საქართველოს ენერგეტიკის აკადემიის პრეზიდენტი რეზო არველაძე გურია ნიუსთან საუაბრში აცხადებს, რომ 25%-ინი წილის გასხვისების შემდეგ საქართველოს აღარ ეყოლება საკუთარი წარმომადგნელები“ თელასის“ სამეთვალყურეო საბჭოში, რაც იმას ნიშნავს რომ კომპანიაში სტრატეგიული საკითხების განხილვას საქართველოს მხარე ვეღარ დაესწრება.
„ ბუნებრივია, რომ სახელმწიფო, რომელსაც მხოლოდ 25% -იანი წილი აქვს, მაინც ვერაფერს წყვეტდა, მაგრამ წილის გასხვისების შემდეგ ის საერთოდ-ვეღარ მიიღებს მონაწილეობას თელასისი მართვა-განვითარებაში.საქართველოს 2 წარმომადგენელი ჰყავდა საბჭოში, რომლებსაც შეეძლოთ კონკრეტული , ქვეყნისათვის სასარგებლო საკითხის დაყენება , რისი შესაძლებლობაც მას წილის გასხვისების შემდეგ აღარ ექნება..თუმცა ისიც ცხადია, რომ სახელმწიფო დიდი ხანია გავლენას ვეღარ ახდენდა თელასზე და ამაზე მეტყველებს ის უაზროდ გაბერილი ტარიფები, რაც მარეგულირებელმა მიიღო.
აშკარად ჩანს რომ სახელმწიფო მარეგულირებელი კომისიის სახით არის რუსეთის და არა საკუთარი მოსახლეობის მხარეს“ _ აცხადებს რეზო არველაძე „გურია ნიუსთან“ საუბარში.
ახალი მემარჯვენეების წარმომადგენელი ლევან კალანდაძე ფიქრობს, რომ 25% წილის გასხვისებით არაფერი შეიცვლება, რადგან სახელმწიფო ამ შემთხვევაში მხოლოდ მოგებაზე ორიენტირებული პასიური ბენეფიციარს წარმოადგენს და რეალურად კომპანიას მაინც ვერ მართავდა. კალანდაძე ფიქრობს, რომ სტრატეგიული ობიექტების გასხვისება პოლიტიკურად გამართლებული არ არის.
„ამ ხელისუფლების მოსვლის შემდეგ, სტრატეგიული ობიექტების მცნება გაქრა. ის საკანონმდებლო რეგულაცია, რომელიც გარკვეულ ნორმებს და სტანდარტებს აწესებდა სტრატეგიულ ობიექტებთან დაკავშირებით, საერთოდ აღარ არსებობს.კანონი იყო გარანტი იმისა, რომ ასეთი ობიექტი, მაგალითად არ მოხვედრილიყო მტრულად განწყობილი სახემწიფოს ხელში და არ გამოყენებულიყო გარკვეული სახელმწიფოების მხრიდან საქართველოზე პოლიტიკური თუ ეკონომიკური შანტაჟის იარაღად,”_ აცხადებს კალანდაძე „გურია ნიუსთან“ საუბარში.
ქრისტიან-დემოკრატები ხელისუფლებაში მოსვლის შემთხვევაში თელასის გამოსყიდვას აპირებენ. ლევან ვეფხვაძე აცხადებს, რომ თელასის გასხვისება არც ეკონომიური და არც პოლიტიკური თვალსაზრისით, ქვეყნისათვის მომგებიანი არ არის.
„ჩვენ ვცდილობთ, რომ ეს წილი გამოვიყიდოთ, ეს ხელისუფლება კი მხოლოდ გასხვისებაზეა ორიენტირებული. არ შეიძლება ყველაფერი გაყიდო იმიტომ, რომ ეს ყველაფერი საბოლოო ჯამში კისერზე აწვება ჩვენს მოსახლეობას.დღეს სახელმწიფო არის ძლიერი, აქედან გამომდინარე, შესაძლებელია გამოვისყიდოთ თელასი და ის სადისტრიბუციო კომპონენტი, რაც ტარიფში დევს, ამოვაგდოთ. თუ ხელისუფლებაში მოვალთ, იმ 25% კი არ გავყიდით, გაყიდულ 75%-საც დავიბრუნებთ, _ ”აცხადებს ვეფხვაძე „გურია ნიუსთან“ საუბარში.
ახალი მემარჯვენე ლევან კალანდაძე მიიჩნევს, რომ თელასი და სხვა სტრატეგიული ობიექტები, მათი მნიშვნელობის მიუხედავად, მაინც კერძო ბიზნესმა უნდა განკარგოს. ის არ იზიარებს ქრისტიან-დემოკრატების ინიციატივას სახელმწიფოს მიერ თელასის გამოსყიდვის შესახებ.
„ქდმ-ს ინიციატივა – ბიზნესის უკან ჩამორთმევა, ექსპროპროაცია არ მიმაჩნია სწორად.მარტო გამოსყიდვა ეს არის რაღაც დაუსრეულებელი პროექტი და ეკონომიკურ შინაარსს ამაში ვერ ვხედავ, რადგან სახელმწიფოს ბიზნესის განვითარებისთვის დამატებითი საინვესტიციო რესურსების მოძიება და მაგალითად თელასში ან სხვა კომპანიაში ჩადება არ შეუძლია. ამას ყოველთვის აკეთებს ბიზნესი. შესაბამისად, ბიზნესის მფლობელობაში ესა თუ ის საწარმო უფრო განვითარებაზე ორიენტირებულია, ვიდრე სახელმწიფო მაღალჩინოსნების მიერ ყოველდღიური ცხვირის ჩაყოფისა და მართვაში მონაწილეობის პირობებში.“
„დღეს, სახელმწიფო არის ძლიერი და ჩვენ შეგვიძლია ენერგეტიკაში ყოველწლიურად 1 მილიარდიანი ინვესტიცია განვახორციელოთ იმისათვის, რომ გამანაწილებელი კომპანიებიც გამოვისყიდოთ და თვითონ სახელმწიფომ გააგრძელოს მსხვილი ენერგოპროექტების დაფინანსება, იმისათვის რომ მერე ვინმემ არ თქვას, რომ ფული ჩადო და ეს თანხა ტარიფების მომატების გზით უნდა ამოიღოს. ჩვენ მიგვაჩნია, რომ მთავარი მოთამაშე ენერგო ბაზარზე, ინვესტიციების კუთხით უნდა იყოს სახელმწიფო,”_ აცხადებს ვეფხვაძე „გურია ნიუსთან“ საუბარში.
ქრისტიან -დემოკრატები თვლიან, რომ თელასის გამოსყიდვის შემთხვევაში, დენის ტარიფი მნიშვნელოვნად შემცირდება.
გავრცელებული ინფორმაციით, თელასის აქციებს საპარტნიორო ფონდი უახლოეს მომავალში გაყიდის. აქციების სავარაუდო შემსყიდველად თელასის 75% წილის მფლობელი რუსული კომპანია სახელდება.
„ვერ გეტყვით ვინ შეიძენს ამ 25% იმიტომ, რომ სახელმწიფო წილების გასხვისების პროცედურას დახურულად და კულუარულად აგვარებს და საზოგადოებისთვის არასოდეს არაფერია ცნობილი. ჩვენი ხელისუფლება საზოგადოების ინტერესსა და მონიტორინგს არად დაგიდევთ”-აცხადებს ლევან კალანდაძე.
არასამთავრობო ორგანიზაცია „საერთაშორისო გამჭვირვალობა საქართველო“ ჯერ კიდევ გასულ წელს აღნიშნავდა, რომ საპარტნიორო ფონდის ფინანსური საქმიანობა იყო საკმაოდ ბუნდოვანი და გაუმჭვირვალე.
„გაურკვეველია დივიდენდები და პრივატიზაციის შედეგად მიღებული შემოსავლები ჯერ სახელმწიფო ბიუჯეტში შევა, თუ ბიუჯეტის გვერდის ავლით პირდაპირ გადაეცემა საპარტნიორო ფონდს. ამ უკანასკნელ შემთხვევაში, კონტროლის პალატა ვერ იქნება უფლებამოსილი აღნიშნული თანხების შემოწმებაზე, რადგან კონტროლის პალატის შესახებ კანონის მიხედვით მას კერძო სამართლის სუბიექტის საქმიანობის იმ ნაწილის შემოწმების უფლება აქვს, რომელიც სახელმწიფო ბიუჯეტის თანხების მართვასთანაა დაკავშირებული,”-აღნიშნულია ორგანიზაციის მიერ 2011 წლის 6 ივნისს გავრცელებულ განცხადებაში.
