_ ასეთ კომენტარს “გურია ნიუსთან” “პროკრედიტ ბანკის” მარკეტინგის წარმომადგენელი, თეონა ლეჟავა აკეთებს.
კანონი, რომელიც 12 ივნისს შევიდა ძალაში და რომლის შესახებაც საქართველოს მოსახლეობის უდიდესმა ნაწილმა არაფერი იცის, საფრთხეს უქმნის ნებისმიერ მოქალაქეს, ვინც ყადაღის შესახებ ინფორმაციას გაახმაურებს.
“მუხლი 3741 . მიხედვით, საბანკო ანგარიშის მონიტორინგის, მასზე ყადაღის დადებასთან ან კომპიუტერულ მონაცემთან დაკავშირებული საგამოძიებო მოქმედებების შესახებ მონაცემების გახმაურება ისჯება ჯარიმით ან თავისუფლების აღკვეთით ვადით სამ წლამდე.
26 ივლისს, ლანჩხუთში, “ქართული ოცნების” “კარდაკარის” მონაწილეებმა თავიანთ ანგარიშებზე, რომელიც “საქართველოს ბანკში” ჰქონდათ გახსნილი, კოლოსალური რაოდენობის ჯარიმა აღმოაჩინეს.
“კარდაკარის” ერთ-ერთი მონაწილე, რომელმაც 999 999 ლარიანი ჯარიმის შესახებ შეიტყო, ბანკიდან პირდაპირ რეანიმაციაში გადაიყვანეს. ნერვიულობის ნიადაგზე მას ასთმური შეტევა დაემართა და ლანჩხუთის საავადმყოფოს რეანიმაციულ განყოფილებაში დასჭირდა მკურნალობის გავლა. ამ ბატონმა მაშინ ჯერ კიდევ არ იცოდა, რომ იმ ცხრიანებში, რომელიც მან ქვითარზე ამოიკითხა, სამი ცხრიანი გამორჩა _ დაფიქსირებული ჯარიმის ოდენობა გაცილებით მეტი იყო!
“გურია ნიუსმა” მოიპოვა ერთ-ერთი დაყადაღებული აბონენტის საბანკო ქვითარი, რომელზედაც ანგარიშზე ნაშთად მითითებულია არა მინუს 999 ათას 999 ლარი, არამედ… მინუს 999 მილიონ 999 ათას 991 ლარი და 79 თეთრი!!!
“საქართველოს ბანკმა” მხოლოდ დღეს გაავრცელა ინფორმაცია იმის შესახებ, რომ ეს “ტექნიკური ხარვეზი” იყო და ამ ადამიანების ანგარიშები დაყადაღებული არ იყო.
საინტერესოა ერთი დეტალი: “ტექნიკური ხარვეზი”, როგორც ამას ბანკი უწოდებს, ზუსტად ერთნაირი მონაცემებით მხოლოდ “ქართული ოცნების” აქტივისტებზე გავრცელდა, როგორც ლანჩხუთში, ასევე ზუგდიდში!
ეკონომიკის ექსპერტი, ” ჯორჯიან ბიზნეს კონსალტინგის” კომერციული დირექტორი, ირაკლი ლექვინაძე “გურია ნიუსთან” საუბრისას განმარტავს:
_ანგარიშის დაყადაღება ხდება იმ შემთხვევაში, თუ ფიზიკურ ან იურიდიულ პირს აქვს ვადაგადაცილებული ვალდებულებები და ანგარიშზე თანხის გაჩენის შემთხვევაში, ხდება მისი ავტომატურად ჩამოჭრა და მეორე _ ანგარიშზე თანხის მოძრაობა მიჩნეულია საეჭვოდ, ფულის გათეთრების მიზნით. თუმცა, ამას მხოლოდ ბანკი არ წყვეტს და შესაბამისი უწყებების მითითებაა საჭირო. ნებისმიერ შემთხვევაში, ბანკის მხრიდან ასეთი ქმედება უნდა იყოს მომხმარებლისა და კლიენტის ინტერესზე აწყობილი და წინასწარი შეტყობინება, გაფრთხილება კლიენტმა უნდა მიიღოს.”
“გურია ნიუსმა” ინფორმაცია ზუგდიდშიც გადაამოწმა და აღმოჩნდა, რომ ანალოგიურად, “ქართული ოცნების” “კარდაკარის” 4 მონაწილეს კუთვნილ ანგარიშიდან თანხის გამოტანა არ შეეძლო. 3 მათგანი, “ქართული ოცნების” იურისტის თქმით, “პროკრედიტ ბანკის” კლიენტია.
ბანკის ზუგდიდის ფილიალში ამ ადამიანებს განუცხადეს, რომ მხოლოდ 10 დღის შემდეგ შეატყობინებდნენ ინფორმაციას პირად ანგარიშებზე არსებული ხარვეზის შესახებ.
“პროკრედიტ ბანკს” ოფიციალური განცხადება ჯერ არ გაუკეთებია. ინფორმაციის გადასამოწმებლად “გურია ნიუსი” დაუკავშირდა “პროკრედიტ ბანკის” მარკეტინგის სპეციალისტის, თეონა ლეჟავას.
_ ქალბატონო თეონა, მომხმარებელს თავისი ანგარიშის შესახებ ინფორმაციის მიღება რამდენ ხანში შეუძლია?
_ განცხადების დაწერიდან 5 დღის ვადაში.
_ პირადი ანგარიშის შესახებ ინფორმაციის გაცემას ხუთი დღე სჭირდება?
_ გააჩნია, რას გულისხმობთ.
_ ზუგდიდში, რამდენიმე მოქალაქეს უთხრეს, რომ მათი ანგარიში დაბლოკილია, მაგრამ არ ეუბნებიან მიზეზს, 10-დღიან ვადას ითხოვენ.
_ გააჩნია, რასთან გვაქვს საქმე, თუ ადამიანს აქვს ის პრობლემები, რასაც თქვენ ამბობთ, მაგას ჭირდება გარკვეული პროცედურები. იგზავნება კლიენტის განცხადება სათაო ოფისში, ხდება ამ პრობლემის გამოძიება და პასუხს ამის შესახებ მიიღებს თითონ კლიენტი. ამიტომ არის ოფიციალური ვადა აღებული. შესაბამისად, როგორც ჩანს, კონკრეტული ადამიანების ანგარიშთან დაკავშირებით, რაღაც პრობლემაა.
_ და რა სახის ჯარიმასთან აქვთ საქმე, ამის გარკვევას 10-დღიანი ვადა სჭირდება?
_ რატომ გგონიათ, რომ ეს არის ჯარიმა? ეს არის უბრალოდ ანგარიშები, რომელსაც ვერ გამოიყენებს იქამდე, სანამ არ მოუვათ ოფიციალური პასუხი. ისინი აუცილებლად მიიღებენ პასუხს. ეს არის კონფიდენციალური ინფორმაცია, კანონით გათვალისწინებული, ჩვენ ამ კანონს ვემორჩილებით და კლიენტს გაეცემა პასუხი ვადის ფარგლებში.
_ ანუ, 10 დღის ვადა დარჩება?
_ შესაძლებელია, უფრო ადრეც. გააჩნია, რა პროცედურები იქნება ჩასატარებელი.
_ რაც შეეხება, სისხლის სამართლის კოდექსში შესულ ცვლილებას, უკვე მოქმედებთ ამ ცვლილებების შესაბამისად და ინფორმაციის გაუცემლობაც ამას უკავშირდება?
_ ჩვენ ყველანაირად ვემორჩილებით ამ კანონებს და ცვლილებებს. თუ კონკრეტული კითხვა გაინტერესებთ ამ ცვლილებებთან დაკავშირებით, მიმართეთ ამ კანონის შემომღებს.
_ ეკონომიკის ექსპერტები ამბობენ, რომ საბანკო სექტორი ძალიან პოლიტიზირებული გახდა, რაც ლახავს მომხმარებელთა უფლებებს.
_ არა, მაგას ვერ დაგიდასტურებთ; ჯობს მაგ კანონის შემომღებს ესაუბროთ. ჩვენ ვემორჩილებით კანონს.
ამ კანონის ხელმომწერი და ძალაში შემყვანი, საქართველოს პრეზიდენტი მიხეილ სააკაშვილია. ქალბატონი თეონას არაერთგზის რჩევის მიუხედავად, ზუსტად ვიცით, რომ მასთან შეხვედრა ვერ შედგება. ამიტომ, ისევ დამოუკიდებელი ექსპერტის კომენტარს შემოგთავაზებთ:
ირაკლი ლექვინაძე: “გაურკვეველია, რატომ უნდა ისჯებოდეს ყადაღის გახმაურება თავისუფლების აღკვეთით. ეს ბიზნესისა და ანგარიშის მფლობელის თავისუფლების შეზღუდვაა და დაუშვებელია.
ამ შემთხვევაში, საქმე გვაქვს უფრო პოლიტიკურ მოტივებთან და სამწუხაროა, რომ მასში ჩართულები არიან კომერციული ბანკები, რომლებიც წესით აპოლიტიკური და კერძო ბიზნესია.
