ეს სია დღესაც არსებობს და ბოლო კომპანია _ „ალდაგი ბისიაი“ არჩვენებამდე რამდენიმე დღით ადრე დაამატეს.
„ალდაგი ბისიაის“ დირექტორი ბიძინა ივანიშვილის ჯანდაცვის მინისტრობის კანდიდატის, ამირან გამყრელიძის ვაჟი, ნიკოლოზ გამყრელიძეა. კომპანია პრივილეგირებულთა სიაში 2012 წლის 26 სექტემბერს მოხვდა, სულ რაღაც 5 დღით ადრე არჩევნებამდე.
კონკურენციისსა და სახელმწიფო შესყიდვების სააგენტოს თავმჯდომარის #392 განკარგულებაში ნათქვამია: “1. სს “სადაზღვევო კომაპნია ალდაგი ბისიაი”-ს მოთხოვნისა (2012 წლის 21 სექტემბრის #0850 წერილი) და მასზე თანდართული დოკუმენტაციის განხილვის შედეგად, სს “სადაზღვევო კომაპნია ალდაგი ბისიაი” (ს/კ 204819008) 2012 წლის 26 სექტემბერს დარრეგისტრირებულ იქნას თეთრ სიაში”.
კომპანია „ალდაგი ბისიაის“ სახელს უკავშირდება ექიმების მასობრივი გათავისუფლება სხვადასხვა რაიონის საავადმყოფოებიდან, რასაც ისინი რესტრუქტურიზაციით ხსნიდნენ. თუმცა, კომპანიის პრესსამსხურთან არაერთი ზარის მიუხედავად, „გურია ნიუსმა“ ნიკოლოზ გამყრელიძესთან დაკავშირება ვერასდროს შეძლო. ხშირ შემთხვევაში, ექიმების ინფორმირება გათავისუფლების შესახებ მოკლე სატელეფონო ტექსტური შეტყობინებით ხდებოდა და ამას სახელად რესტრუქტურიზაცია ერქვა. რა სახელი ჰქონდა ექიმების ამ ფორმით გათავისუფლებას, ამაზე „ალდაგი“ კომენტარს არ აკეთებდა.
ბიძინა ივანიშვილის მიერ ჯანდაცვის მინისტრის კანდიდატურაზე წარდგენილი ამირან გამყრელიძე აცხადებს, რომ მისი შვილი, „ალდაგის“ დირექტორი, ამ ყველაფერთან კავშირში არ არის.
_ ბატონო ამირან, თქვენი შვილის სადაზღვევო კომპანია „ალდაგი ბისიაი”-ის მიერ გატარებულ რეფორმას, მედპერსონალის დიდი ნაწილის გათავისუფლება მოჰყვა და ექიმებმა საპროტესტო აქციებიც კი მოაწყვეს. როგორია თქვენი ხედვა საავადმყოფოების გაერთიანებასთან დაკავშირებით?
_ ახლავე გეტყვით. ჩემი შვილი არის “ალდაგი ბისიაის” დირექტორი. საავადმყოფოების გაერთიანებასთან არაფერ შუაშია. ეს პროექტი არსებობდა მაშინ, როცა მე გახლდით სამინისტროს ერთ-ერთი ხელმძღვანელი. ეს გახლავთ “საავადმყოფოები და რესტრუქტურიზაციის” პროექტი. ეს გარდაუვალი პროექტია. მოგეხსენებათ, ვითარდება მედიცინა. ეს რეფორმა, ოპტიმიზაცია და რესტრუქტურიზაცია უნდა განხორციელდეს სწორედ ისე, რომ ადამიანები იყვნენ სოციალურად დაცულები. ამიტომ, აქ წამყვანი ძალა და მმართველი უნდა იყოს სახელმწიფო, რათა მან იზრუნოს. როდესაც არის საჭიროება იმისა, რომ შეერთების, რესტრუქტურიზაციის პერიოდში გამოთავისუფლდეს პერსონალი, მათ უნდა ჰქონდეთ ადექვატური სოციალური დაცვა, ადექვატური კომპენსაცია, გადამზადების შესაძლებლობა და დასაქმდნენ სხვა სამსახურებში. ამ შემთხვევაში ამიტომ ჰქვია ამ სამინისტროს ჯანმრთელობისა და სოციალური დაცვის სამინისტრო. ჩვენ ვზრუნავთ არა მარტო ადამიანის ჯანმრთელობაზე, არამედ იმაზეც, რომ ეს ადამიანები სოციალურად იყვნენ დაცულები და უზრუნველყოფილები.
_ ბატონმა ბიძინამ განაცხადა, რომ მას ჰქონდა უფასო საავადმყოფოს პროექტი თუ იგეგმება ამ პროექტის განხორციელება თქვენი მინისტრობის პერიოდში?
_ სამწუხაროდ, ჯერ არ მქონდა საშუალება, ფუნდამენტურად განმეხილა ყველა საკითხი ბატონ ბიძინასთან. თავისთავად, ჩვენი ცხოვრება მოიტანს იმას, რომ რამდენიმე დიდი ე.წ. მუნიციპალური, ანუ სახელმწიფოს საკუთრებაში არსებული ჰოსპიტალი უნდა იყოს, სადაც ყველა ადამიანისთვის სწორედ ეს საბაზისო სამედიცინო დახმარება იქნება უფასო.
