და სახელმწიფოთა სოციალურ-ეკონომიკური განვითარების წახალისება წარმოადგენს „ბრაზილიის ფედერაციული რესპუბლიკის მთავრობასა და საქართველოს მთავრობას შორის ტექნიკური თანამშრომლობის შესახებ“ ძირითადი შეთანხმების მიზანს, რომელიც პარლამენტში რატიფიცირებისათვის არის შემოტანილი.
პარლამენტის პრესსამსახურის ინფორმაციით, შეთანხმება 2011 წლის 26 აგვისტოსაა ხელმოწერილი და იგი ზოგადი ხასიათისაა. აღნიშნული შეთანხმების პროექტზე დღეს საფინანსო-საბიუჯეტო კომიტეტში იმსჯელეს. საკითხის წარდგენისას, საგარეო საქმეთა მინისტრის მოადგილემ გიორგი ხელაიამ განაცხადა, რომ საქართველოს ანალოგიური შეთანხმებები დადებული აქვს თურქეთთან, ისრაელთან და სხვა ქვეყნებთან. იგი მნიშვნელოვანია ჩვენი ქვეყნისათვის, რადგანაც კარგ საფუძველს შეუქმნის სოციალურ-ეკონომიკური პროექტების განხორციელებას.
თავდაცვის სამინისტროს წარმომადგენელმა ვეფხია გრიგალაშვილმა პირველი მოსმენით განსახილველად წარმოადგინა ორი კანონპროექტი: „ნდობის ჯგუფის შესახებ“ საქართველოს კანონში ცვლილებების შეტანის თაობაზე“ და „ საქართველოს თავდაცვის შესახებ“ საქართველოს კანონში ცვლილებების შეტანის თაობაზე“. ამ კანონპროექტებით განისაზღვრება თავდაცვის სამინისტროს ანგარიშვალდებულება ნდობის ჯგუფის წინაშე სამინისტროს მიერ განსახორციელებელ საიდუმლო სახელმწიფო შესყიდვებთან დაკავშირებით. ამ ცვლილებების მიხედვით, თავდაცვის სამინისტრო ვალდებული ხდება ნდობის ჯგუფს წარუდგინოს წინასწარი ინფორმაცია სახელმწიფო შესყიდვებთან დაკავშირებით.
პირველი მოსმენით განიხილეს ასევე კანონპროექტი „უმაღლესი განათლების შესახებ“ საქართველოს კანონში ცვლილების შეტანის თაობაზე“. პროექტი ქართულ ენაში მომზადების საგანმანათლებლო პროგრამის გავლის უფლების მინიჭებას ითვალისწინებს იმ პირთათვის, რომლებიც უმაღლეს საგანმანათლებლო დაწესებულებაში ერთიანი ეროვნული გამოცდების გავლის გარეშე ჩაირიცხებიან. კანონპროექტის ავტორთა განცხადებით, ეს ხელს შეუწყობს უცხო ქვეყნის მოქალაქეთა ინტეგრაციას ქართულ საზოგადოებაში.
კომიტეტის წევრებმა ერთხმად დაუჭირეს მხარი წარმოდგენილი საკითხების პარლამენტის პლენარულ სხდომაზე განსახილველად გატანას.
