აჭარის უმაღლესი საბჭოს თავმჯდომარე ამბობს, რომ საჯარო სამსახური ვალდებულია პრემიები გასცეს: “მე მინდა შეგახსენოთ, რომ, სამწუხაროდ, საქართველოში ხელფასების გაცემის საკითხი რეგულირდება ცუდი კანონით, ცუდი ბრძანებულებით საქართველოს პრეზიდენტისა და პირველად არ გესმით ეს ჩემგან. ჯერ კიდევ ხელვაჩაურის საკრებულოში ჩემი მოღვაწეობის დროს, ყოველთვის ვაყენებდი საკითხს, რომ პრემია ეს არის საჩუქარი. და პრემია არ უნდა იყოს მუდმივად ერთი და იგივე ადამიანისათვის ერთნაირი. რაზეც მაღალჩინოსნები, საკრებულოს თანამშრომლები, მმართველი გუნდი მიმითითებდა საქართველოს პრეზიდენტის შესაბამის დადგენილებასა და გადაწყვეტილებაზე და საჯარო სამსახურის შესახებ კანონზე, სადაც ეს წერია. აი, ჩახედეთ. სამწუხაროდ, ცუდი მუხლია, არ მომწონს. კანონში წერია. ხელფასი შედგება თანამდებობრივ სარგოს პლუს დანამატი პლუს პრემია და ა.შ. აი, ეს ხორციელდება საქართველოში დღესაც ჩვენთანაც და ყველგან. ეს ასე არ უნდა იყოს. ამისათვის რა არის საჭირო? კანონის შეცვლა. ამ ჩანაწერის შეცვლა, რომ ხელფასი არის ხელფასი და პრემია არის საჩუქარი. ამას შეგნებულად აკეთებდა საქართველოს პრეზიდენტი და “ნაციონალური მოძრაობა” იმისათვის, რომ მიეჩქმალა, დაემალა საქართველოს მოსახლეობისათვის საჯარო სამსახურში არის კარგი ხელფასი”.
_ ეს ხომ არ გავალდებულებთ, რომ აიღოთ ან გასცეთ პრემია, ეს ხომ ნებაყოფლობითია?
_ არ არის ჩემზე დამოკიდებული. იძულებულები ვართ გავცეთ პრემია. ჩემი და ნებისმიერი საჯარო მოხელის ხელფასი შედგება სარგოს პლიუს პრემია. როდესაც ადამიანი იწყებს მუშაობას, მან იცის რამდენია მისი ანაზღაურება. შემადგენლობით იგი არ ინტერესდება. თუ არ გამოწერ პრემიას, მაშინ ხელფასის შემცირება გამოდის. ეს იმ ადამიანის უფლების დარღვევაა, _ ამბობს ბერიძე.
ავთანდილ ბერიძის განცხადებით, მისი ხელფასის ოდენობა 3 000 ლარია. აჭარის მთავრობის თავმჯდომარემ კი ხელფასისა და პრემიის ჩათვლით 4200 ლარი მიიღო.
“თუ არ ვცდები, მთავრობის თავმჯდომარის ხელფასი დარიცხვით არის 3160 ლარი. შეიძლება მეშლებოდეს,” _ ამბობს ხაბაძე.
“მთავრობის აპარატში არის ყოველთვიური 50%-იანი დანამატი და კვარტალური _ 100%. ეს არ გულისხმობს, თუ არ ვცდები, პრემიას. ჯამში, მე გამომივიდა თვის ანაზღაურება 4200 ლარი,” _ დასძინა მთავრობის თავმჯდომარემ.
“ჩემი პოზიციაა, რომ რადგან კომერციულ ორგანიზაციაში მიმუშავია ბოლო 10 წელია, ვთვლი, რომ პრემირების სისტემა საჭირო კი არა, აუცილებელია წახალისებისთვის. ოღონდ, ეს სისტემა რაც იყო აპარატში და სამინისტროებში, რომ ყველას თანაბრად ჰქონდეს პრემია 50% და კვარტალურად 100% სამართლიანად არ მიმაჩნია. უნდა იყოს გადანაწილებული დამსახურების მიხედვით,” _ აცხადებს არჩილ ხაბაძე.
აჭარის მთავრობის იურიდიული დეპარტამენტის ხელმძღვანელის პარმენ ჯალაღონიას თქმით (რომელიც ამ თანამდებობაზე დანიშვნამდე ახალგაზრდა იურისტთა ასოციაციის ბათუმის ოფისს ხელმძღვანელობდა), აჭარის უმაღლესი საბჭოს თავმჯდომარის ფორმულა ხელფასთან დაკავშირებით არასწორია.
“საჯარო მოსამსახურეების პრემიების საკითხი ეს ბიუჯეტით გათვალისწინებულია. ვისზე რამდენი უნდა გაიცეს ამას ადგენს შესაბამის დაწესებულებაში არსებული შესაბამისი კომისია. ეს თითოეული დაწესებულების უფლებამოსილებაა. თუ იგი ჩათვლის, რომ მისი თანამშრომელი თვის განმავლობაში არ მუშაობდნენ ისე, როგორც საჭიროა – მას შეუძლია არ გასცეს პრემიები,” _ ამბობს ჯალაღონია.
საქართველოს კანონში საჯარო სამსახურის შესახებ წერია: “მომსახურის შრომითი გასამრჯელო (ხელფასი) მოიცავს თანამდებობრივ სარგოს, პრემიას და კანონით გათვალისწინებულ დანამატებს”.
