დღის წესრიგით გათვალისწინებული ოთხი საკითხიდან, სამი ცვლილებებს შეეხო, ერთი კი საარჩევნო-სააგიტაციო მასალების რეგულირებას. აღსანიშნავია, რომ ასეთი ხმაურიანი სხდომა, კარგა ხანია, ამ დარბაზში არ ყოფილა.
პირველი საკითხის ირგვლივ _ “ოზურგეთის მუნიციპალიტეტის 2012 წლის ბიუჯეტის დამტკიცების შესახებ”, ოზურგეთის მუნიციპალიტეტის საკრებულოს 2011 წლის 9 დეკემბრის დადგენილებაში ცვლილების შესახებ, კობა ხაბალაშვილმა ისაუბრა. მან აქცენტი სოციალურად დაუცველ ადამიანთა განცხადებებზე გააკეთა, რომლებიც სასწრაფო რეაგირებას ითხოვენ: _ რამდენიმე სოფლის რწმუნებულების წერილობითი მომართვის საფუძველზე, “სოფლის მხარდაჭერის პროგრამის” ფარგლებში გასატარებელია ცვლილებები, რათა დროულად გახორციელდეს დასახული პროექტები. ამ მიზეზებმა აუცილებელი გახადა, რომ 2012 წლის დამტკიცებულ ბიუჯეტში ცვლილებები მოხდეს, _ აღნიშნა ხაბალაშვილმა და ისაუბრა დღევანდელი მონაცემებით ბიუჯეტში მობილიზებული შემოსავლის _ 30 700 ლარის შესახებ, რომელიც სასოფლო-სამეურნეო დანიშნულების მიწის, არასასოფლო-სამეურნეო მიზნით გამოყოფისას სანაცვლო მიწის ათვისების ღირებულებისა და მიყენებული ზიანის ანაზღაურებიდან არის მიღებული. ხაბალაშვილმა განაცხადა, რომ ეს ყოველივე და კიდევ ჯარიმებიდან მიღებული შემოსავლები _ 60 000 ლარი, ბანკიდან მიღებული სარგებელი _ 20 000 ლარი, მიწაზე ქონების გადასახადი _249500 ლარი, იძლევა საფუძველს, ბიუჯეტში სულ მობილიზებული იქნეს 335 500 ლარი შემოსავლების სახით.
მიღებული შემოსავლებიდან დაფინანსებულ პროგრამებსა თუ ორგანიზაციებს შორის მეტი წილი სოციალურ დახმარებებზე მიდის _ 97 000 ლარი. მათ შორის, გაჭირვებულ მოქალაქეთა დახმარებები _ 80 000 ლარი. ასევე დაკრძალვების ხარჯი _ 5000 ლარი. ძალიან ხშირად ფიგურირებს სხვადასხვა ორგანიზაციების “ხელშეწყობით” გათვალისწინებული თანხები. მაგალითად, საბავშვო ბაღებისთვის 30000-ლარიანი ხელშეწყობა, კომუნალური მომსახურების ცენტრისთვის 4000-ლარიანი ხელშეწყობა, დასუფთავების სამსახურისთვის 20000-ლარიანი ხელშეწყობა, პოლიციას 5000-ლარიანი ხელშეწყობა…
ოპოზიციონერი დეპუტატი, ლელა ნაცვალაძე ხაბალაშვილთან კამათში ჩაერთო: _ მიფუჩეჩებას ნუ ცდილობთ! ცალ-ცალკე, კარგად გაშიფრეთ, რას რამდენი სჭირდება და ეს “ხელშეწყობა” რას ნიშნავს, ამიხსენით. საცხენოსნო კლუბ “მარულას” რა ხელშეწყობას უწევთ, წლის დასაწყისში რამდენით აფინანსებდით და ახლა რისთვის დაუმატეთ, პოლიციის და დღის ცენტრის დაფინანსებას რა პრინციპით ახდენთ?
კობა ხაბალაშვილმა განმარტება სცადა, ხელშეწყობა არის სუბსიდირება, “მარულას” წლის დასაწყისში კვებაზე ორიენტირებული თანხები ჰქონდა, ახლა შეშაზეა ორიენტირებულიო. ნაცვალაძეს არაფრის გაგონება არ სურდა, რადგან ამ ყველაფრის არ სჯეროდა და კითხულობდა, ასე კატასტროფულად რატომ გაიზარდა ოზურგეთის ბიუჯეტი, ამიხსენითო.
_ აუხსენით! _ მიმართა საკრებულოს თავმჯდომარემ ალეკო მამეშვილმა ხაბალაშვილს, თან ლელას მიმართა: _ კომისიის სხდომებს შენ არ ესწრები, არც ერთი თეთრის განაწილებაში მონაწილეობა არ მიგიღია, ახლა მოხვედი და ითხოვ განმარტებებს, ასე არ შეიძლება!
_ ის შეიძლება, რომ ორი ოპოზიციონერი დეპუტატის გარდა, ყველა დაფინანსებული გყავთ მაღალი ხელფასებით? რაკი თქვენ არ მაძლევთ პასუხს, მაშინ მე გეტყვით, რა მაინტერესებს, რადგან აბსოლუტურად გაურკვეველია ჩემთვის, ეს “ხელშეწყობები” რას ნიშნავს.
_ შენ მკვდრები არ გინდა დავასაფლავოთ და ბავშვებს საბავშვო ბაღში დავეხმაროთ? თან სულ ასე შეურაცხყოფას გვაყენებ. აი, თემურ სალუქვაძე გვაკრიტიკებს, მაგრამ არ ილანძღება, _ შეედავა ქალბატონ ლელას ძიმითის პოზიციონერი დეპუტატი.
_ ამდენი ადვოკატი არ სჭირდება ხაბალაშვილს! მე პასუხს ვითხოვ და რაკი ვერ მპასუხობთ, მე გეტყვით _ სპეციალურად უვლით გვერდს საკითხებს. მაინტერესებს, რას ხმარდება ბიუჯეტის ცვლილების შედეგად გამოთავისუფლებული თანხები? ეს, რაც დამატებულია, ლეგალურად გჭირდებათ მომავალი არჩევნებისთვის. დაამატეთ, დაამატეთ, რა გენაღვლებათ, არჩევნები გაქვთ წინ და ამიტომ ხართ აფორიაქებული. მე ახლა ბოლო სიტყვა მინდა გითხრათ და დაგემშვიდობოთ!
_ სულ? _ ირონიულად დაეკითხა ერთი დეპუტატი.
_ მივდივარ, მაგრამ არა სამუდამოდ. მალე თქვენი უფლებამოსილების შეწყვეტას მივცემ ხმას, _ ასე დატოვა ნაცვალაძემ დარბაზი და მას მეორე ოპოზიციონერი დეპუტატი, თემურ სალუქვაძეც, როგორც ძიმითის დეპუტატი იტყოდა, ზრდილობიანი კრიტიკით თან მიჰყვა: _ მე მივესალმე, როცა სოციალური დახმარებების კოეფიციენტი გაიზარდა. ეს ძალიან კარგია, მთავრობა რაღაცას მართლაც აკეთებს, მაგრამ ამ ყველაფერს მთავრობას ვერ მივაწერთ, იმიტომ, რომ ძალიან ბევრ და დიდ საქმეს აკეთებს ბიძინა ივანიშვილი! ამიტომ მადლობა მას და მადლობა უფალს! საქართველოში დღეს პოლიტიკურ პროცესებს მართავს ბიძინა ივანიშვილი. ეს არის სიმართლე და მე დავაფიქსირე ჩემი პოზიცია!
_ ვერავის სახელის თქმა ვერ გიშველით, ბატონო თემურ! სხვის სახელს და გვარს რომ ახსენებთ, თქვენ რა გააკეთეთ, ის თქვით. თქვენს გაკეთებულ საქმეებზე ილაპარაკეთ, სხვის გაკეთებულს ნუ იშველიებთ, _ მიაძახა ალეკო მამეშვილმა და სხდომის გასაგრძელებლად მოუწოდა დეპუტატებს.
დღის წესრიგით გათვალისწინებულ მეორე საკითხზე “ოზურგეთის მუნიციპალიტეტის 2012 წლის ბიუჯეტის შესრულების II კვარტლის მიმოხილვაზე” ლია ქათამიძემ ისაუბრა. მან განაცხადა, რომ პირველი ივლისის მდგომარეობით ბიუჯეტში გახორციელდა შვიდი ცვლილება. სულ ოზურგეთის მუნიციპალიტეტის საკრებულოს 2012 წლის 18 ივნისის #20 დადგენილებით, ბიუჯეტის მოცულობა განისაზღვრა 16 002.0 ათასი ლარით.
მესამე საკითხზე “ოზურგეთის მუნიციპალიტეტის 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ” ოზურგეთის მუნიციპალიტეტის საკრებულოს განკარგულების დამტკიცების თაობაზე, ამირან გირკელიძემ ისაუბრა, რასაც დასამტკიცებლად, ნახევარ წუთში ყველა დეპუტატმა აუწია ხელი, ისე, რომ კითხვა არავის გასჩენია.
ბოლო, მეოთხე საკითხზე “ოზურგეთის მუნიციპალიტეტის ტერიტორიაზე საარჩევნო სააგიტაციო მასალების განთავსების რეგულირების შესახებ”, პეტრე სალუქვაძემ ისაუბრა. განკარგულების მიხედვით, განსაზღვრული მუნიციპალიტეტის საკუთრებაში არსებული ობიექტების გარდა, საარჩევნო-სააგიტაციო მასალები შეიძლება, გამოიფინოს მათი მესაკუთრეების ან მფლობელების თანხმობის შემთხვევაში. საარჩევნო-სააგიტაციო მასალების განთავსება აკრძალულია ოზურგეთის მუნიციპალიტეტის ტერიტორიაზე მდებარე საკულტო ნაგებობებზე, კულტურული მემკვიდრეობის შენობა-ნაგებობებზე, სახელმწიფო ხელისუფლების, ადგილობრივი თვითმმართველობის ორგანოს, სასამართლოს, პროკურატურის, სამხედრო შენაერთებისა და პოლიციის შენობების ინტერიერსა და ექსტერიერში, აგრეთვე საგზაო ნიშნებზე.
ბოლო საკითხის კენჭისყრით დამტკიცების შემდეგ, რამდენიმე წუთის განმავლობაში ალეკო მამეშვილმა სოფლების რწმუნებულებს მოუსმინა, სოფლის მხარდაჭერის პროგრამის შესახებ, რასაც უფრო ფორმალური ხასიათი ჰქონდა და, ძირითადად, გაწერილ სამუშაოებს ეხებოდა.
