ადვოკატის თქმით, სისხლის სამართლის საქმე დაფუძნებულია ერთადერთ ეპიზოდზე – საუბარია ე.წ “კარანტინის დაშლის” კადრებზე, რომელშიც გაგა მკურნალიძე, ყაჭეიშვილი ე. წ. “ვიქტორა” და ციხის სხვა მაღალჩინოსნები პატიმარს ფიზიკურად უსწორდებიან.
“მიუხედავად იმისა, რომ არსებობს არაერთი პატიმრის ჩვენება, რომელშიც ისინი წამებაში ამხელენ ფაცაციას, მკურნალიძეს, ცხვედიანს, ავსაჯინიშვილს, ბულბულაშვილს, ყველა იმ ადამიანს, რომლებიც განსაკუთრებული სისასტიკითა და პატიმრების მიმართ არაადამიანური მოპყრობით გამოირჩეოდნენ, პროკურატურა ახალი გარემოებებისა და ფაქტების შესწავლას არ ახდენდა. მე, როგორც ადვოკატი, ვითხოვდი წამებაში დადანაშაულებული ყველა პირის დაკავებას, ხოლო უკვე დაკავებულების მიმართ – საქმის ობიექტურად გამოძიებას. უნდა დაიკითხოს ყველა დაზარალებული პატიმარი და ახალი ეპიზოდები ერთ საქმეში გაერთიანდეს. პროკურატურა აქამდე ცდილობდა ამ დანაშაულის სისტემურობის უგულებელყოფას, თითქოს ეს იყო ერთეული ფაქტი და ზემოხსენებულ პირებს სხვა დროს არავინ უწამებიათ,” – აცხადებს ნოზაძე.
ადვოკატის თქმით, პროკურატურას გადაწყვეტილი აქვს, შეისწავლოს ყველა იმ პატიმრის განცხადება, რითაც ზემოხსენებულ პირებს ცემასა და წამებაში ამხელენ. შესაბამისად, სავარაუდოა, რომ ე.წ “კარანტინის დაშლის“ეპიზოდი ერთ-ერთი იქნება მრავალეპიზოდიან საქმეში, რომლის განხილვასაც სასამართლო ორი თვის შემდეგ შეუდგება.
ციხის თანამშრომლები პატიმართა წამების ვიდეოკადრების გავრცელების შემდეგ, დააკავეს. ამ დროისთვის, მატროსოვის ქუჩაზე მდებარე სასჯელაღსრულების დაწესებულებაში 11 ყოფილი თანამშრომელი იმყოფება: გლდანის მე-8 საპყრობილის უსაფრთხოების განყოფილების უფროსი ლევან ფურცხვანიძე, ამავე საპყრობილის რეჟიმის განყოფილების უფროსი ოლეგ ფაცაცია, ოპერატიული მორიგე გელა ცომაია, კონტროლიორი ლევან ფხალაძე, უსაფრთხოების განყოფილების ინსპექტორი ბორის ფარულავა, საპყრობილის არასრულწლოვანთა განყოფილების მორიგე ინსპექტორი კობა ჩიკვატია, სასჯელაღსრულების დეპარტამენტის თავმჯდომარის მოადგილე გაგა მკურნალიძე, მე-8 საპყრობილის დირექტორი დავით ხუჭუა, დირექტორის მოადგილე ვიქტორ ყაჭეიშვილი, რეჟიმის უფროსი ინსპექტორი გიორგი კვარაცხელია, კონტროლის ინსპექტორი მანუჩარ ლომთაძე.
