მუშების თქმით, წარმოების მენეჯერმა მუშებს თათბირზე განუცხადა, რომ ქარხნის მენეჯმენტი თანამედროვე ტიპის, დანადგარების დამონტაჟებაზე უნდა გადართულიყო და მუშებისთვის დრო და ფული აღარ დარჩებოდათ.
“მასობრივ დათხოვნებს აპირებენ; ამის შესახებ მიხეილ თიგიშვილმა განაცხადა, ვიდრე სააღდგომო არდადეგებზე გავიდოდით. მან ბოლო თათბირზე გამოგვიცხადა, შეწყვეტილი გაქვთ კონტრაქტები და ყველა ვერ გამოხვალ სამუშაოდ იმიტომ, რომ იტალიიდან, ესპანეთიდან ევროპის სხვადასხვა ქვეყნებიდან მოდის დანადგარები ზღვით. ამ დანადგარების დამონტაჟებაზე უნდ გადაერთოს მთელი საწარმოს მენეჯმენტი და მუშებისთვის არ გვეცლებაო. არადა, 400-მდე ადამიანი ვრჩებით უმუშევარი,“ _ განაცხადა აქციის ერთ-ერთმა მონაწილემ ალექსანდრე ლომთაძემ.
აქციაზე იმყოფებოდნენ საპარლამენტო უმრავლესობის წევრი ომარ ნიშნიანიძე, ქუთაისის საკრებულოს წევრი მამუკა მღვდელაძე და მერიის შესყიდვების სამსახურის უფროსი ანდრო მაღლაკელიძე, რომელიც ასევე “ფრეშ ჯორჯიას “ ტექნიკური უზრუნველყოფის მენეჯერის თანამდებობას იკავებს. მისი თქმით, მუშახელის გათავისუფლების და ხელშეკრულებების შესახებ კომპეტენტური არ არის თუმცა, აქვე აღნიშნავს რომ დათხოვნილებს სამსახურში 2 თვეში დააბრუნებენ.
“თავიდანვე გეტყვით, რომ მე არ ვარ კომპეტენტური ამ ადამიანების გაშვება- დაბრუნების საკითხში. მე ვიცი, რომ ეს ხალხი არის დროებით უფასო შვებულებაში გაშვებული. ალბათ, ორ თვეზეა საუბარი. მათ აუცილებლად დაუძახებენ. ფართოვდება ქარხანა, რომელსაც ემატება 3 საწარმო. ამ ადამიანების უკან დაბრუნება მოხდება. არ იყო აქ ამდენი ხალხის ყოფნა საჭირო, დააბრუნებენ, ალბათ, ორ თვეში მაქსიმუმ,“_,განაცხადა ანდრო მაღლაკელიძემ.
როგორც “ფრეშ ჯორჯიაში“ დასაქმებული ქალები ჟურნალისტებთან საუბრისას აცხადებენ, მათ დაკისრებულ სამუშაოსთან ერთად, არაბების სახლის დალაგებას სთხოვდნენ, რაშიც დამატებით ანაზღაურებას არ უხდიდნენ, შეწინააღმდეგების შემთხვევაში კი, სამსახურიდან დათხოვნით ემუქრებოდნენ.
“ხელშეკრულებაში გვეწერა, რომ ერთი წელი უნდა გვემუშავა საწარმოში; იქ არსად არ იყო მითითებული, რომ არაბების სახლები უნდა გველაგებინა. ჩვენ რატომ უნდა გველაგებინა მათი სახლები?! იძულებულს გვხდიდნენ ეს საქმე გვეკეთებინა,“ _ განაცხადა აქციის ერთ-ერთმა მონაწილემ ნანა შალიკიანმა.
მოგვიანებით აქციაზე “ფრეშ ჯორჯიას“ ქართველი ხელმძღვანელი მიხეილ თიგიშვილიც გამოჩნდა, რომელიც ერთი საათის განმავლობაში, საპარლამენტო უმრავლესობის და ადგილობრივი თვითმმართველობის წარმომადგენლებს დახურულ კარს მიღმა ხვდებოდა. მოლაპარაკების შემდეგ კი, აქციაზე გამოჩნდნენ და მონაწილეებს გაესაუბრნენ. თიგიშვილის განცხადებით, ყველაფერი დროებითია. საწარმო გაფართოების ეტაპზეა და ამ დღიდან 6 თვის მანძილზე, სამუშაო ადგილებზე აღდგენა და დასაქმება ეტაპობრივად მოხდება. ასევე იწერება საგარანტიო ბრძანებები, რომ ეს ადამიანები აუცილებლად აღდგებიან სამსახურში.
“მე ვარ გარანტი, რომ ქართველი მუშები სამსახურში დაბრუნდებიან, რაც 6 თვის მანძილზე, ეტაპობრივად გახორციელდება,” – ამბობს თიგიშვილი.
მისივე თქმით, ქარხნიდან გათავისუფლებული 400–მდე მუშა ძველ სამუშაო ადგილებს ვერ დაუბრუნდება, თუმცა, ისინი ახალ ობიექტებზე დასაქმდებიან, რომლის მშენებლობაც ამ დროისთვის მიმდინარეობს. გამომდინარე აქედან, 6 თვის განმავლობაში, 400 ადამიანი სამსახურის და ანაზღაურების გარეშე რჩება, რომელთა სამუშაოზე დაბრუნების ერთადერთი გარანტი, თიგიშვილის მიერ შედგენილი წერილია.
ქართულ-ეგვიპტური კომპანია “ფრეშ ჯორჯიადან“ რამდენიმე დღეა 400 თანამშრომელი დაითხოვეს, რომლებიც 6 თვის ხელფასის ანაზღაურებას ითხოვენ. წინააღმდეგ შემთხვევაში, მასობრივი აქციებით იმუქრებიან.
