღებთ. ამ შემთხვევაში, ჩვენ კონკრეტული პრობლემა გვაინტერესებს _ რატომ გაჩნდა ნაგვის უზარმაზარი გორები მდინარე ორაგვისღელის დასახლებულ სანაპიროზე და ვინ უნდა მიხედოს ამ პრობლემას?
დასუფთავების სამსახურმა ზედამხედველობის სამსახურში გაგვაგზავნა _ ისინი არიან პასუხისმგებელი ქალაქის იერსახისა და მოწესრიგების საკითხებშიო.
ლანჩხუთის მუნიციპალიტეტის ზედამხედველობის სამსახურის თანამშრომელმა მიხეილ ჩერქეზიამ განმარტა, რომ მისმა უწყებამ მოსახლეობის თხოვნის საფუძველზე, სამშენებლო ნარჩენებისგან გაწმინდა ლანჩხუთის ცენტრალური უბანი; პირველი სკოლის მიმდებარე ტერიტორია _ ცენტრალურ მაგისტრალზე მდგარი მოსაცდელის ირგვლივ. ეს ნარჩენები, როგორც ჩერქეზია ამბობს, სამშენებლო ბლოკები და სინკარები, სატვირთო მანქანით წაიღეს და მდინარე ორაგვისღელის ნაპირზე დაყარეს. მიხეილ ჩერქეზია კატეგორიულად უარყოფს საყოფაცხოვრებო ნარჩენების (ცელოფნის პარკები, პლასტმასის ბოთლები) დაყრას.
ჩვენ ადგილზე ზედამხედველობის სამსახურის წარმომადგენელთან ერთად მივედით და ვაჩვენეთ იქ დაყრილი ნაგავი. მიხეილ ჩერქეზია ამტკიცებს, რომ მისმა სამსახურმა იქ მხოლოდ სამშენებლო ნარჩენები მიიტანა, ხოლო საყოფაცხოვრებო ნაგავი შემდგომში მოსახლეობამ თავად დაყარა. საგულისხმოა ის ფაქტიც, რომ ახლომახლო ნაგვის ბუნკერებიცაა განთავსებული და მოსახლეობას ნაგვის გადაყრის პრობლემა ნამდვილად არ აქვს.
ჩვენ არ შეგვიძლია ვინმეს რამე დავაბრალოთ. ვალდებული ვართ ეს ფაქტი შესაბამის სამსახურებს და მკითხველს შევატყობინოთ, მოსახლეობას კი შევახსენებთ, რომ ყოველი ჩვენთაგანი ვალდებულია გაუფრთხილდეს და მოუაროს გარემოს, რომელშიც ვცხოვრობთ.
ამ მასალაზე მუშაობისას ვერაფრით დავადგინეთ, რომელი სამსახურის მოვალეობაა მსგავს ფაქტებზე რეაგირება. ლანჩხუთის დასუფთავების და ზედამხედველობის სამსახურები მხოლოდ ქალაქის ტერიტორიის კეთილმოწყობაზე ზრუნავენ და სულაც არ ადარდებთ ტერიტორიები, რომლებიც ქალაქს არ ეკუთვნის და ნაგავსაყრელებად არის ქცეული.
