მიუხედავად იმისა რომ ტენდერის დასრულებამდე 3 დღე რჩება, მუზეუმის რეაბილიტაციის მსურველი ჯერ-ჯერობით არ ჩანს, სავარაუდოა, რომ პროექტის თანხა შესასრულებელი სამუშაოების მოცულობის გათვალისწინებით, არამიმზიდველად გამოიყურება.
ერთი თვის წინ ფიროსმანის მუზეუმის რებილიტაცია-კონსერვაციის პროექტი ბევრად მასშტაბური და გრანდიოზული ჩანდა. დაახლოებით 4 მილიონი დოლარი არა მხოლოდ მუზეუმის, არამედ მის გარშემო ინფრასტრუქტურის მოწესრიგებაზე უნდა დახარჯულიყო. საბოლოოდ მსოფლიო ბანკმა ხარჯებს გაბერილი უწოდა და პროექტის დაფინანსება გადაიფიქრა.
ფიროსმანის მუზეუმის დირექტორი ნელი გობეჯიშვილი “გურია ნიუსთან” საუბარში აცხადებს, რომ პროექტი იყო შთამბეჭდავი და საინტერესო, მაგრამ ძვირადღირებული სიამოვნება აღმოჩნდა:
“პროექტი მზად გვქონდა, გაწერილი იყო თითოეული დეტალი, რაც ითვალისწინებდა მუზეუმის მთლიან განაშენიანებას დაახლოებით 6 ჰექტარ ფართობზე. გათვალისწინებული იყო ავტომანქანების სადგომის მოწყობა, აშენდებოდა ვიზიტორთა ცენტრი, გაკეთდებოდა ლამაზი ბილიკები, გაშენდებოდა ეთნოგრაფიული ვენახი, რომელშიც დავრგავდით ყველა ქართული ჯიშის ვაზს, მოწეული ყურძნით კი მუზეუმში არსებულ მარანში დაიწურებოდა ღვინო, რომელსაც ვიზიტორები დააგემოვნებდნენ, სამწუხაროდ, ეს პროექტი არ დაფინანსდა.”
მუზეუმის დირექტორის თქმით ყველაფერი შეთანხმებულად მიმდინარეობდა, ბანკს ადგილზე ჩაჰყავდა ექსპერტები რომლებიც ამოწმებდნენ თითოეულ დეტალს, შემდეგ კი მისთვის უცნობი მიზეზების გამო პროექტი ჩაიშალა.
მსოფლიო ბანკის პროექტის დირექტორმა ასმათ აბესაძემ სახლმუზეუმის სარეაბილიტაციო ნუსხიდან ამოღების მიზეზებზე ინტერნეტგამოცემა “ქიზიყთან” ისაუბრა
“სრული რეაბილიტაცია იგეგმებოდა, მაგრამ ისეთი სრულიად ახალი ინფრასტრუქტურული სამუშაოები დაიგეგმა, რაც ვფიქრობ, რომ ამ ადგილს ეს საერთოდ არ სჭირდება. რეაბილიტაციის თანხა უაზროდ გაიზარდა, რამაც გამოიწვია ის, რომ პროექტს მთლიანად თავი დაანებეს. ამის დახვეწა შესაძლებელია. უნდა ამოვარდეს ზედმეტი, ძვირადღირებული დეტალები, გაურკვეველი ორნამენტები და ორღობის მოწყობა, ამ ადგილისთვის ვფიქრობ, რომ ზედმეტია. ამის გარეშეც შესანიშნავი ადგილია და პირველადი იერსახე შენარჩუნებული უნდა იყოს. ის ძირითადი სადრენაჟე სისტემა, სახლმუზეუმის აღდგენა და ძირეული სამუშაოები უნდა ჩატარდეს.”
მსოფლიო ბანკის პროექტის დირექტორის “ქიზიყისთვის”გაკეთებული კომენტარიდან ირკვევა, რომ ბანკი მზად იყო დაეფინანსებინა ფიროსმანის ეზოში სველი წერტილების მოწყობა,, სუვენირების მაღაზია, გიდების მომსახურება, მათ შორის უცხოენოვანის, საინფორმაციო ცენტრის აშენება. ასევე კაფე, რომელიც დამატებითი შემოსავალი იქნება მუზეუმისთვის., ამის მიუხედავად კულტურული მემკვიდრეობის სააგენტომ როგორც ჩანს პოზიციები არ დათმო პრინციპით ან ყველაფერი ან არაფერი. შესაბამისად, გრანდიოზული პროექტის ნაცვლად ამ ეტაპზე მხოლოდ შენობის გამაგრება იგეგმება.
მუზეუმის დირექტორი ნელი გობეჯიშვილი “გურია ნიუსთან” საუბარში აცხადებს, რომ სააგენტოს მიერ გამოყოფილი 34 ათასი ლარი , სრულიად საკმარისია მუზეუმის გამაგრება -კონსერვაციისათვის.
შენობა სავალალო მდგომარეობაშია: პირველ რიგში საძირკველია გასამაგრებელი, შესაცვლელია სახურავი, გამოსაცვლელია ხის კოჭები , ასევე აივნის და ოთახების იატაკი, ჭერი. მუზეუმის დირექტორი ამბობს, რომ ამის შემდეგ კვლავ დარჩება ბევრი მოუგვარებელი საკითხი, თუმცა იმედი აქვს რომ ან მსოფლიო ბანკს მოუბრუნდება გული მუზეუმზე ან, კულტურული მემკვიდრეობის სააგენტო მოაგვარებს მათ ეტაპობრივად.
მსოფლიო ბანკის პროგრამის დირექტორმა ასმათ აბესაძემ სააგენტო “ქიზიყს” განუცხადა, რომ ბანკი ფიროსმანის (და არა მარტო) მუზეუმისათვის მეტი დამოუკიდებლობის მინიჭებას ემხრობოდა. მათი აზრით, საჯარო სამართლის იურიდიული პირის სტატუსი მუზეუმს განვითარების მეტ შანსს მისცემდა. სავარაუდოა, რომ გაბერილ ხარჯებთან ერთად პროექტის ჩაშლის მიზეზი ბანკის ეს მოსაზრებაც გახდა.
