რა ხდება პარტიაში, როგორ აპირებენ მუშაობის წარმართვას, როგორ ემზადებიან პრაიმერისა და საპრეზიდენტო არჩევნებისთვის და როგორ აფასებენ რაიონში შექმნილ სიტუაციას _ ამ კითხვებზე პასუხის მისაღებად პარტიის აღმასრულებელ მდივანს ილია გაბუნიას ვესაუბრეთ, რომელიც ამავე დროს საკრებულოს ფრაქცია “დემოკრატიული საქართველოს” თავმჯდომარეა.
_ აბაშის საკრებულოში ფრაქცია “ნაციონალური მოძრაობა” დაიშალა და ჩამოყალიბდა ახალი ფრაქცია _ “დემოკრატიული საქართველო”. თუმცა, თავმჯდომარედ ისევ თქვენ დარჩით და წევრებიც იგივე გყავთ. რა შეიცვალა ფრაქციის მუშაობაში, რა განსხვავებაა დაშლილ ფრაქციასა და ახალ ფრაქციას შორის?
_ ფრაქცია “ნაციონალურ მოძრაობას” ჰყავდა 21 წევრი. რომ დაიშალა, წევრები სხვადასხვა ფრაქციაში გადავიდნენ. მაშინ ყველას ერთი აზრი ჰქონდა, ახლა კი ყველას სხვადასხვა აზრი აქვს. აქვთ მეტი თავისუფლება და შეუძლიათ გააკეთონ, რაც უნდათ. ფრაქცია უკვე მოქმედებს, ვიხილავთ სხვადასხვა საკითხებს ფრაქციის სხდომებზე.
_ თქვენ საკრებულოში ხართ ფრაქცია “დემოკრატიული საქართველოს” თავმჯდომარე და ამავე დროს რაიონის “ნაციონალური მოძრაობის” აღმასრულებელი მდივანი. ურთიერთგამომრიცხავი თანამდებობები გაქვთ _ ერთი მეორეს ხელს არ უშლის?
_ არანაირად არ უშლის ერთმანეთს ხელს. თუ კარგი იდეაა და რაიონისთვის სასიკეთო საქმეა, დავეთანხმებით და მხარს დავუჭერთ. ყველას აქვს თავისი აზრი და მოქმედების თავისუფლება.
_ რას იტყვით იმ ადამიანებზე, რომლებიც წინასაარჩევნოდ თქვენს გვერდით იდგნენ, “ნაციონალური მოძრაობის” აქტიური მხარდამჭერები და სხვადასხვა დავალებების შემსრულებლები იყვნენ. დღეს კი აცხადებენ, რომ მიდიოდა ზეწოლა და ოჯახების უსაფრთხოების გამო ვერ ემიჯნებოდნენ “ნაციონალურ მოძრაობას”. რა ზეწოლაზე და რისკებზეა საუბარი?
_ ეს ადამიანები არც ყოფილან პარტიის წევრები, უბრალოდ სამსახურებრივი მდგომარეობის გამო “აწყობდათ” ყოფილიყვნენ იქ და ახლაც სამსახურებრივი და პირადი მდგომარეობის გამო “აწყობთ” დადგნენ სხვა მხარეს.
_ ბევრი ადამიანი, რომელიც წინასაარჩევნოდ იყო “ნაციონალური მოძრაობის” წევრი, დღეს გახდა სხვადასხვა პარტიის წევრი. დატოვეს იმ ადამიანებმა პარტია ოფიციალურად?
_ როგორ უნდა დაეტოვებინათ, როცა არც კი იყვნენ პარტიის წევრები? პრაქტიკულად რაიონში არავინ არ ყოფილა პარტიის წევრი. იყვნენ მხარდამჭერები. გჯერათ ამისი?
_ საკმაოდ რთული დასაჯერებელია, თუ რაიონში წინასაარჩევნო სიტუაციებს გავისხენებთ.
_ დიახ, არავინ არ იყო რაიონში პარტიის წევრი, აბსოლუტურად არავინ.
_ და მიუხედავად ამისა, აბაშაში “ნაციონალურმა მოძრაობამ” გაიმარჯვა. გამოდის, მხარდამჭერები საკმაოდ აქტიურად მუშაობდნენ.
_ კი, გაიმარჯვა, მაგრამ ხომ იცით, როგორაა სიტუაცია _ მოსახლეობა ყოველთვის არის გამარჯვებულისკენ. აბაშა ძალიან პოლიტიზირებული არ იყო და ინერციით წავიდა სიტუაცია. ახლა რომ ჩაატარო არჩევნები, ჩემი აზრით, ნაციონალები 10%-საც ვერ აიღებენ.
_ მაშინ რა აზრი აქვს საპრეზიდენტო არჩევნებში ნაციონალური მოძრაობის კანდიდატის მონაწილეობას, თუ იმ რაიონებშიც კი ვეღარ გაიმარჯვებენ, სადაც 1 ოქტომბერს გამარჯვება მოიპოვეს? მითუმეტეს, რომ მთავრობა მათ დამარცხებას უწინასწარმეტყველებს, თუმცა, გუშინ დავით ბაქრაძემ განაცხადა, რომ “ნაციონალურ მოძრაობას” აქვს სამომავლო შანსი.
_ შანსი ექნება მაშინ, თუ ხელისუფლება შეცდომებს დაუშვებს. სხვა რა შანსი უნდა არსებობდეს? ჩემი აზრით, არავითარი. მთავარია, ხელისუფლებამ შეცდომები არ დაუშვას.
_ ახლა თუ ხდება რაიონში პარტიაში გაწევრიანება?
_ არა.
_ როცა პარტიის ლიდერები იყვნენ აბაშაში ჩამოსულები პარტიის აქტივთან შესახვედრად, თითზე ჩამოსათვლელი წევრები იყვნენ ოფისში. 20 ივლისს ზუგდიდში არის რეგიონალური კონფერენცია, სადაც აბაშიდანაც უნდა წავიდნენ დელეგატები. მაინც რამდენი დელეგატის წაყვანას შეძლებთ?
_ ჯერ ვერ გეტყვით, მაგრამ, ალბათ, დაახლოებით 20 დელეგატის.
_ 20 ივლისი ვახსენეთ _ თქვენ იქნებით ერთ-ერთი დელეგატი. გყავთ ფავორიტი წარმოდგენილი ოთხი კანდიდატურიდან? შეგიძლიათ გვითხრათ ვის მისცემთ ხმას პრაიმერში?
_ დავით ბაქრაძეს. ეს არის საკმაოდ გაწონასწორებული ადამიანი და დიდი პატივისცემით ვარ გამსჭვალული მისდამი.
_ პარტიული მუშაობა რაიონში თუ გაიშლება?
_ ამ ეტაპზე არ ჩანს არაფერი მასეთი.
_ ბატონო ილიკო, როცა რაიონის გამგებელი დაინიშნა, თქვენ გახსოვთ ის საპროტესტო აქციები, რაც მის დანიშვნას თან სდევდა. ამბობდნენ, რომ ის ნაციონალების კადრია და გარკვეული პიროვნების თუ ჯგუფის მიერ იყო ხელდასმული, რასაც უარყოფდა თვითონ. ის ინტერვიუში ამბობდა კიდეც, რომ არის კოალიციის კანდიდატი და ახალი მთავრობის კურსის გამტარებელი. მის მხარდამჭერ აქციაზე იყვნენ ყველა ის ადამიანები, რომლებიც წინასაარჩევნოდ “ნაციონალური მოძრაობის” გვერდით იდგნენ. იქ იყავით თქვენც, ამის ფოტომასალაც არსებობს. თქვენ, “ნაციონალური მოძრაობის” პარტიის წევრი მხარს ” ქართული ოცნების” კანდიდატს უჭერდით თუ ხალხი მართალს ამბობდა და გამგებელი კოალიციის კანდიდატი არ იყო?
_ რატომაც არა. ხომ გინახავთ, პარლამენტში სხვა პარტიის წარმომადგენლები მხარს უჭერენ იმ დადებით საკითხს, რომელსაც განსხვავებული აზრის მქონე პარტია აყენებს. ჩვენც მივეცით შანსი ხელისუფლებას, ხელს არ ვუშლით, თუ რამეს კარგს გააკეთებს, მხარს დავუჭერთ. ყველას შვილები გვეზრდება და სწორედ მათთვის გვინდა სიკეთე. ასე რომ, თუ რამე სიახლე იქნება და ეს სიახლე ქვეყანას კარგს მოუტანს, რატომ უნდა წავიდეთ წინააღმდეგი?
_ გამოდის, კოჰაბიტაცია სწორედ იმ დღეს დაწყებულა რაიონში. კარგით, ამ ეტაპზე რა სტადიაშია პარტიის მუშაობა რაიონში?
_ ჩვენ ვცდილობთ, ვნახოთ ის ადამიანები, რომლებიც კიდევ მხარს უჭერს “ნაციონალურ მოძრაობას”, დავიწყოთ მუშაობა და მზადება საპრეზიდენტო არჩევნებისთვის.
_ ახალგაზრდული ფრთა ფუნქციონირებს?
_ არა, უკვე დიდი ხანია არ მოქმედებს. არჩევნების შემდეგ დაიშალა.
_ საპრეზიდენტო არჩევნების შემდეგ თვითმმართველობის არჩევნებია, დააყენებს თუ არა “ნაციონალური მოძრაობა” თავის კანდიდატურებს და აპირებთ თუ არა ისევ ხელისუფლებისკენ სწრაფვას?
_ ნებისმიერი პარტია იბრძვის და ცდილობს მომავლისათვის. რა თქმა უნდა ჩვენც მივიღებთ ადგილობრივი თვითმმართველობის არჩევნებში მონაწილეობას. რაც შეეხება საპრეზიდენტო არჩევნებს, დიდი გამოცნობა არ სჭირდება ამას, რომ “ქართული ოცნების” კანდიდატი გაიმარჯვებს. ასე იყო ყოველთვის. ხომ გახსოვთ, როცა ზვიად გამსახურდია მოვიდა ხელისუფლებაში, სწორედ მისმა ფაქტორმა იმუშავა და ასეა ახლაც, ბიძინა ივანიშვილის მხარდაჭერით და პატივისცემით მისცა ხალხმა ბევრ კანდიდატს ხმა. გამარჯვება ივანიშვილს უკავშირდება.
_ 1 ოქტომბრის შემდეგ თქვენი თვალთახედვით, რა შეიცვალა რაიონში?
_ ცვლილებას ვერაფერს ვერ ვხედავ გარდა იმისა, რა დახმარებებიც იყო მთავრობის მხრიდან გლეხებზე. იყო ხარვეზებიც, შეიქმნა პრობლემები, მაგალითად დაგვიანდა ხვნა-თესვა, მაგრამ იმედია შემდეგში უფრო ორგანიზებულად წარიმართება სამუშაოები. ერთიც უნდა ვაღიაროთ, რომ უდიდესი შრომა გაწიეს რწმუნებულებმა.
_ საკადრო ცვლილებებზე რას იტყვით?
_ რაც გამგეობაშია? მე მგონი გამოცდილება აკლიათ ახალ კადრებს და ამიტომ არის, რომ რაიონი ერთ დონეზე დგას.
_ ახალ კადრებში ვის გულისხმობთ?
_ რა ვიცი, გამგებელი ახალი სისხლია, მოადგილეც. მგონი იქნება ზეევიდან დირექტივები, ჩატარდება კონკურსები, დაიხვეწება რაღაც, თორემ ამ ეტაპზე რაიმე ძირეულ და მნიშვნელოვან ცვლილებებს ვერ ვხედავ.
_ და ბოლოს თქვენი პოზიცია როგორია?
_ მთავარია საქმე გაკეთდეს რაიონში, პარტიას რა მნიშვნელობა აქვს. რატომ შევუშლი ხელს გამგებელს თუ სხვა ვინმეს, რომელიც კარგ საქმეს გააკეთებს რაიონისთვის. ეს ყველაფერი ხომ ჩვენი მომავალი თაობებისთვის კეთდება და ყველამ უნდა გავითავისოთ, რომ მარტო დღევანდელი დღით ცხოვრება არ შეიძლება. წინ უნდა გავიხედოთ. მერე რა, რომ “ნაციონალური მოძრაობის” აღმასრულებელი მდივანი ვარ, თუ ოცნება ქვეყნისთვის კარგს გააკეთებს, იმ საკითხებში დავუჭერ მხარს.
