“მეურნეობის განვითარების საგაზაფხულო პროგრამამ” სტარტი აიღო

ამ პროგრამის ფარგლებში, ხობის მუნიციპალიტეტის სოფლებსა და თემებში სოფლის სპეციალური ბარათებს არიგებენ. ამ მიზნით ადგილობრივი თვითმმართველობის ორგანოების მონაწილეობით გახორციელდა სოფლის მოსახლეობის საანკეტო გამოკითხვა “კარდაკარ”-ის მეთოდით, რის შედეგადაც დადგინდა ფერმერთა და მათ მფლობელობაში არსებული მიწის ნაკვეთების რაოდენობები და ფართობების დაზუსტება.

სასოფლო-სამეურნეო ბარათს დაახლოებით 14 500 ბენეფიციარი მიიღებს. მცირემიწიანი ფერმერებისთვის ბარათების დარიგების პროცესს, ადგილებზე მუნიციპალიტეტის რწმუნებულები უზრუნველყოფენ.

მახარე ჩოკორაია, გამგებლის მოადგილე: “სოფლის მოსახლეობის საანკეტო გამოკითხვისთვის მართლაც დიდი და შრომატევადი სამუშაოები იქნა ჩატარებული. კარდაკარ იქნა გადამოწმებული და დადგენილი ყველა მონაცემი, რის საფუძველზეც დარიგდება ბარათები. მცირემიწიანი ფერმერები სასოფლო-სამეურნეო ბარათის ფორმით მიიღებენ მათ სარგებლობაში არსებული მიწის ფართობის კატეგორიის შესაბამის სარგებელს. კერძოდ, 0.25 ჰექტარზე მცირე ზომის სასოფლო-სამეურნეო მიწის მესაკუთრეები, რომელთა კუთვნილ ნაკვეთებშიც ტექნიკის შესვლა ვერ ხერხდება, მიიღებენ 100 ლარის ღირებულების ნომინალურ სასოფლო-სამეურნეო ბარათს, რომლითაც შესაძლებელი იქნება შესაბამისი ღირებულების სასოფლო-სამეურნეო დანიშნულების საქონლის და ინვენტარის შეძენა. 0.25 ჰა-დან 1.25 ჰა ფართობის მიწის მესაკუთრეები ( ბენეფიციართა ძირითადი ჯგუფი), რომელთაც გააჩნიათ სახნავი ფართობი, მიიღებენ 2 სახის სასოფლო-სამეურნეო ბარათს: 1 ბარათი (კომბინირებული) – ნიადაგის ხვნა, ხნულის დადისკვა/გაფხვიერება და 2 ბარათი (ნომინალური) – სასოფლო-სამეურნეო დანიშნულების საქონელი და ინვენტარი 300 ლარის ღირებულებით. ის ფერმერები, რომელთაც აქვთ ანალოგიურ ფართობის (0.25 ჰა-დან 1.25 ჰა-ს ჩათვლით) მრავალწლიანი ნარგაობა, მიიღებენ მხოლოდ ნომინალურ სასოფლო-სამეურნეო ბარათს 510 ლარის ღირებულებით 1 ჰექტარზე გადაანგარიშებით, რომლითაც შეეძლებათ სასოფლო-სამეურნეო დანიშნულების საქონლისა და ინვენტარის შეძენა. 1.25 ჰა-დან 5 ჰა-მდე სახნავი მიწის ფართობის, ან მხოლოდ მრავალწლიანი ნარგაობის მქონე ფერმერები მიიღებენ მხოლოდ ნომინალურ 640 ლარის ღირებულების სასოფლო-სამეურნეო ბარათს, რომლითაც შეეძლებათ მხოლოდ შესაბამისი ღირებულების სასოფლო-სამეურნეო დანიშნულების საქონლის და ინვენტარის შეძენა”.

მიმდინარე წელს ,,მცირემიწიან ფერმერთა საგაზაფხულო სამუშაოების ხელშეწყობის პროექტის” განხორციელებისთვის სულ 180 მლნ ლარზე მეტია გათვალისწინებული.