_ ასე უპასუხა “გურია ნიუსის” მიერ დასმულ კითხვაზე უზენაესი სასამართლოს თავმჯდომარემ, კოტე კუბლაშვილმა მედიის წარმომადგენლებთან დღეს გამართულ პრესკონფერენციაზე.
პრესკონფერენციის დასაწყისში, კუბლაშვილმა ჟურნალისტებს სასამართლოს საქმიანობის 10 თვის შედეგები გააცნო. მან, ასევე, ისაუბრა 2013 წლის პრიორიტეტებზე.
“გურია ნიუსმა” უზენაესი სასამართლოს თავმჯდომარეს კითხვა თბილისის მერის მიერ ამ სისტემის მისამართით გაკეთებული განცხადების შეფასების მიზნით დაუსვა.
_ 18 ნოემბერს, საქალაქო სასამართლომ თბილისის ყოფილ ვიცე-მერს შოთა ხიზანიშვილს აღმკვეთი ღონისძიება შეუფარდა. მოსამართლემ არ გაითვალისწინა თბილისის მერის, გიგი უგულავას შუამდგომლობა პირად თავდებობაზე; ასევე, არ გაითვალისწინა ადვოკატის შუამდგომლობა გირაოს სახით 20 ათასი ლარის გადახდის თაობაზე. სასამართლო პროცესის დასრულების შემდეგ, თბილისის მერმა საჯარო განცხადება გააკეთა, რომ სასამართლომ და მოსამართლემ ზეწოლას ვერ გაუძლო. ფაქტობრივად, აღნიშნა, რომ სასამართლო სისტემა დამოუკიდებელი არ არის. რას უპასუხებდით გიგი უგულავას ამ განცხადებას?
_ ინტერპრეტაციას, მოდით, ნუ გააკეთებთ ამაზე…
_ მერის განცხადებაში ეს იგულისხმება…
_ პირდაპირ გეტყვით, რომ არა მარტო თბილისის მერს გაუკეთებია ასეთი განცხადება და გთხოვთ, ისინიც გაიხსენოთ. ვინც არ უნდა გააკეთოს ამგვარი განცხადება, გნებავთ _ თბილისის მერმა, გნებავთ _ პრეზიდენტმა, გნებავთ _ პრემიერ-მინისტრმა, გნებავთ _ პარლამენტის წევრმა თუ მინისტრმა, ნებისმიერი ასეთი განცხადება, არის სასამართლოს მიმართ გახორციელებული ზემოქმედება და ზეწოლა. მათი შეფასება ბუნებრივია, მაგრამ რაც მერმა თქვა, რომ სასამართლომ ზეწოლას ვერ გაუძლოო, ამაზე უფრო დიდი დარღვევაა, როცა პოლიტიკური თანამდებობის პირი ამბობს, ჩვენ ახლა მოსამართლეებს დავსჯითო. თურმე, მოსამართლეები უნდა დაისაჯონ, იმიტომ, რომ თითქოს, უკანონო გადაწყვეტილებები მიიღეს.
ბოლო ერთი, ერთნახევარი თვის განმავლობაში ძალიან ბევრი ასეთი განცხადება მომისმენია. მაშინაც ვამბობდი და ახლაც ვიმეორებ, რომ ეს არის სასამართლოზე პირდაპირი ზეწოლა. არც თბილისის მერის განცხადებაა სწორი და არც იმ პოლიტიკური პირებისა, რომლებმაც, თავისი გადმოსახედიდან, უფრო მძიმე ბრალდებები წაუყენეს სასამართლოს. პოლიტიკური თანამდებობის პირისგან, მიუხედავად იმისა, უმრავლესობას წარმოადგენს თუ უმცირესობას, ეს ზეწოლაა და ჩემი შეფასება არ შეიცვლება იქედან გამომდინარე, თუ ვინ საუბრობს.
თუმცა, მერის განცხადება ცოტათი განსხვავებულია; იგი, გარკვეულწილად, სხვა რაკურსით საუბრობს, მაგრამ ესეც არ შეიძლება. უფრო მნიშვნელოვანია, როცა რომელიმე პოლიტიკური თანამდებობის პირი იტყვის, რომ მოსამართლე უნდა დავსაჯოთო… რაც კი პრობლემა გვაქვს სასამართლო სისტემაში (და მე არასოდეს მითქვამს, რომ იდეალური ვართ) მე თითონ აღვნიშნავ და ამისთვის მიმდინარეობს სწორედ რეფორმა. ახლანდელ, ყველა აქტუალურ პრობლემას გვერდზე გადავდებთ და პირველ რიგში, დავაყენებთ საკითხს, რომ აღმოიფხვრას პოლიტიკური თანამდებობების პირების მხრიდან სასამართლოზე ზეწოლის შემცველი განცხადებები. სანამ ეს პრობლემა არ აღმოიფხვრება, მანამ იმ აქტუალურ პრობლემებს არ მივუბრუნდებით. პირველი საფრთხე სასამართლოსათვის, ყოველთვის არის, რომ პოლიტიკური თანამდებობის პირებს არ გაუჩნდეთ განცდა, თითქოს მათ მოსამართლეების დასჯა შეუძლიათ. ეს მათი კომპეტენცია ნამდვილად არ არის და ამას ვერც ვერავინ გააკეთებს.
ვფიქრობ, წინა შემთხვევების დროს ჩემი განცხადებები ყველამ გაითვალისწინა და ბოლო ხანია, ასე მკვეთრად არავის გამოუხატავს. იმედია, სწორედ ამ ტენდენციით გაგრძელდება ჩვენი ურთიერთობა და საერთოდ, ჩვენი საქმიანობა.
