თუმცა არ მოელოდა, რომ პროცესები “სულელური დაჭერებისა და რეპრესიების” მიმართულებით განვითარდებოდა: “ამ ხელისუფლების მიმართ არანაირი მოლოდინი არ მქონია, რადგან საქართველოში ხელისუფლება, როგორც წესი, გარედან იცვლება. განსაკუთრებით მეშინოდა რუსეთთან და აფხაზეთთან დაკავშირებული საკითხების, რადგან ცნობილია, რომ ამ გუნდში იყვნენ ისეთი ადამიანები, რომელთა უარყოფითი და ანტისახელმწიფოებრივი პოზიცია კარგად იყო ცნობილი. თუმცა მაინც არ მოველოდი ისეთ უარყოფით პროცესებს რაც მოხდა, ვგულისხმობ სულელურ დაჭერებს და რეპრესიებს.”
თამარ ჩხეიძის თქმით, ახალ ხელისუფლებას უნდა გამოეძიებინა გახმაურებული წამების, მიტინგებზე ხალხის დახვრეტის, ქონების ჩამორთმევის ფაქტები, მაგრამ მისი აზრით, ის რაც დღეს ხდება, პირადი ანგარიშსწორებაა და არა სამართლიანობის აღდგენა.
“მაგრამ მოხდა სულ სხვა რამ, ხდება პირადი ანგარიშსწორების პრინციპით ადამიანების დაჭერა, ან მისი თანამდებობა სჭირდებათ ან ადგილობრივ მუნიციპალიტეტში ადგილებია გამოსათავისუფლებელი, ან ვიღაცას პირადი ინტერესი აქვს. ადამიანების დაჭერა ხდება სასაცილო მიზეზებით. მაგალითად, ზესტაფონის გამგებელმა რომ 1 წლის წინ სადღაც იჩხუბა ან ვიღაცამ რესტორანს შუქი გამოურთო. სულ ახალი მოსულები იყვნენ ხელისუფლებაში, როდესაც სრულიად აბსურდული ბრალდებით დააკავეს გაერთიანებული შტაბის უფროსი და აშკარად შემექმნა შთაბეჭდილება, რომ ეს უკავშირდებოდა საქართველოში დაგეგმილი ნატოს სხდომის ჩაშლას. ასეც მოხდა. საზოგადოების გარკვეულ ნაწილს ეს დაჭერები მოსწონს, რადგან, ზოგადად, მენტალიტეტი არის განუვითარებელი , ისინი აზროვნებენ სისხლის აღების კატეგორიებით,” _ განაცხადა დღევანდელ პრესკონფერენციაზე თამარ ჩხეიძემ.
ილია ჭავჭავაძის საზოგადოების ხელმძღვანელი თვლის, რომ ახალი ხელისუფლების მიერ დეკლარირებული ევროატლანტიკური კურსი მხოლოდ განაცხადია და რეალურად ქვეყანაში რუსული პოლიტიკა ტარდება.
“რკინიგზის აღდგენასთან დაკავშირებით ჩვენ გვაქვს კატეგორიულად უარყოფითი პოზიცია, რადგან არ შეიძლება ბერკეტი, რომელიც საქართველოს ხელისუფლებას ხელში აქვს, ოკუპანტს დაუთმოს. რუსეთი ამით დაინტერესებულია და ჩვენ ეს უფრო ჭკვიანურად უნდა გამოვიყენოთ. დეოკუპაციის დაწყების გარეშე, რკინიგზის გახსნა და გადაცემა რუსეთისთვის ანტისახელმწიფოებრივი ქმედებაა. იმედი მაქვს, დასავლეთი და შეერთებული შტატები ამას არ დაუშვებს.”
ჩხეიძე ბურჯანაძის პოლიტიკური პარტიის ალტერნატიულ ოპოზიციურ ძალად ჩამოყალიბების საკითხსაც შეეხო და განაცხადა, რომ ეს რუსეთზეა დამოკიდებული.
“ბურჯანაძე ვერ გაუწევს წინააღმდეგობას ხელისუფლებას და არც გამოუხატავს ეს. პირიქით, მან მხარი დაუჭირა ამ ხელისუფლების პრორუსულ კურსსაც და რეპრესიებსაც. ამგვარი ალტერნატივა სასურველი არ არის, მაგრამ არ გამოვრიცხავ, რადგან რუსებს ყოველთვის ჰყავთ ახალი ძალა რეზერვში, რომელსაც საჭიროებისამებრ ჩართავენ პოლიტიკურ პროცესებში. ამიტომ, ბურჯანაძეც, ალბათ, საჭირო დროს ჩაერთვება პროცესებში”.
