მოარულ ხმებს თუ დავუჯერებთ, ფინანსური პოლიციის ამ ჯგუფმა არა ერთი დარღვევა აღმოაჩინა და შედეგებიც მალა დაიდება. იქამდე კი „გურია ნიუსმა“ სოფლის მხარდაჭერის პროგრამაზე გაამახვილა ყურადღება და სოფელ ონტოფოს მოსახლეობას გაესაუბრა.
როლანდ ნადარეიშვილი: “სოფლის მხარდაჭერის პროგრამით რა გაკეთებულიყო სოფელში, მოსახლეობისთვის არავის უკითხავს. სიმართლე გითხრათ და არც არაფერი დატყობია არც სოფელს და არც მოსახლეობას ამ მხარდაჭერით. ამ პროგრამის პირველი ეტაპით გაითხარა დაახლოებით 300 მეტრი არხი, მეტი არაფერი გაკეთებულა, სწორედ ამიტომ ისმის ყოველთვის კითხვა – სად წავიდა ამ პროგრამით გამოყოფილი თანხა? რაზე იხარჯება ეს ფული, ჩვენც ხომ უნდა ვიცოდეთ? მერე სტადიონი შემოღობეს, არც ის ვიცით, რამდენი იყო ამ სამუშაოსთვის გამოყოფილი და არც ის, თუ რამდენი დაიხარჯა. ხშირად გვიფიქრია სოფლის მოსახლეობას, რამდენად მიზნობრივად იხარჯება ეს თანხები, მაგრამ სოფელი ყრუა ამ საქმეში _ არც აზრს გვეკითხებიან და არც საქმის კურსში გვაყენებენ”.
ინგა ნადარეიშვილი _ სოფლის მხარდაჭერის პროგრამით ჩვენს სოფელზე თანხა რომ იყო გამოყოფილი, გაგვიგია, მაგრამ რაში რამდენი დაიხარჯა, ეს არავინ იცის. ან რატომ ხდება, რომ პროგრამა ისე ხორციელდება, ჩვენ არავინ არაფერს გვეკითხება? თუ გვეხმარებიან, ის მაინც გააკეთონ, რაც სოფელს სჭირდება. ვის შეუთანხმდნენ, ვის ჰკითხეს? არის გარკვეული ჯგუფი, რომელსაც კავშირი აქვს რაიონის ხელმძღვანელობასთან და ისინი წყვეტენ ყველაფერს. აბა მიდით, ნებისმიერ მოსახლეს ჰკითხეთ, რაში და რამდენად მიზნობრივად დაიხარჯა ეს თანხები. პასუხს ვერავინ გაგცემთ, რადგან არაფერი ვიცით.
– და მაინც რა გაკეთდა ამ პროგრამის ფარგლებში და რამდენად ხარისხიანადაა შესრულებული სამუშაოები?
– მე, პირადად, მხოლოდ სტადიონი ვიცი, ისიც მხოლოდ წინა მხარეს შემოღობეს, უკან კი, რასაც თვალი ვერ ხედავს, ახლაც შემოუღობავია. ხალხი ამბობს, რომ 30 000 ლარზე მეტი იყოო ონტოფოზე გამოყოფილი და ამდენი თანხა რაში დაიხარჯა, არავინ იცის.
როგორც ონტოფოს გამგებელი თემურ ჩოგოლეიშვილი ამბობს, სოფლის მხარდაჭერის პროგრამით სოფელ ონტოფოსთვის გამოყოფილი იყო 32 000 ლარი: – შესრულდა შემდეგი სამუშაოები – კლუბისთვის შეძენილი იქნა 100 ცალი სკამი, გაკეთდა მოხრეშვითი სამუშაოები სხვადასხვა ადგილებზე, შერემონტდა ხიდი და გაკეთდა სტადიონი. 32 000ლარი სრულიად გაიხარჯა ამ სამუშაოებში და ეს გაწერილია ყველა დოკუმენტით.
– მოსახლეობა პრეტენზიას გამოთქვამს იმის გამო, რომ არავინ ჩააყენა საქმის კურსში და ამბობენ, თანხა არამიზნობრივად დაიხარჯა.
– როგორ გეკადრებათ! ონტოფოს მოსახლეობამ განცხადებით მიმართა რაიონის გამგეობას, არის კიდეც ამ განცხადებაზე რამდენიმე ხელმოწერა, თუ კარგად მახსოვს 50 ხელმოწერა და ყველა მათი მოთხოვნა იქნა დაკმაყოფილებული.
– ბატონო თემურ, კიდევ ერთხელ გვითხარით, რა თანხა იყო გამოყოფილი საოფლის მხარდაჭერის პროგრამით ონტოფოზე?
– ხომ გითხარით, 32 000 ლარი და გაიხარჯა აბსოლუტურად მიზნობრივად.
ჩვენ ვნახეთ საერთო კრების ოქმი, სადაც წერია, რომ სოფელ ონტოფოსთვის გამოიყო 25 139 ლარი.
სოფლის მხარდაჭერის პროგრამა რაიონში ტაბუდადებული თემაა და კომენტარს არავინ აკეთებს, მოსახლეობას კი იმედი აქვს, რომ მათთვის საინტერესო კითხვებზე პასუხს, ფინანსური ექსპერტები გასცემენ, რომლებიც ჩვენ, სამწუხაროდ, ვერსად ვნახეთ.
