ჩვენი მისვლისას მეზობელთან დაგვხვდა, რადგან ასე ოჯახში შეშის ეკონომიასაც გააკეთებს და თან მარტო არ იქნება. დოდო ბებო გვიყვება, რომ ადრე უფრო დიდი თოვლი მოდიოდა. ახლა მხოლოდ 3-4 მეტრი მოდის. ადგილობრივ მოსახლეობამ დამსვენებლებისთვის ოთახების მიქირავება ბოლო წლებია დაიწყეს. ამბობს, რომ ტურიზმის განვითარებამ ადგილობრივებზე დადებითად იმოქმედა. რაც კურორტი გაიხსნა, მას შემდეგ დიდთოვლობის გამო გზები აღარ იკეტება. არც შუქი ქრება და თუკი ჩაქრება, ოპერატიულად აგვარებენ პრობლემას. “რაც მთავარია ახალგაზრდები აღარ მიდიან სოფლიდან” – ამბობს იგი.
“აქ ძირითადად ქარცივაძეები, დარჩიძეები, დუმბაძეები და შარაშიძეები ვცხოვრობთ. ახალგაზრდები ძალიან ცოტა არიან. კაცები ქალაქში სამუშაოს ნახულობენ და მერე ქალ-ბაღანაც მიყავთ. რაც მიშა ამოვიდა და კურორტი გაკეთდა მას მერე უფრო ნაკლებად მიდიან. ოჯახებში ჩვენი ძალებით ვაწყობთ ყველაფერს, რომ დამსვენებლები მივიღოთ” – ამბობს დოდო ქარცივაძე.
ჩვენი მასპინძელი იაშა ქარცივაძე ტურისტების მისაღებად წელს პირველად ემზადება. პირველ სართულზე სამი ოთახი შეძლებისდაგვარად მოაწყო. ამბობს, რომ საშხაპე არ აქვს, მაგრამ ფიქრობს, რომ იმ პირობებში რაც მას აქვს, ტურისტი მაინც მივა. გაუმართლა და სასრიალო ტრასასთან ახლოს ცხოვრობს. ოჯახს ამ ეტაპზე შემოსავალი არ აქვს. ორი ძროხა ჰყავთ, რომელიც ისევ ოჯახს თუ გამოკვებავს. დანარჩენები გაყიდეს და იმ თანხით დამსვენებლებისთვის ოთახები მოაწყვეს. კითხვაზე რამდენი შვილი ყავს, გვპასუხობს: “შვილი, ბიჭი ერთი და ორი გოგო”. ბიჭს უმაღლესი განათლება ფიზკულტურის მასწავლებლის განხრით აქვს, მაგრამ სოფელში დაბრუნების შემდეგ გომარდულის სკოლაში მასწავლებლად მუშაობა ვერ დაიწყო.
“არაპროფესიონალი ჰყავდათ. ქართულები აქვს დამთავრებული იმ ბიჭს და ფიზკულტურას ასწავლის სკოლაში. ჩემი ბიჭი წავიდა და ისწავლა ამ სპეციალობით, რომ ჩემ სოფელში ვიმუშავებ ისევო, მაგრამ არ მიუშვეს. ადგა და ჯარში წავიდა. იქედან, რომ დაბრუნდა დაოჯახდა და ახლა ოჯახს ორი შვილი ჰყავს” – გამოგვეპასუხა საუბრისას ოჯახის დიასახლისი.
დიასახლისი გვიყვება, რომ ზაფხულობით წყლის პრობლემა აქვთ. ახალ კოტეჯებამდე მოიყვანეს წყალი, მაგრამ მოსახლეობას “ახალი” წყალი არ მიეწოდება.
ქარცივაძეები პრეზიდენტის ვიზიტს იხსენებენ. ამბობენ, რომ ბარათაულის თემში ხუთი სოფელი შედის. პრეზიდენტთან შესახვედრად მოსახლეობა სოფლის რწმუნებულებმა ხუთივე სოფლიდან შეკრიბეს. სააკაშვილი სოფელში ვერტმფრენით ჩაფრინდა.
“მიშა შეგვპირდა გაზი გექნებათ მთელ სოფელსო. ბაკების დადგმას აპირებდნენ და თხევადი გაზი იქნებოდა სოფელში, მაგრამ ჯერ არ მოუყვანიათ გაზი. კიდევ, დაგვპირდა რომ დაბალპროცენტიან სესხს მოგცემთო და საოჯახო ბიზნესი წამოიწყეთო. ბანკში რომ მივედით უარი გვითხრეს და ჩემმა შვილმა თავისით გააკეთა სესხი. ყველაფერს საკუთარი სახსრებით ვაკეთებთ. მართლა თუ ისეთი კურორტი იქნება ტელევიზორში რომ ამბობენ, ალბათ ჩვენც გვეშველება” – ამბობს იაშა ქარცივაძე.
ოჯახის უფროსს დამსვენებლებისთვის მოწყობილ ოთახებში მივყავართ. სახლის პირველ სართულზე ერთი ჰოლი და სამი ოთახია. ჰოლში (“ზალაში”, როგორც თვითონ უწოდებენ) კედელში ჩაშენებული ბუხარი და ერთი მდივანი დგას. ბატონი იაშა გვეუბნება, რომ სამზარეულოსაც აქ გააკეთებს. სხველი წერტილები და “ზალა” საერთო იქნება. საძინებელი ოთახები ახალად შეღებილია. საწოლები ჯერ არ უდგათ, მაგრამ აპირებენ სამ ოთახში 7 საწოლი დადგან. მეტი საწოლის ყიდვა ვერ შეძლეს. ფიქრობენ, რომ როგორც მეზობლები აქირავებენ, თვითონაც “კოიკა” 30-35 ლარად გააქირავონ.
იაშა ქარცივაძის მსგავსად გომარდულში მცხოვრები 60-მდე ოჯახი 22 დეკემბრს და “სულ ცოტა ნახევარ მეტრო თოვლს” ელოდებიან. (ჯერ სოფელში მხოლოდ ერთ სანტიმეტრამდე თოვლია). ამ დღეს აპირებენ გახსნან ტურისტული სეზონი და სოფელში პირველი დამსვენებლებიც მაშინ გამოჩნდებიან.
