თბილისის საოლქო სასამართლოს მოსამართლე მწარიაშვილი 2005 წელს სხვა მოსამართლეების მსგავსად ჩამოაშორეს სასამართლოს. 2012 წელს კი ახალმა მთავარმა პროკურორმა მას საგამოძიებო სამსახური ჩააბარა, რომელსაც როგორც არჩილ კბილაშვილი ამბობს, წარმატებით გაუძღვა. ქალაქის ახალი პროკურორი საკადრო ცვლილებების გატარებას არ ჩქარობს, თუმცა აცხადებს რომ მთავარ პროკურორთან შეთანხმებით გარკვეული გადაადგილებები იქნება.
“ჩემი მიზანია ნდობის მაქსიმალური აღდგენა პროკურატურის ყველა რგოლისადმი. თბილისელებს შემიძლია დავპირდე რომ ქალაქის პროკურატურა იქნება მაქსიმალურად ობიექტური და მაქსიმალურად სანდო დაწესებულება. ვეცდებით, არასოდეს დავაყენოთ კითხვის ნიშნები იქ, სადაც ჩვენი პროფესიული ღირსების საკითხი დგას. საკადრო ცვლილებები მნიშვნელოვანი და მტკივნეული არ იქნება, ჯერ რაიმე კონკრეტული მოსაზრება ამ საკითხზე არ გამაჩნია, თუმცა მთავარ პროკურორთან შეთანხმებით შესაძლებელი რაღაც გადანაცვლებები იყოს, მაგრამ კადრების ერთიანად შეცვლა არ იქნება. სისტემა მეტ-ნაკლებად აწყობილია და მცირე კორექტირება სჭირდება.”- აცხადებს თბილისის ახალი პროკურორი. მისივე თქმით, ბევრი გახმაურებული საქმე მთავარი პროკურატურიდან ქალაქის პროკურატურაში გადაინაცვლებს, რაც მნიშვნელოვნად განტვირთავს მთავარ პროკურატურას.
მაია მწარიაშვილი, რომელიც 2003-2005 წლებში თბილისის საოლქო სასამართლოს სისხლის სამართლის საქმეთა პალატას ხელმძღვანელობდა, საზოგადოებას ერთი საქმიდან დაამახსოვრდა.
თიანეთის მკვიდრმა დავით ბერიკიშვილმა 2004 წლის აგვისტოში გადაწყვიტა ლუდი დაელია, მაღაზიის გამყიდველმა მის მოთხოვნას ვალად მიეცა ერთი ბოთლი ლუდი , უარით უპასუხა. ბერიკიშვილმა მაინც გამოაღო მაცივარი და ლუდი დალია.
ეს ქმედება პოლიციამ, გამოძიებამ და პროკურატურამ შეაფასა, როგორც განსაკუთრებით მძიმე სისხლის სამართლის დანაშაული და დავით ბერიკიშვილს წარუდგინეს სსკ 178-ე მუხლის მე-3 ნაწილით გათვალისწინებული ბრალდება რაც გულისხმობს ძარცვას და ისჯება პატიმრობით ოთხიდან თორმეტ წლამდე.
მიყენებული ზიანი ბერიკიშვილმა მეორე დღესვე აანაზღაურა, მაგრამ პროკურატურამ საქმე სასამართლომდე მაინც მიიტანა და მისთვის სასჯელად თერთმეტი წლით დაპატიმრება მოითხოვა.
დაცვის მხარემ სარჩელი სააპელაციო სასამართლოში შეიტანა. სააპელაციო კოლეგიის თავმჯდომარე მაია მწარიაშვილი არ დაეთანხმა გამამტყუნებელ განაჩენს და წარმოადგინა დასაბუთებული განსხვავებული აზრი. კოლეგიის ორმა წევრმა მაია ოშხარელმა და რუსუდან ჭანტურიძემ კი 1 ბოთლი ლუდის დალევისთვის ბერიკიშვილის 4 წლიანი პატიმრობა მიუსაჯეს.
ადვოკატი არჩილ ჩოფიკაშვილი, რომელიც ბერიკიშვილს იცავდა “გურია ნიუსთან” საუბარში ამბობს, რომ მწარიაშვილი, როგორც ღირსეული მოსამართლე ყოველთვის გამოირჩეოდა სხვა მოსამართლეებისაგან.
“მაია მწარიაშვილი ობიექტურად იხილავდა იმ საქმეებს, რომელთანაც მე მქონია შეხება, მათ შორის იყო ეს ლუდის საქმეც. ორმა მოსამართლემ დაწერა გამამტყუნებელი განაჩენი, მაშინ როდესაც მაია მწარიაშვილმა დაწერა და დაასაბუთა განსხვავებული აზრი. ის ყოველთვის იყო ობიექტური იმ საქმეების განხილვის დროს, სადაც მე მიწევდა გამოსვლა და დარწმუნებული ვარ, რომ პროკურატურას მისი ეს თვისება ძალიან წაადგება”.
