იდეა უჩა ნანუაშვილს ეკუთვნის, რომელიც აცხადებს, რომ იდეის გახორციელებას ხელს უკვე სახალხო დამცველის ოფისიდან შეუწყობს.
ადამიანის უფლებათა დაცვის დღესთან დაკავშირებით უფლებადამცველთა სამხრეთკავკასიურმა ქსელმა დღეს სპეციალური ანგარიშიც წარმოადგინა.
“უფლებადამცველთა მდგომარეობა საქართველოში” მიმოიხილავს უფლებადამცველთა და ჟურნალისტთა მდგომარეობას სომხეთში, აზერბაიჯანსა და საქართველოში.
“ანგარიშში ძირითადი აქცენტი გაკეთდა ადვოკატებსა და ადამიანის უფლებებზე მომუშავე ჟურნალისტებზე, ასევე, არასამთავრობო ორგანიზაციებზე. ყველაზე მძიმე მდგომარეობა ამ მხრივ ადვოკატები იმყოფებოდნენ, რადგან ისინი ხდებოდნენ მუქარის, შანტაჟის და ფიზიკური ზეწოლის მსხვერპლნი დაცვის გახორციელების პროცესში. მათ მუდმივი პრობლემა ექმნებოდათ სასჯელაღსრულების დაწესებულებაში პატიმართან კომუნიკაციის დროსაც. ყოველ შემთხვევაში აქამდე ასე იყო და ჯერჯერობით ვითარება არსებითად არ შეცვლილა. პროკურატურას ამ დრომდე რჩება დომინანტი როლი, რაც ადვოკატებისთვის ხელისშემშლელი ფაქტორია,” _ ამბობს არასამთავრობო ორგანიზაცია “კონსტიტუციის 42-ე მუხლის” წარმომადგენელი ნაზი ჯანეზაშვილი “გურია ნიუსთან” საუბარში.
ანგარიშის მიხედვით განსაკუთრებით მძიმე ვითარებაში უწევთ მუშაობა რეგიონებში მყოფ უფლებადამცველებს და ჟურნალისტებს.
ჟურნალისტი მარი ოთარაშვილს სიცოცხლის ხელყოფითაც დაემუქრნენ, იყო ჟურნალისტების ცემის, დაშინების და შანტაჟის შემთხვევებიც.
“ბინძური კამპანია უფლებადამცველების წინააღმდეგ” _ ეს ანგარიშის ერთერთი თავია, რომელიც “კონსტიტუციის 42-ე მუხლის”, საია-ს და “საერთაშორისო გამჭვირვალობა _ საქართველოს” წინააღმდეგ აგორებულ კამპანიას ეხება.
მიმდინარე წლის ივნისში, “კონსტიტუციის 42-ე მუხლი” ამერიკის ელჩის თანდასწრებით ჰომოფობიურ ორგანიზაციად შერაცხეს, ამის მიზეზი კი ორგანიზაციის ყოფილი თავმჯდომარის მანანა კობახიძის განცხადება გახდა.
” შეიძლება, პერსონალურად ვიღაც მართლა აკეთებდეს მსგავს განცხადებას, მაგრამ ეს არ უნდა დააკავშირო ორგანიზაციასთან, მით უმეტეს, მაშინ, როდესაც ეს ადამიანი აღარ მუშაობს აღნიშნულ ორგანიზაციაში”, _ ამბობს ნაზი ჯანეზაშვილი “გურია ნიუსთან” საუბარში.
ყოფილი ხელისუფლების მხრიდან თავდასხმის მსხვერპლი გახდა ახალგაზრდა იურისტთა ასოციაციაც _ საუბარია 26 მაისს მოკლული ნიკა კვინტრაძესთან დაკავშირებით ტელევიზიით გავრცელებული კადრების ექსპერტიზისთვის საზღვარგარეთ გაგზავნაზე. ყოფილი ხელისუფლების მხრიდან მძაფრი კრიტიკა მიღებული შედეგის გამოქვეყნებას მოყვა. ერთ-ერთმა პარლამენტარმა საია-ს მიერ გავრცელებულ ინფორმაციას “ფაბრიკაცია” და “ცილისწამება” უწოდა.
უფლებადამცველებისა და უფლებადაცვითი ორგანიზაციების სტიგმატიზებაში ანგარიშის ავტორები მედიასაშუალებებსაც ადანაშუალებენ _ “საერთაშორისო გამჭვირვალობა _ საქართველოდან” ნინა ხატისკაცის გათავისუფლებას მედიის მხრიდან საკმაოდ კრიტიკული შეფასება მოყვა.
ანგარიში ადამიანის უფლებათა დაცვის ცენტრმა წარმოადგინა. შეხვედრას ორგანიზაციის ყოფილი ხელმძღვანელი უჩა ნანუაშვილიც დაესწრო, რომელმაც განაცხადა, რომ შექმნილი პოლიტიკური რეალობის გათვალისწინებით, ჩნდება იმედი და შესაძლებლობა, რომ უფლებების დარღვევებზე ხელისუფლების მხრიდან იქნება ადეკვატური რეაქცია.
ანგარიში, რომელიც ასევე შეიცავს რეკომენდაციებს ევროკავშირისა და საქართველოს მთავრობის მიმართ, საერთაშორისო ორგანიზაციებს გადაეგზავნებათ.
