“ოცნების” კოალიციამ არ იცის, “რასა იქმს “მრეწველი”?!

დანარჩენ ხელმომწერებს შორისაა კოალიცია “ქართული ოცნების” წევრი პარტიის _ “მრეწველობა გადაარჩენს საქართველოს” წარმომადგენელი, ოთარ მენაბდე.

“ქართული ოცნების” დამოკიდებულება კაციტაძის “კარდაკარზე” არაერთხელ იქნა გაცხადებული _ “ოცნება” კაციტაძეს არ ენდობა.

იმის გასარკვევად, რას ფიქრობენ კოალიციაში ოთარ მენაბდის ხელმოწერაზე, “გურია ნიუსი” პარტია “ქართული ოცნება _ დემოკრატიული საქართველოს” თავმჯდომარეს, მანანა კობახიძეს დაუკავშირდა.

პარტიის თავმჯდომარე ფიქრობს, რომ ოთარ მენაბდემ ხელი გაუაზრებლად მოაწერა:

_ როცა კოალიცია არის ერთიანი და ეს პარტია, ანუ “მრეწველები” შედის კოალიციაში, შესაბამისად, აქ უკვე კოალიციის პოზიცია უნდა იყოს გათვალისწინებული. ცხადია, ამ შედეგების გაზიარების საფუძველი არ იყო. ალბათ, პასუხს მოთხოვს თავისი პარტიის თავმჯდომარე და გაარკვევს მასთან ურთიერთობას. მე პირადად არ ვიცნობ ამ ადამიანს და ვფიქრობ, რომ ზერელედ და გაუაზრებლად გააკეთა ეს. ყოველ შემთხვევაში, ეს კოალიციის პოზიცია არ არის. ალბათ, პარტიამ უნდა გაარკვიოს ოთარ მენაბდესთან ეს საკითხები.

_ ოთარ მენაბდე “გურია ნიუსთან” აცხადებს, რომ თავს სულაც არ თვლის კოალიციის წევრად და ფიქრობს, რომ თქვენი დამოკიდებულება კაციტაძის “კარდაკარზე” მას სულაც არ ეხება.

_ როგორც ჩანს, მენაბდე ხელისუფლების პოზიციას ახმოვანებს და პარტიამ უნდა გაარკვიოს მასთან ეს საკითხი. თუ პარტიის წევრი კოალიციის ინტერესებს ეწინააღმდეგება, ცხადია, ასეთი წევრი არ უნდა იყოს კოალიციაში, შესაბამისად პარტიაში, რომელიც კოალიციის წევრია. ვფიქრობ, ეს საკითხი დაისმება ალბათ კოალიციის პოლიტსაბჭოზე. ჩვენ არ ვიზიარებთ კაციტაძის დასკვნას და ერთმა მენაბდემ რომ ხელი მოაწერა, ეს იმას არ ნიშნავს, რომ კოალიციამ პოზიცია შეიცვალა.

გოგი თოფაძემ უნდა გაარკვიოს თავის წევრებთან, ვინ რას აკეთებს და ვინ რაზე აწერს ხელს, ამ შემთხვევაში, ვგულისხმობ ოთარ მენაბდეს.

როდესაც ჩვენი პარტიის წევრების მხრიდან გარკვეული გადაცდომები იყო, სამი წევრი გავრიცხეთ და პარტია გაემიჯნა მათ. გოგი თოფაძემ, მენაბდესთან ეს ყველაფერი უნდა გაარკვიოს.

_ ხომ არ ელაპარაკეთ გოგი თოფაძეს და ხომ არ გაგირკვევიათ მისი პოზიცია?

_ რამდენადაც ვიცი, გოგი თოფაძე თბილისში არ იმყოფება, ის გერმანიაშია. ყოველ შემთხვევაში, რამდენიმე კვირაა მე ის არ მინახავს და ვერც ბოლო პოლიტსაბჭოს დაესწრო, იმიტომ, რომ საქართველოში არ იყო.

“გურია ნიუსთან” საუბრისას, ოთარ მენაბდე აცხადებს, რომ თავს კოალიცია “ქართული ოცნების” წევრად სულაც არ თვლის. უფრო მეტიც, მისივე ნათქვამიდან ირკვევა, რომ შესაძლოა, მალე პარტია “მრეწველობა გადაარჩენს საქართველოს” რიგები დატოვოს და არასამთავრობო ორგანიზაცია შექმნას, რომელიც ადამიანის უფლებების დაცვაზე იმუშავებს. ოთარ მენაბდეს, ამ არასამთავრობო ორგანიზაციის განსაკუთრებული ნიშაც (როგორც თავად ამბობს) შერჩეული აქვს _ დასაქმებულების უფლებების დაცვა.

“გურია ნიუსის” კითხვაზე, იცის თუ არა გოგი თოფაძემ ამ გადაწყვეტილების შესახებ, ოთარ მენაბდემ განაცხადა: “იცით რა, მე ვერ ვხედავ ჩემს ადგილს ახლა აქ, ამ საქმიანობაში. ხომ შეიძლება, რომ ვერ ვხედავდე? ეს – ერთი, და მერე მეორე, ფსიქოლოგიურადაც, მე უფრო ლიდერის პოზიციაზე უნდა ვიყო, ვიდრე რიგითის…”

თუმცა, ამ ეტაპზე ის ჯერ კიდევ “მრეწველების წევრია: “მე ვარ “მრეწველობა გადაარჩენს საქართველოს” კვოტით “კარდაკარის” კომისიის წევრი. მაშინ, მრეწველები არანაირ კოალიციაში არ იყვნენ,” _ ამბობს ოთარ მენაბდე “გურია ნიუსთან”.

_ მაშინ არ იყო, მაგრამ თქვენ კაციტაძის “კარდაკარის” შედეგებს მას შემდეგ მოაწერეთ ხელი, რაც უკვე გაწევრიანებულები იყვნენ მრეწველები.

_ მე არ ვარ წევრი.

_ პარტია “მრეწველების” წევრი არ ხართ თუ კოალიცია “ქართული ოცნების”?

_ საქართველოს პრეზიდენტის ბრძანებულებით, მე ვარ კომისიის წევრი ამ პოლიტიკური მოძრაობიდან. კომისიის წევრობა, თავისთავად, მე არ მაძლევს იმის უფლებას, მონაწილეობა მივიღო პოლიტიკურ საქმიანობაში.

_ ბატონო ოთარ, კოალიცია “ქართული ოცნების” წევრი, ხართ თუ არა?

_ მე არ ვარ კოალიცის წევრი. როგორ შეიძლება ვიყო კოალიციის წევრი, როგორ შეიძლება ვიყო კოალიციის წევრი? წესდება ხომ მაინც უნდა ვნახო, კოლექტიური წევრობაა თუ რა წევრობაა?

_ თქვენი პარტიის ლიდერს, გოგი თოფაძეს არ აუხსნია თქვენთვის კოალიციაში გაწევრიანებით რა ვალდებულებები აიღეს მრეწველებმა კოალიციის წინაშე?

_ საით მიგყავთ ახლა თქვენ საუბარი?

_ არსაით, უბრალოდ, კითხვას გისვამთ.

_ ჰოდა, თუ გაინტერესებთ, აიღეთ ის ბრძანებულება პრეზიდენტის ხელმოწერით და წაიკითხეთ, რა წერია იქ. მე ამ კომისიაში ვარ “მრეწეველებიდან” წევრი და დავრჩები “მრეწველებიდან” წევრად. მე რომ შევიცვალო პოზიცია, მაშინ პრეზიდენტის ბრძანებულებით უნდა დაფიქსირდეს სულ სხვა რამე, რაც ვერ დაფიქსირდება, იმიტომ, რომ “მრეწველობა გადაარჩენს საქართველოს” ეს არის მინიმუმ 21 სუბიექტიდან ერთ-ერთი, რომელმაც ხელი მოაწერა მაშინდელ პარტიულ შეთანხმებებს.

ასე რომ, სამართლებრივად, პოლიტიკურად და ასე შემდეგ, საითაც არ უნდა წავიყვანოთ საუბარი, ასეა ეს.

გარდა ამისა, მე არა ვარ განწყობილი იმისთვის, რომ რაღაც ბლოკებში და იმეებში შევიდე, იმიტომ, რომ მე დავამთავრე პოლიტიკური მუშაობა კარგა ხანია.

_ მრეწველების წევრად რჩებით თუ ამ პარტიიდანაც წახვედით?

_ ვრჩები რა, დეკემბრის ბოლომდეა ამ კომისიის მუშაობა, როგორც კი დასრულდება, მე ვქმნი არასამთავრობო ორგანიზაციას, უფლებადამცველის და უნდა ვიმუშავო ამ ხაზით. მე ვთვლი, რომ კომისიამ დიდი მუშაობა გასწია და ჩვენ დავამტკიცეთ “კარდაკარის” შედეგები. ახლა, თუ რომელიმე პარტიას არ მოსწონს, გამოვიდეს და თქვას.

კახა კახიშვილი “გურია ნიუსთან” იმ მიზეზებზე საუბრობს, რის გამოც განსხვავებული აზრი დააფიქსირა: “განსხვავებული აზრი იმიტომ დავაფიქსირე და ამ სიას ხელი იმიტომ არ მოვაწერე, რომ ბევრი კითხვის ნიშანი გამიჩნდა. პირველ რიგში, ძალიან დიდი რაოდენობა იყო მიგრირებულების; შიდა მიგრაციის კოეფიციენტი ძალიან მაღალი, 700 000-მდე იყო, რაც იმას ნიშნავს, რომ სახელმწიფოს აღარ უნდოდა ამ პრობლემის მოგვარება. საზღვარგარეთ გასული ამომრჩევლების რაოდენობა 300 000-ით განისაზღვრა, რაც ასევე არარეალური რიცხვია. ასევე, სრულიად გაურკვეველია იმ ამომრჩევლების რაოდენობა, რომლებიც მიწერილები იყვნენ სხვადასხვა მისამართებზე ისე, რომ მესაკუთრემ არაფერი იცოდა. ასეთი დაახლოებით 80 000-ია. ერთი სიტყვით, იყო რამდენიმე სეგმენტი, რის გამოც ხელი არ მოვაწერე სიას.”