“გურია ნიუსი” კერვალიშვილს დაუკავშირდა, რომელმაც გავრცელებული ინფორმაცია დაადასტურა და დასძინა, რომ ტრანსპორტის კომპანია ერთადერთი არ არის, რომელმაც ის გენდერის საკითხებში მრჩევლის სტატუსით დაიქირავა.
_ მართალია, რომ ტრანსპორტის კომპანიაში გენდერული თანასწორობის საკითხებზე იმუშავებთ?
_ მე არ ვმუშაობ მხოლოდ ერთ კომპანიაში, ვმუშაობ რამდენიმე კომპანიაში და ვარ მრჩეველი. არავითარი საჯარო თანამდებობა არ მიკავია. ამ შემთხვევაში, ვარ კერძო პირი და გენდერული თანასწორობის საკითხებში მრჩეველი.
_ იმ კომპანიებს შორის, სადაც თქვენ მრჩევლის სტატუსით მუშაობთ, არის თუ არა ტრანსპორტის კომპანია?
_ იცით რა, მე ვარ მრჩეველი არაერთ კომპანიაში, მათ შორის სატრანსპორტო და სატელეფონო კომპანიებში, სადაც დასაქმებული ვარ დროებითი ხელშეკრულებით.
_ რა ფუნქცია აკისრია ტრანსპორტის კომპანიაში გენდერის საკითხებზე მომუშავე მრჩეველს?
_ მოგახსენებთ, არა მარტო ტრანსპორტის, საერთოდ ნებისმიერ კომპანიაში სახელმწიფოს აქვს სამოქმედო გეგმები, მათ შორის ეროვნული სამოქმედო გეგმა გენდერულ თანასწორობასთან დაკავშირებით.ძალიან მარტივად მინდა გითხრათ ჩემი ერთ-ერთი ინიციატივის შესახებ, რომელიც ეხება ტანსპორტში და საზოგადოების თავშეყრის ადგილებში ქალის მიმართ ნებისმიერ არასწორ ქმედებას, რომელსაც ჰქვია ჰარაზმეტი ანუ შეურაცხმყოფელი მოპყრობა და სხვადასხვა სახის გაფრთხილება, რომელიც ყველა სფეროში უნდა იყოს დაცული. ზუსტად ამ საკითხებთან დაკავშირებით არა მარტო ტრანსპორტში, არამედ ნებისმიერ სფეროში მაქვს გამოცდილება, რომ ვიყო მრჩეველი.
_ ტრანსპროტის კომპანიას თქვენამდე თუ ჰყავდა მსგავსი პროფილის მრჩეველი?
_ არ ვარ საქმის კურსში. საერთოდ, სიმართლე რომ გითხრათ, ისეთ საკითხებთან დაკავშირებით, რაც გენდერულ თანასწორობას უკავშირდება, აქამდე საერთოდ არ გვყოლია მრჩევლები და ამ მიმართულებით ქვეყანაში რაიმე ფორმის აქტივობა არ ყოფილა.ეს მხოლოდ და მხოლოდ ეხლა იწყებს განხორციელებას. კომპანიებს ჰყავთ მრჩევლები იურიდიულ, ადამიანის უფლებათა საკითხებში, მაგრამ არა გენდერის.
_ ანუ მრჩეველი გენდერის საკითხებში გარკვეული ნოვაცია იქნება კომპანიებისთვის?
_ არა, ეს არ არის ძალიანაც ახალი, მაგრამ სამოქმედო გეგმა პრაქტიკულად მხოლოდ ეხლა შემოდის ქვეყანაში. ტრანსპორტის კომპანიის გარდა, კიდევ ვაპირებ პროექტები შევიტანო ძალიან ბევრ საერთაშორისო ორგანიზაციაში სწორედ გენდერის მიმართულებით. მიმაჩნია, რომ ქვეყანაში, ამ მხრივ, ძალიან ბევრია გასაკეთებელი. ამ მიმართულებით ვმუშაობ დღე და ღამე.
_ ფიქრობთ თუ არა, რომ 2500 ლარი საკმაოდ მაღალი ხელფასია ხელშეკრულებით მომუშავე მრჩევლისათვის? ფაქტობრივად, ეს პარლამენტარის ხელფასია.
_ ხელფასის თემა არის პირადი მონაცემი. მე ვარ ექსპერტი და ექსპერტს კომპანია უნიშნავს ისეთ ანაზღაურებას, როგორსაც ის ჩათვლის საჭიროდ. ხოლო ეს მონაცემები, რაც თქვენ ბრძანეთ, ჩემთვის არ არის ცნობილი და კონფიდენციალური იქნება ალბათ.
_ რატომ მოჰყვა თქვენს ახალ სამსახურს საზოგადოების არაერთგვაროვანი რეაქცია?
_ ასეთი მიდგომა მხოლოდ და მხოლოდ პოლიტიკური ნიშნით არის განპირობებული. სხვაგვარად, არ შეიძლება გინდოდეს , რომ სპეციალისტების დიდი ხნის განმავლობაში დაგროვებული გამოცდილება უქმად გაიფანტოს შენი ქვეყნისათვის.
