იანვარში, თებერვალსა და მარტში აზერბაიჯანი ჯამურად 200 მგვტ სიმძლავრის ელექტროენერგიას მოგვაწვდის. შეთანხმებას ენერგეტიკისა და ბუნებრივი რესურსების მინისტრმა კახა კალაძემ ბაქოში გამართულ შეხვედრაზე მიაღწია. ენერგეტიკის მინისტრის განცხადებით, აზერბაიჯანულ ელექტროენერგიაში საქართველო ფულს არ გადაიხდის. ისესხებს, ზაფხულში კი, როდესაც ქვეყანაში ჭარბი რაოდენობით ელექტროენერგიაა, 200 მგვტ-ს უკან დააბრუნებს.
„შეთანხმება მიწეულია. მიხარია, რომ ამ ორ ქვეყანას შორის თბილი ურთიერთობა გრძელდება. დღევანდელი მიღწევა იმ ვიზიტის შედეგია, რომელიც ბატონ პრემიერს რამდენიმე დღის წინ აზერბაიჯანში ჰქონდა… ჩვენ მხოლოდ 3 თვის განმავლობაში გვჭირდება იმპორტის განხორციელება. იანვარში თებერვალსა და მარტში. ახლა, როცა ელექტროენერგიის ყიდვა გვიწევს, მას აზერბაიჯანისგან მივიღებთ და ზაფხულში, როდესაც ჭარბი ელექტროენერგია გვექნება, უკან დავუბრუნებთ,“- განაცხადა კახა კალაძემ.
ენერგეტიკის მინისტრის განცხადებით, დეტალებზე სპეციალური ჯგუფი მუშაობას მალე დაიწყებს და კონტრაქტს ხელი მოეწერება.
წინა წლების მსგავსად, საქართველო ზამთრის სეზონზე ელექტროენერგიის იმპორტის განხორციელებას ასევე რუსეთიდან გეგმავს. ენერგეტიკის მინისტრი აცხადებს, რომ მოსაზღვრე ქვეყნებიდან რუსული ელექტროენერგიის ფასი ყველაზე იაფია.
საქართველოდან ელექტროენერგიის ექსპორტი ზაფხულში ხდება, როდესაც ქვეყანაში ელექტროენერგიის ჭარბი რაოდენობით გამომუშავება ხდება.
