კანონპროექტით, შესაძლებლი ხდება საქართველოს ტერიტორიაზე ცალკეული ნარჩენების იმპორტის დაშვება. პროექტის თანახმად, ეს ნარჩენებია შავ ან ფოლადსასხმელ წარმოებაში მიღებული გრანულირებული წიდა, რომელიც ასევე, მოიცავს წიდას ტიტანისა და ვანადიუმის ორჟანგის მისაღებად, მძიმე ნაცარი და საცეცხლე წიდა წამრმოქმნილი თბო(ნახშირზე) მომუშავე ელექტროსადგურებიდან. აგრეთვე, აქროლადი ნაცარი წამოქმნილი თბო(ნახშირზე) მომუშავე ელექტროსადგურებიდან. როგორც სხდომაზე აღინიშნა, საჭიროა წარმოდგენილი პროექტი დაზუსტდეს და ცალკეული ნარჩენების იმპორტის დაშვება მოხდეს მხოლოდ განსაკუთრებულ შემთხვევებში და ისიც მხოლოდ მთავრობის თანხმობით.
პარლამენტის პრესსამსახურის ინფორმაციით, კომიტეტის სხდომას როგორც მთავრობის წარმომადგენლები, ასევე, დარგის სპეციალისტები ესწრებოდნენ, სადაც გამოითქვა მოსაზრებები, რომ უნდა მოხდეს შესწავლა იმ ნარჩერენების თუ რა რა ზეგავლენა შეიძლება მოახდინოს მან გარემოზე და განისაზღვროს რამდენად აუცილებელია მისი იმპორტი ქვეყანაში.
როგორც ენერგეტიკის მინისტრის მოადგილემ, ირაკლი ხმალაძემ განმარტა, ამ ნარჩენების შემოტანა მოხდება აუცილებლობის შემთხვევებში და ისიც მხოლოდ მთავრობის თანხმობით. როგორც ითქვა, აღნიშნული ნარჩენი საჭიროა ჰიდროელექტროსადგურის ასაშენებლად.
კომპანია „აჭარა ენერჯი“-ს წარმომადგენლის თქმით, მდინარე ჭოროხზე ჰესის ასაგებად საჭიროა საშენ მასალაში გამოყენებული იქნას ნარჩენი, რომლის იმპორტიც ქვეყანაში უნდა განხორციელდეს. „ჰაიდელბერგ ცემენტის“ წარმომადგენლის ინფორმაციით კი, კომპანიას აღნიშნული მშენებლობისთვის ნებისმიერი მარკის ცემენტის წარმოება მსგავსი ნარჩენის გამოყენების გარეშე შეუძლია.
დარგის სპეციალისტების აზრით, ქვეყანას საკუთარი ნარჩენი უხვად აქვს, ამასთან, ისინი მიიჩნევენ, რომ ნარჩენის ე.წ. ნაცრის გამოყენება მშენებლობისთვის საჭიროებას არ წარმოადგენს, ამიტომ მათ დაუშვებლად მიაჩნიათ უცხოეთიდან მსგავსი ნარჩენის საქართველოში შემოტანა.
კომიტეტის სხდომაზე განხილვა დებატების ფორმატში თითქმის 2 საათს გაგრძელდა.
საბოლოოდ, კომიტეტის თავმჯდომარემ, გიორგი ცაგარეიშვილმა საკითხი კენჭისყრაზე არ დააყენა და კოლეგებს და აღმასრულებელი ხელისუფლების წარმომადგენლებს საკითხის უფრო ღრმად შესწავლისკენ მოუწოდა.
_ „ერთის მხრივ, ხელი უნდა შევუწყოთ ქვეყანაში ინვესტიციების განხორციელებას. თუმცა, პირველ რიგში აუცილებლად შესწავლილი უნდა იქნას, ახდენს თუ არა მავნე გავლენას მისი იმპორტი გარემოზე“, – განაცხადა გიორგი ცაგარეიშვილმა. კომიტეტის თავმჯდომარემ და კომიტეტის წევრებმა მეტი არგუმენტაცია და დოკუმენტურად დადასტურებული ინფორმაციის წარმოდგენა ითხოვეს, როგორც ნარჩენის უსაფრთხოების ასევე, მისი შემოტანის აუცილებლობის თვალსაზრისით.
პარლამენტის პრესსამსახურის ინფორმაციით, აღნიშნულ საკითხთან დაკავშირებით მსჯელობა კვლავ გაგრძელდება.
